រាជធានីភ្នំពេញ៖ ឈរថ្លែងក្នុងពិធីរម្លឹកខួប៥០ឆ្នាំ នៃការបង្រួបបង្រួមវៀតណាម ដែលមានមេដឹកនាំជាន់ខ្ពស់របស់វៀតណាម និងប្រជាជនខ្លួនចូលរួមយ៉ាងច្រើនកុះករ  ហើយក៏មានវត្តមានមិត្តបរទេសខ្លះផងនោះ លោក តូ ឡឹម អគ្គលេខាធិការបក្សកុម្មុយនីស្តវៀតណាម បានរំលេចឈ្មោះប្រទេសកម្ពុជា ក្នុងចំណោមប្រទេសដទៃទៀត ដែលធ្លាប់មានគុណស្រ័យលើវៀតណាម ពិសេសលើការបង្រួបបង្រួមវៀតណាម។

«វៀតណាម ​ អាចឈរនៅទីតាំងខ្លួនក្នុងពិភពលោកសព្វថ្ងៃនេះ ដោយសារមានការគាំទ្រ​ពី​សហភាព​សូវៀត (ប្រទេសរុស្ស៊ីបច្ចុប្បន្ន) ការគាំទ្រពីចិន ព្រមទាំងការរួមសាមគ្គីពី​ឡាវ និងកម្ពុជា»។ នេះជាសម្តីរបស់លោក តូ ឡឹម មេដឹកនាំមានអំណាចបំផុតក្នុងជួរបក្សកុម្មុយនីស្តវៀតណាម ដែលត្រូវបានស្រង់យកទៅចុះផ្សាយដោយអេភី (AP) សារព័ត៌មានអន្តរជាតិដ៏ល្បី។ ក្នុងប្រវត្តិសាស្រ្ត កម្ពុជាធ្លាប់ផ្តល់ទីតាំងឱ្យកងទ័ពវៀតណាមខាងជើងចូលមកតាំងមូលដ្ឋាន រហូតអាចរំដោះវៀតណាមខាងត្បូង ដែលធ្លាប់ត្រូវបានគ្រប់គ្រងដាច់ពីគ្នា ហើយបញ្ចូលគ្នាទៅជាវៀតណាមតែមួយ នៅឆ្នាំ១៩៧៥។   

ក្នុងពិធីរម្លឹកខួង៥០ឆ្នាំនៃការបង្រួបបង្រួមវៀតណាម ដែលត្រូវបានរៀបចំឡើង ក្នុងទីក្រុងព្រៃនគរ (ហូជីមិញ) នៅថ្ងៃទី៣០ ខែមេសា ឆ្នាំ២០២៥នេះ ក៏មានវត្តមានសម្តេច ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជាផងដែរ។ សម្រាប់ពិធីខួប៥០ឆ្នាំនេះ វៀតណាមបានរៀបចំឡើងយ៉ាងគគ្រឹកគគ្រេង និងមានលក្ខណៈពិសេសខុសពីរាល់ដង ដោយបានអញ្ជើញកងទ័ពពីប្រទេស៣ គឺកម្ពុជា ឡាវ និងចិន ឱ្យចូលរួមដើរព្យុហយាត្រា។

ចូលរួមក្នុងពិធីរម្លឹកខួប៥០ឆ្នាំនៃការបង្រួបបង្រួមវៀតណាម សម្តេច ហ៊ុន សែន និងសម្តេច ម៉ែន សំអន បានស្លៀកពាក់ឯកសណ្ឋានយោធាមានផ្កាយមាស៥ផុតលើស្មា។ នៅមុនពិធីរម្លឹកខួប៥០ឆ្នាំនេះ១ថ្ងៃ គឺនៅថ្ងៃ២៩មេសា សម្តេចប្រធានគណបក្សប្រជាជនកម្ពុជា បានជួបពិភាក្សាដាច់ដោយឡែកជាមួយលោក តូ ឡឹម អគ្គលេខាធិការបក្សកុម្មុយនីស្តវៀតណាម និងលោក ផាម មិញជីញ នាយករដ្ឋមន្រ្តីវៀតណាម។ ចំពោះមុខសម្តេចប្រធានគណបក្សកាន់អំណាចកម្ពុជា មេដឹកនាំកំពូលទាំង២របស់វៀតណាម សុទ្ធតែអរគុណកម្ពុជាដែលបានរួមចំណែកជួយវៀតណាមឱ្យបានរួបរួមគ្នា។ លោក តូ ឡឹម ជូនពាក្យមួយឃ្លាដល់សម្តេចថា លើពិភពលោកនេះ គ្មានទំនាក់ទំនងណា ល្អដូចទំនាក់ទំនងកម្ពុជា-វៀតណាមឡើយ៕