រាជធានីភ្នំពេញ៖ ក្រុមហ៊ុនមួយរបស់ប្រទេសថៃ បានចុះកិច្ចសន្យាទិញដំឡូងមីពីកម្ពុជា ក្នុងមួយឆ្នាំ៣០ម៉ឺនតោន តាមរយៈសហព័ន្ធដំឡូងមីកម្ពុជា។ នេះបើតាមការបញ្ជាក់របស់ក្រសួងពាណិជ្ជកម្ម នៅរសៀលថ្ងៃទី២៥មេសា ឆ្នាំ២០២៥…។

ក្រុមហ៊ុនមានឈ្មោះថា Koson Group។ ក្រៅពីផលិតផលដំឡូងមី ក្រុមហ៊ុនថៃមួយនេះ ក៏បានទទួលទិញពោតក្នុងមួយឆ្នាំ១០ម៉ឺនតោនពីកម្ពុជាផងដែរ។ ពិធីចុះអនុស្សណៈនៃការយោគយល់គ្នាលើការទិញ-លក់ផលិតផលដំឡូងមី និងពោតពីកម្ពុជា ធ្វើឡើងក្នុងដំណើរបេសកកម្មដឹកនាំដោយលោក រាជ រ៉ា រដ្ឋលេខាធិការក្រសួងពាណិជ្ជកម្ម និងប្រតិភូសហព័ន្ធដំឡូងមីកម្ពុជានៅប្រទេសថៃ ចាប់ពីថ្ងៃទី២២-២៥មេសា។ ក្រៅពីចុះហត្ថលេខាទិញ-លក់ ប្រតិភូកម្ពុជា និងសភាឧហ្សាកម្មថៃ ព្រមទាំងតំណាងក្រសួងស្ថាប័នពាក់ព័ន្ធរបស់ប្រទេសថៃ បានពិភាក្សាយ៉ាងផុលផុស ដើម្បីស្វែងរកបញ្ហាប្រឈម និងដំណោះស្រាយពាក់ព័ន្ធនឹងទីផ្សារ និងខ្សែច្រវាក់ផ្គត់ផ្គង់ផលិតកម្មកែច្នៃរវាងកម្ពុជា-ថៃ ផ្តោតទៅលើផលិតកម្មដំឡូងមី, ពោត, សណ្តែក, វត្ថុធាតុដើមផលិតចំណីសត្វ, កិច្ចសម្រួលពាណិជ្ជកម្ម និងភស្តុភាកម្ម។

លោករដ្ឋលេខាធិការ រាជ រ៉ា បានជំរុញ និងលើកទឹកចិត្តដល់អ្នកវិនិយោគថៃ ឱ្យមកដាក់ទុនវិនិយោគ និងធ្វើអាជីវកម្មនៅកម្ពុជាបន្ថែមទៀត។ ក្នុងបេសកកម្មនោះដែរ ប្រតិភូកម្ពុជា បានធ្វើដំណើរទស្សនកិច្ចបន្ថែមនៅក្រុមហ៊ុន Koson Group និងក្រុមហ៊ុនចំនួន៥ទៀតរបស់ថៃ ជារោងចក្រកែច្នៃដំឡូងមី, ប្រេងដូង, រោងចក្រគ្រឿងសំអាង, និងរោងចក្រធ្វើជី ដើម្បីអាចស្វែងរកឱកាសទីផ្សារសម្រាប់ការផ្គត់ផ្គង់ផលិតផលធ្វើជាវត្ថុធាតុដើមកែច្នៃសម្រាប់ផលិតផលសម្រេច នាំចូលពីកម្ពុជា។

សូមជម្រាបថា ដំឡូងមី និងពោត គឺជាដំណាំមួយប្រភេទដើរតួយ៉ាងសំខាន់ ក្នុងវិស័យកសិកម្មនៅប្រទេសកម្ពុជា។ គោលនយោបាយជាតិដំឡូងមី ឆ្នាំ២០២០-២០២៥ មានគោលបំណងធ្វើឱ្យកម្ពុជាក្លាយជាផលិតកម្មកែច្នៃ និងផ្គត់ផ្គង់ផលិតផលដំឡូងមីដែលអាចជឿទុកចិត្តបាន ដើម្បីជំរុញការនាំចេញទៅកាន់ទីផ្សារពិភពលោក។ ចំណែក ពោត ក៏កំពុងក្លាយជាកសិផលកាន់តែសំខាន់សម្រាប់ពិភពលោក ជាពិសេសការយកមកធ្វើជាចំណីសត្វ និងការប្រើប្រាស់ក្នុង​ឧស្សាហ​កម្ម​កែច្នៃ​ចំណីអាហារ​ផ្សេងទៀត៕