រាជធានីភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២១ ខែមេសា ឆ្នាំ២០២៥ បានឱ្យដឹងថា បើទោះបីជាមានបញ្ហាអាកាសធាតុត្រជាក់អូសបន្លាយក្ដី ប៉ុន្តែគ្រាប់ស្វាយចន្ទីសើម ដែលប្រមូលនាដើមរដូវឆ្នាំ២០២៥នេះ នៅតែមានគុណភាពល្អ ហើយការលក់ចេញ ទទួលបានតម្លៃល្អប្រសើរ។ 

គ្រាប់ស្វាយចន្ទីសើមនៅដើមរដូវនេះ មានតម្លៃ៦៥០០រៀលក្នុង១គីឡូក្រាម ខណៈបច្ចុប្បន្ន ពេលខ្លះទៀតអាចតម្លៃចន្លោះពី៤៨០០រៀល ដល់៥២០០រៀលក្នុង១គីឡូក្រាម ពោលគឺទៅតាមតំបន់ និងគុណភាពគ្រាប់។ ក្រសួងសង្កត់ធ្ងន់ថា៖«បើប្រៀបធៀបរយៈពេល៥ឆ្នាំ ចាប់ឆ្នាំ២០២១ ដល់២០២៥ តម្លៃគ្រាប់ស្វាយចន្ទីឆ្នាំ២០២៥នេះ មានតម្លៃខ្ពស់ជាងគេ ដោយសារមានទីផ្សារល្អ បើទោះបីក្នុងថ្ងៃឈប់សម្រាកបុណ្យចូលឆ្នាំប្រពៃណីជាតិខ្មែរ ក៏ការទិញលក់នៅតែដំណើរការដូចធម្មតា ពុំមានបញ្ហានោះឡើយ»។

ដោយឡែក ចំពោះបញ្ហាប្រឈមអំឡុងពេលនេះវិញ ប្រភេទពូជM23 មានការខូចជ្រុះក្តឹប និងផ្កាចន្ទីដែលទើបនឹងចេញវគ្គចុងក្រោយ ដោយសារតែមានភ្លៀងកក់ខែច្រើននៅក្នុងខែចេត្រ ធ្វើឱ្យប៉ះពាល់។ ផ្អែកលើការវាយតម្លៃនៅតាមតំបន់មួយចំនួន ក្រសួងអះអាងថា មានភ្លៀងធ្លាក់ច្រើនធ្វើឱ្យទិន្នផលអាចថយចុះ។ ដោយឡែកនៅតំបន់ដែលមានភ្លៀងតិចតួច ទិន្នផលអាចកើនឡើង ហើយការប្រមូលផលឆ្នាំនេះ អាចបញ្ចប់យឺតជាងឆ្នាំកន្លងមក ប៉ុន្តែក្រុមការងារនឹងបន្តតាមដានទៀត។

សូមជម្រាបថា ការវាយតម្លៃរបស់ក្រសួង ធ្វើឡើងបន្ទាប់ពីក្រុមការងារជំនាញក្រសួង ចុះពិនិត្យនិងវាយតម្លៃសហគមន៍កសិកម្មទំនើបស្វាយចន្ទីសាលាវិស័យ ស្រុកប្រាសាទបល្ល័ង្ក សហគមន៍កសិកម្មទំនើបសំបូររុងរឿង និងសហគមន៍កសិកម្មទំនើបទំរីង ស្រុកសណ្តាន់ ព្រមទាំងជួបកសិករនៅតាមចម្ការមួយចំនួនដែលកំពុងមមាញឹកប្រមូលផលដំណាំស្វាយចន្ទី និងអ្នកប្រមូលទិញគ្រាប់ស្វាយចន្ទី នៅខេត្តកំពង់ធំ៕