ក្រុងសៀមរាប៖ អាជ្ញាធរជាតិអប្សរា នៅថ្ងៃទី១១ ខែមេសា ឆ្នាំ២០២៥ បានប្រកាសត្រៀមខ្លួនរួចជាស្រេច ដើម្បីជួយសម្រួលដល់ភ្ញៀវទេសចរចម្រុះជាតិសាសន៍ ដែលចូលរួមទស្សនាកម្សាន្តក្នុងព្រឹត្តិការណ៍អង្គរសង្ក្រាន្តឆ្នាំ២០២៥។ ជាក់ស្តែងក្រុមភ្នាក់ងារទេសចរណ៍ជាង៤០០នាក់ នឹងត្រូវដាក់ប្រចាំគោលដៅចំនួន១៨សំខាន់ៗក្នុងរមណីយដ្ឋានអង្គរ..។

ប្រធានគ្រប់គ្រងភ្នាក់ងារទេសចរណ៍នៃនាយកដ្ឋានអភិវឌ្ឍន៍ទេសចរណ៍ និងវប្បធម៌ លោក ចាន់ សំណាង បានឱ្យដឹងថា មន្ត្រីជំនាញបានរៀបចំក្រុមភ្នាក់ងារទេសចរណ៍នៅតាមគោលដៅសំខាន់ៗជាច្រើនក្នុងរមណីយដ្ឋានអង្គរ ដើម្បីជួយសម្រួលការធ្វើដំណើរតាមដងផ្លូវរបស់ភ្ញៀវទេសចរកុំឱ្យកកស្ទះ ជួយសង្គ្រោះបឋមដល់ភ្ញៀវទេសចរដែលមានគ្រោះថ្នាក់ផ្សេងៗ និងរក្សាទុកសម្ភារភ្ញៀវទេសចរដែលភ្លេច ឬជ្រុះ ដើម្បីផ្ដល់ជូនម្ចាស់ដើមវិញ។ លោក ចាន់ សំណាង បញ្ជាក់ថា៖«ដើម្បីទទួលភ្ញៀវទេសចរចម្រុះជាតិសាសន៍ក្នុងឱកាសចូលឆ្នាំថ្មីខាងមុខ ក្រុមការងារភ្នាក់ងារទេសចរណ៍ប្រចាំគោលដៅនីមួយៗបានសម្អាតបរិស្ថាន រៀបចំទីធ្លាចំណត ជួសជុលជណ្ដើរកម្រាល និងដំឡើងបង្កាន់ដៃឈើមួយចំនួន និងសម្អាតគ្រឿងបរិក្ខារតាមប្រាសាទ»។

បន្ថែមពីនោះ មានភ្នាក់ងារទេសចរណ៍ប្រចាំនៅតាមដងផ្លូវនៃគោលដៅទេសចរណ៍សំខាន់ៗ ដូចជា៖ ខ្លោងទ្វារទន្លេអុំ ខ្លោងទ្វារជ័យ និងខ្លោងទ្វារដីឆ្នាំងរបស់ក្រុងអង្គរធំ ដើម្បីជួយសម្រួល និងបញ្ជៀសចរាចរណ៍ កុំឱ្យកកស្ទះទៀតផង។ ក្រៅតែពីការជូនដំណឹងនេះ អាជ្ញាធរជាតិអប្សរា អំពាវនាវដល់ភ្ញៀវទេសចរគ្រប់រូបដែលទៅកម្សាន្តក្នុងព្រឹត្តិការណ៍អង្គរសង្ក្រាន្ត នាឱកាសបុណ្យចូលឆ្នាំថ្មីប្រពៃណីជាតិខ្មែរ ត្រូវចូលរួមរក្សាអនាម័យក្នុងរមណីយដ្ឋានអង្គរ កុំពិសាគ្រឿងស្រវឹង ឬអាហារផ្សេងៗនៅក្នុងបរិវេណប្រាសាទបុរាណ។

ចំពោះការធ្វើដំណើរកម្សាន្តក្នុងតំបន់រមណីយដ្ឋានអង្គរវិញ ភ្ញៀវទេសចរត្រូវមានការយោគយល់អធ្យាស្រ័យគ្នា កុំបើកបរយានយន្តបញ្ច្រាសទិស ហើយត្រូវចតនៅចំណតរក្សាសណ្តាប់ធ្នាប់ឱ្យបានរៀបរយ។ បន្ថែមពីនោះ ត្រូវគោរពតាមក្រមប្រតិបត្តិអង្គរ ស្លៀកពាក់ឱ្យបានសមរម្យ ចៀសវាងការស្លៀកពាក់មិនសមរម្យ ដែលធ្វើឱ្យប៉ះពាល់ដល់តម្លៃប្រពៃណី និងវប្បធម៌របស់ជាតិខ្មែរ។ សូមជម្រាបថា ព្រឹត្តិការណ៍អង្គរសង្ក្រាន្ត ឆ្នាំ២០២៥ នឹងត្រូវរៀបចំឡើងរយៈពេល៣ថ្ងៃចាប់ពីថ្ងៃ១៤ដល់ថ្ងៃទី១៦មេសា នៅលើទីតាំងចំនួន៦ រួមមាន៖ ក្នុងបរិវេណប្រាសាទអង្គរវត្ត, សួនច្បារព្រះរាជដំណាក់, ដងស្ទឹងសៀមរាប, King’s Road, Pub street, និងទីតាំងអង្គរឃ្យុងយូ ដោយមានកម្មវិធីសរុបចំនួន៣៨ សុទ្ធសឹងជាកម្មវិធី ដែលផ្ដល់ជូននូវភាពសប្បាយរីករាយដល់ប្រជាពលរដ្ឋខ្មែរ និងភ្ញៀវទេសចរអន្តរជាតិ៕