សុខភាព៖ ជំងឺខ្សោយបេះដូង កើតឡើងនៅពេលសាច់ដុំបេះដូងមិនអាចច្របាច់ឈាមគ្រប់គ្រាន់ ដើម្បីបញ្ជូនអុកសុីសែនទៅចិញ្ចឹមរាងកាយដែលបណ្តាលឱ្យមានអារម្មណ៍ថា ហត់អស់កម្លាំងព្រមទាំងហើមជើង។ ដើម្បីបញ្ជៀសពីជំងឺខ្សោយបេះដូង លោកអ្នកអាចសាកតិចនិកទាំង៦ មានដូចខាងក្រោម…។
១.ហាត់ប្រាណ៖ ការហាត់ប្រាណជួយឱ្យមានសុខភាពល្អ ដូច្នេះ គួរហាត់ប្រាណរយៈពេល៣០ទៅ៦០នាទីជារៀងរាល់ថ្ងៃ ដើម្បីទទួលបានប្រសិទ្ធភាពខ្ពស់។ នៅពេលហាត់ប្រាណទៀងទាត់ សាច់ដុំបេះដូងខ្លាំងជាងមុនហើយចលនាឈាមរត់បានប្រសើរជាងមុន។ លើសពីនេះ ការហាត់ប្រាណក៏អាចជួយបញ្ចុះសម្ពាធឈាម និងជួយឱ្យស្រកទម្ងន់ផងដែរ។ ២.គ្រប់គ្រងទម្ងន់៖ ភាពធាត់ជះឥទ្ធិពលយ៉ាងខ្លាំងដល់សុខភាពទូទៅ និងបណ្តាលឱ្យមានជំងឺជាច្រើនដូចជា ជំងឺទឹកនោមផ្អែម ឬលើសសម្ពាធឈាម ដែលបង្កើនហានិភ័យឱ្យកើតជំងឺខ្សោយបេះដូង។
៣.ញ៉ាំអាហារល្អចំពោះសុខភាព៖ កាត់បន្ថយការញ៉ាំសាច់ អាហារមានជាតិខ្លាញ់ និងប្រៃខ្លាំង តែត្រូវញ៉ាំបន្លែ និងផ្លែឈើស្រស់ឱ្យបានច្រើន។ ៤.កាត់បន្ថយស្រេ្តស៖ រឿងជាច្រើនក្នុងជីរភាពប្រចាំថ្ងៃដូចជា សម្ពាធការងារ ទំនាក់ទំនងប្ដីប្រពន្ធ ការមើលថែទាំកូន វិបត្តិហិរញ្ញវត្ថុ ភាពនឿយហត់ជាដើមសុទ្ធតែអាចធ្វើឱ្យស្រេ្តស។ ស្រេ្តសមិនត្រឹមតែប៉ះពាល់ដល់សុខភាពផ្លូវចិត្ត និងផ្លូវកាយ ថែមទាំងប៉ះពាល់ដល់សុខភាពបេះដូងទៀតផង។ អាចកាត់បន្ថយស្រ្តេសតាមរយៈការហាត់យូហ្កា ធ្វើសមាធិ ស្តាប់តន្រ្តី ឬដើរកម្សាន្តជាដើម។ ជំងឺខ្សោយបេះដូង អាចធ្វើឱ្យមានផលវិបាកសុខភាពជាច្រើនគួរផ្លាស់ប្ដូររបៀបរស់នៅ និងរបបអាហារដើម្បីបង្ការកុំឱ្យកើតជំងឺខ្សោយបេះដូង។
៥.កាត់បន្ថយគ្រឿងស្រវឹង៖ ការញ៉ាំគ្រឿងស្រវឹងច្រើនអាចបង្កើនហានិភ័យកើតជំងឺខ្សោយបេះដូង និងខូចថ្លើម ដូច្នេះ គួរកាត់បន្ថយ ឬចៀសវាងញ៉ាំគ្រឿងស្រវឹងតាមដែលអាចធ្វើទៅបាន។ ៦.ជៀសវាងជក់បារី៖ អ្នកជក់បារី មានហានិភ័យខ្ពស់ក្នុងការកើតជំងឺខ្សោយបេះដូង និងជំងឺបេះដូងផ្សេងៗទៀត ព្រោះសារធាតុពុលក្នុងបារីធ្វើឱ្យសរសៃឈាមបេះដូងស្ទះ និងឡើងរឹងផងដែរ៕ ប្រភពពី៖ Hello គ្រូពេទ្យ
