សុខភាព៖ ស្បែក គឺជាសរីរាង្គដ៏ធំបំផុតនៅក្នុងរាងកាយ ដែលមានតួនាទីការពារជាតិពុល និងសារធាតុផ្សេងៗ។ ការគេងគ្រប់គ្រាន់ មានសារសំខាន់ណាស់ចំពោះសុខភាព និងស្បែក ដូច្នេះ ប្រសិនបើនារីៗ ចង់បង្កើនសុខភាពរាងកាយ និងស្បែក ចូរព្យាយាមគេងឱ្យបានគ្រប់គ្រាន់ បើគេងមិនគ្រប់ម៉ោង នោះនឹងនាំឱ្យស្បែកជួបបញ្ហា៣យ៉ាងធំៗដូចខាងក្រោមនេះ...។
ផលប៉ះពាល់នៃការគេងមិនគ្រប់គ្រាន់មានដូចជា៖ ១.ស្បែកឆាប់ចាស់៖ ការគេងបានតិចតួច អាចធ្វើឱ្យលេចឡើងនូវស្បែកចាស់ជ្រីវជ្រួញ និងស្បែកមិនអាចរក្សាជាតិទឹកបានច្រើន។ ការបាត់បង់ជាតិទឹកខ្ពស់ នឹងធ្វើឱ្យរនាំងការពារស្បែកទៅជាខ្សោយ ដោយសារតែស្បែកមានសមត្ថភាពជួសជុលខ្លួនឯង។ នារីៗដែលគេងបានគ្រប់គ្រាន់ មានរនាំងការពារស្បែកល្អ ជាងនារីៗដែលគេងមិនបានគ្រប់គ្រាន់ ដល់ទៅ៣០ភាគរយ។លើសពីនេះ អ្នកដែលគេងបានគ្រប់គ្រាន់ ក៏អាចជាសះស្បើយពីស្នាមក្រហមនៅលើផ្ទៃមុខ ដែលបណ្ដាលមកពីពន្លឺអ៊ុលត្រាវីយូ។
២.កើតមុន៖ យោងតាមការស្រាវជ្រាវ បានបង្ហាញថា ការគេងមិនគ្រប់គ្រាន់ អាចបណ្ដាលឱ្យកើតមុន។ ជាទូទៅការអស់កម្លាំងនៅពេលភ្ញាក់ពីគេង ក៏មានទំនាក់ទំនងយ៉ាងខ្លាំងជាមួយនឹងបញ្ហាមុនដូចគ្នា។ ហើយការគេងមិនគ្រប់គ្រាន់ អាចធ្វើឱ្យកើនឡើងកម្រិតអ័រម៉ូន Cortisol ដែលធ្វើឱ្យប៉ះពាល់ដល់ប្រព័ន្ធភាពស៊ាំ និងបង្កជាបញ្ហាស្បែក ឬជំងឺផ្សេងៗ។ មួយវិញទៀត ស្ត្រេសក៏ជាកត្តាមួយដែលរួមចំណែកនៃការកើតមុន ហើយនៅពេលដែលស្ត្រេស រាងកាយនឹងផលិតអ័រម៉ូន Cortisol និងប្រូតេអ៊ីនរលាក។
៣.រង្វង់ភ្នែកខ្មៅ៖ ការគេងមិនគ្រប់គ្រាន់ ក៏អាចធ្វើឱ្យមានភាពនឿយហត់ខ្លាំង ក៏ដូចជាមានស្នាមដក់ក្រោមភ្នែក ក៏ដូចជារង្វង់ភ្នែកខ្មៅ។ ការដក់នេះ បណ្ដាលមកពីការរក្សាសារធាតុរាវ នៅក្នុងជាលិកាទន់នៅបរិវេណជុំវិញភ្នែក។ រង្វង់ភ្នែកខ្មៅកើតឡើងជាទូទៅនៅពេលព្រឹក ឬបន្ទាប់ពីទទួលទានអាហារប្រៃ។ គួរជ្រាបថា ការគេងបានគ្រប់គ្រាន់ជួយធ្វើឱ្យស្បែកមានសុខភាពល្អ និងអាចជួយកាត់បន្ថយមុន ព្រមទាំងបញ្ហាស្បែកដទៃទៀត បានយ៉ាងមានប្រសិទ្ធភាព។ ដូចនេះ ត្រូវរៀបចំបរិយាកាសនៃការគេងឱ្យមានភាពត្រជាក់ស្រួល ងងឹត និងគ្មានសំឡេងរំខាន៕ ដកស្រង់ពី៖ ហេទ្បូគ្រូពេទ្យ
