រាជធានីភ្នំពេញ៖​​ គិតចាប់ពីខែមករាដល់ខែមីនា ឆ្នាំ​២០២៥​​ ក្រុមប្រឹក្សាអភិវឌ្ឍន៍កម្ពុជា អនុម័តគម្រោងវិនិយោគបានចំនួន១៧២ ក្នុងទុនវិនិយោគសរុបប្រមាណ២,៥ពាន់លានដុល្លារអាម៉េរិក ក្នុងនោះ ​ប្រទេសចិននៅតែឈរលំដាប់លេខ១ដែលមានធុរជនចិនមកបណ្តាក់ទុនរកស៊ីច្រើនជាងបណ្តាប្រទេសផ្សេងៗទៀត…។

ក្រុមប្រឹក្សាអភិវឌ្ឍន៍កម្ពុជា គូសបញ្ជាក់ថា ប្រភពទុនវិនិយោគពីប្រទេសចិន មាន៥៦,២៣ភាគរយ ប្រទេសកម្ពុជា មាន៣៤,៤០ភាគរយ ប្រទេសសិង្ហបុរី មាន២,៩១ភាគរយ កោះ British Virgin មាន២,៤០ភាគរយ ប្រទេសវៀតណាមមាន ១,៦៥​ភាគរយ កោះ Cayman មាន0,៨៨ភាគរយ ប្រទេសអង់គ្លេស មាន០,៥៥ភាគរយ កោះ Samoa មាន០,២១ភាគរយ សហរដ្ឋអាម៉េរិក មាន០,១៨ភាគរយ ប្រទេសកាណាដា មាន០,១៨ភាគរយ។ គម្រោងវិនិយោគសរុបចំនួន១៧២​ អាចបង្កើតការងារបានអាចបង្កើតការងារដល់ប្រជាពលរដ្ឋ បានចំនួនប្រមាណជិត១២ម៉ឺនកន្លែង។​

ក្នុងចំណោមគម្រោងវិនិយោគទាំងអស់ គម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ចពិសេសមានចំនួន៩៩គម្រោង និងគម្រោងវិនិយោគមានទីតាំងស្ថិតនៅក្នុងតំបន់សេដ្ឋកិច្ចពិសេសមានចំនួន៧៣គម្រោង។ ការចុះបញ្ជីគម្រោងវិនិយោគមានការកើនឡើងចំនួន៦៦គម្រោង ខណៈទុនវិនិយោគមានការកើនឡើងប្រមាណជាង៣០៥លានដុល្លារអាម៉េរិក ស្មើនឹងប្រមាណ១៤ភាគរយធៀបនឹងរយៈពេលដូចគ្នាក្នុងឆ្នាំ២០២៤៕