រាជធានីភ្នំពេញ៖ ពេញមួយខែកុម្ភៈ ឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន៤៤ មានទុនវិនិយោគសរុបប្រមាណ៣២១លានដុល្លារអាម៉េរិក ក្នុងនោះ ប្រទេសចិន នៅតែឈរលំដាប់កំពូលដែលមានធុរជនចិនមកបណ្ដាក់ទុនវិនិយោគនៅកម្ពុជា តាមពីក្រោយដោយប្រទេសតូចបំផុតនៅអាស៊ាន…។
ក្រុមប្រឹក្សាអភិវឌ្ឍន៍កម្ពុជា គូសបញ្ជាក់ថា ប្រភពទុនវិនិយោគពីប្រទេសចិន មានចំនួន៨៦,៧៥ភាគរយ ប្រទេសសិង្ហបុរី មាន១១,៩៧ភាគរយ ប្រទេសអូស្ត្រាលីមាន ០,៨០ភាគរយ និងអង់គ្លេស ០,៤៨ភាគរយ។ គម្រោងវិនិយោគសរុបចំនួន៤៤ អាចបង្កើតការងារបានប្រមាណ២៥ពាន់កន្លែង។ ក្នុងចំណោមគម្រោងវិនិយោគទាំងអស់ គម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ចពិសេសមានចំនួន២១គម្រោង និងគម្រោងវិនិយោគមានទីតាំងស្ថិតនៅក្នុងតំបន់សេដ្ឋកិច្ចពិសេសមានចំនួន២៣គម្រោង។ ក្នុងខែកុម្ភៈដដែល ការអនុម័តគម្រោងវិនិយោគមានការកើនឡើងចំនួន៧គម្រោង ធៀបនឹងរយៈពេលដូចគ្នាកាលពីឆ្នាំ២០២៤។
លោក ជា វិទ្ធី អគ្គលេខាធិការគណៈកម្មាធិការវិនិយោគរបស់ក្រុមប្រឹក្សាអភិវឌ្ឍន៍កម្ពុជា បានដាក់ក្ដីរំពឹងថា ផ្អែកលើនិន្នាការនៃការផ្លាស់ប្ដូរមូលដ្ឋានផលិតកម្មរបស់ក្រុមហ៊ុនវិនិយោគធំៗមកកាន់តំបន់អាស៊ាន និងការបន្តដាក់ចេញនូវគោលនយោបាយគាំទ្រនានារបស់ប្រមុខរាជរដ្ឋាភិបាលកម្ពុជា ជាមួយនឹងកិច្ចខិតខំកសាងហេដ្ឋារចនាសម្ព័ន្ធ សម្រាប់សម្រួលដល់ការដឹកជញ្ជូនសំដៅកាត់បន្ថយទាំងការចំណាយថវិកា និងពេលវេលា រំហូរវិនិយោគចូលមកកម្ពុជានឹងបន្តកើនឡើងថែមទៀត។
សូមរំឭកថា ក្នុងខែមករា ឆ្នាំ២០២៥ កន្លងទៅ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគសរុបចំនួន៦៨គម្រោង មានទុនវិនិយោគសរុបប្រមាណ៧៤៨លានដុល្លារអាម៉េរិក និងអាចបង្កើតការងារនៅកម្ពុជា បានជាង៤,៦ម៉ឺនកន្លែង។ គម្រោងវិនិយោគទាំង៦៨នេះ សុទ្ធសឹងជាការវិនិយោគក្នុងវិស័យឧស្សាហកម្មទាំងអស់។ ក្នុងខែមករានេះដែរ ចិននៅបន្តឈរលេខរៀងទី១ដដែល ដែលមានធុរជនចិនមកបណ្ដាក់ទុនវិនិយោគនៅកម្ពុជាច្រើនជាងគេ ពោលគឺមានដល់ទៅជាង៧៣ភាគរយឯណោះ៕
