ក្រុងសំរោង៖ បន្ទាប់ពីខេត្តបន្ទាយមានជ័យ ឧត្ដរមានជ័យ បានក្លាយជាខេត្តទី១៩ ដែលទទួលបានជ័យលាភីបញ្ចប់ការបន្ទោបង់ពាសវាលពាសកាល (ODF) នៅព្រឹកថ្ងៃទី៧មេសានេះ...។

ពិធីប្រកាសទទួលស្គាល់ជាផ្លូវការ ឧត្ដរមានជ័យ ជាខេត្តបញ្ចប់ការបន្ទោបង់ពាសវាលពាសកាល (ODF) ធ្វើឡើងក្រោមអធិបតីភាព លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និងវត្តមាននៃការចូលរួមពីមន្រ្តី និងភាគីពាក់ព័ន្ធប្រមាណជាង១៦០០នាក់។ លោក ឃិន ញ៉ាណ អភិបាលរងខេត្តឧត្តមានជ័យ បានឱ្យដឹងថា ប្រជាពលរដ្ឋមាន៥ក្រុង-ស្រុក, ១៤ឃុំនិង៥សង្កាត់ និង៣០៨ភូមិ ប្រជាពលរដ្ឋតាមខ្នងផ្ទះមានបង្គន់អនាម័យប្រើប្រាស់ផ្ទាល់ខ្លួន គិតជាភាគរយស្មើ៩២ភាគរយ និងខ្នងផ្ទះប្រើបង្គន់រួម គិតជាភាគរយស្មើនឹង៨ភាគរយ។ ដូច្នេះ ស្ថានភាពប្រតិបត្តិអនាម័យរបស់ប្រជាពលរដ្ឋនៅទូទាំងខេត្តឧត្ដរមានជ័យ សម្រេចបានបញ្ចប់ការបន្ទោបង់ពាសវាលពាសកាល១០០ភាគរយ។

លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានកោតសរសើរ និងវាយតម្លៃខ្ពស់ចំពោះការរីកចម្រើន និងសមិទ្ធផលនានា ដែលខេត្តឧត្ដរមានជ័យសម្រេចបានលើគ្រប់វិស័យ។ យ៉ាងណា លោករដ្ឋមន្រ្តីនៅតែអំពាវនាវដល់រដ្ឋបាលខេត្ត និងគ្រប់ភាគីពាក់ព័ន្ធទាំងអស់ បន្តរក្សាលើការផ្គត់ផ្គង់ទឹក និងអនាម័យជនបទ ជាពិសេស រិះរកយន្តការរក្សានិរន្តរភាពខេត្ត ODF និងជំរុញការងារទៅសម្រេច ODF Plus នាពេលដ៏ខ្លីខាងមុខ។ គួរជម្រាបថា គិតត្រឹមថ្ងៃទី៧មេសានេះ កម្ពុជាមានរាជធានី-ខេត្តចំនួន១៩ហើយ ទទួលបានជ័យលាភីបញ្ចប់ការបន្ទោបង់ពាលវាលពាលកាល (ODF)៕