សុខភាព៖ នៅសុខៗបើសិនជាសង្កេតឃើញរាងកាយខុសធម្មតាដូចជា ចុះខ្សោយផ្លូវអារម្មណ៍ ឈាមអញ្ចាញធ្មេញ ខ្សោយភ្នែក ទល់លាមក ក្រចក និងសក់ពុកផុយ បញ្ជាក់ថា រាងកាយអាចខ្វះសារជាតិចិញ្ចឹមណាមួយជាមិនខាន ថ្ងៃនេះ SBM News ហ្នឹងបង្ហើបប្រាប់ឱ្យលោកអ្នកដឹងពីសារជាតិចិញ្ចឹមទាំងនោះ…។
១.ចុះខ្សោយផ្នែកផ្លូវអារម្មណ៍៖ ប្រសិនបើរបបអាហារមិនមានវីតាមីនជាតិរ៉ែគ្រប់គ្រាន់ នោះក៏អាចបង្កប៉ះពាល់ផ្នែកអារម្មណ៍ផងដែរ។ ការសិក្សាបានបង្ហាញថា ពពួកបន្លែ ផ្លែឈើ សម្បូរទៅដោយសារជាតិចិញ្ចឹមច្រើន ក៏ជំនួយដល់សុខភាពទាំងផ្នែករាងកាយ និងផ្នែកអារម្មណ៍។ ដូច្នេះ ដើម្បីឱ្យអារម្មណ៍ប្រសើររីករាយក៏ដូចជាស្រស់ស្រាយ គួរតែញ៉ាំអាហារដែលសម្បូរទៅដោយផ្លែឈើ និងបន្លែឱ្យបានច្រើន។ ឧទាហរណ៍៖ ផ្លែក្រូច ផ្លែបឺរ ក្រូចថ្លុង ត្រកួន ស្ពៃខាត់ណា ស្ពៃខ្មៅ មើមដំឡូង និងបន្លែពណ៌បៃតង។ល។ ២.ឈាមអញ្ចាញធ្មេញ៖ ឈាមអញ្ចាញធ្មេញញឹកញាប់អាចមានមូលហេតុច្រើន ប៉ុន្ដែហេតុផលសំខាន់មួយ គឺខ្វះវីតាមីនC។ រាងកាយមិនអាចផលិតវីតាមីន C បានដោយខ្លួនឯងទេ ដូច្នេះ ការញ៉ាំអាហារមានផ្ទុកវីតាមីន C គឺជារឿងចំាបាច់ដើម្បីបំពេញតម្រូវការរាងកាយ។ វីតាមីន C មានមុខងារសំខាន់ជួយពង្រឹងប្រព័ន្ធភាពស៊ាំការពាររាងកាយរឹងមាំ។ លោកអ្នកអាចស្វែងរកបានវីតាមីន C នៅក្នុងអាហារដូចជា៖ ពពួកផ្លែក្រូច ទំពាំងបាយជូរ ម្នាស់ និងបន្លែបៃតង។ល។
៣.ខ្សោយភ្នែក៖ បើមានអារម្មណ៍ថា ការសម្លឹងមើល មានការប្រែប្រួលដូចជា សម្លឹងមើលមិនសូវច្បាស់ ឆាប់រួយភ្នែក និងចាញ់ពន្លឺ ពិសេសនៅពេលយប់នោះមានន័យថា ភ្នែកអាចខ្វះវីតាមីន A។ ខ្វះវីតាមីន A អាចធ្វើឱ្យភ្នែកមិនអាចសម្លឹងមើលឃើញច្បាស់ល្អ ដូច្នេះ របបអាហារដែលសម្បូរវីតាមីន A មានដូចជា៖ ការ៉ុត បន្លែស្លឹកពណ៌បៃតង និងផ្លែក្រូច។ ៤.ឧស្សាហ៍ទល់លាមក៖ ទល់លាមកញឹកញាប់អាចបណ្ដាមកពីមិនសូវញ៉ាំពពួកអាហារដែលសម្បូរជាតិសរសៃ។ ជាមធ្យមក្នុងប្រព័ន្ធរំលាយអាហារមនុស្សម្នាក់គួរទទួលបានជាតិសរសៃពីរបបអាហារ១៨ក្រាមក្នុងមួយថ្ងៃ ទើបប្រព័ន្ធរំលាយអាហារដំណើរការល្អ។ ជាតិសរសៃមានមុខងារជួយឱ្យប្រព័ន្ធរំលាយអាហារដំណើររការស្រួលកាត់បន្ថយការទល់លាមក។
ជាតិសរសៃមាននៅខាងក្នុងដូចជា៖ សណ្តែកបារាំង ប្រូខូលី ដំឡូង ពោត ល្ពៅ ការ៉ុត ផ្កាខាត់ណា ខ្ទឹមបារាំង គ្រាប់អាល់ម៉ុន គ្រាប់ផ្កាឈូករ័ត្ន គ្រាប់ល្ពៅ សាច់ដូង ផ្លែសារី ផ្លែបឺរ ប៊្លូបឺរី ផ្លែស្ត្របឺរី ផ្លែចេក ក្រូច ត្របែក និងផ្លែប៉ោម(ញ៉ាំទាំងសម្បក)។ល។ ៥. ក្រចកនិងសក់ មានសភាពផុយស្រួយ៖ បើរាងកាយមានការផ្លាស់ប្ដូរ ក្រចក និងសក់ប្រែ ជាមានភាពផុយស្រួយនោះបង្ហាញថារាងកាយរបស់យើង អាចប្រឈមខ្វះវីតាមីន B។ ដូច្នេះ ត្រូវតែបង្កើនការញ៉ាំបន្លែផ្លែឈើដែលសម្បូរសារធាតុប្រភេទនេះដូចជា ផ្លែចេក ខាត់ណា ស្ពៃពួយឡេង ជាដើម។ រោគសញ្ញាបន្ទាប់បន្សំទៀតនៃកង្វះវីតាមីននេះដូចជា ស្លេកស្លាំង ឈឺសាច់ដុំ និងអាចរមួលក្រពើញឹកញាប់៕ ដកស្រង់ពី៖ Hello គ្រូពេទ្យ
