រាជធានីភ្នំពេញ៖​ ក្រសួងការងារ និងបណ្តុះបណ្តាលវិជ្ជាជីវៈ​ នៅរសៀលថ្ងៃទី២៧មីនា​​ នេះ​​ បានចេញសេចក្តីជូនដំណឹងមួយបញ្ជាក់ថា ​ក្នុងពិធីបុណ្យចូលឆ្នាំថ្មីខាងមុខ​ ករណីកម្មករនិយោជិតមិនទទួលបានការឈប់សម្រាក​ដោយមានប្រាក់ឈ្នួលត្រឹមត្រូវ សូមផ្ដល់ព័ត៌មានមកក្រសួង តាមរយៈលេខ​ ១២៩៧ និង​​១២៨៦ ឬតាមរយៈប្រអប់បណ្ដឹងដើម្បីក្រសួងចាត់វិធានការតាមច្បាប់ចំពោះម្ចាស់រោងចក្រ-សហគ្រាស…។

ក្រសួងការងារ និងបណ្តុះបណ្តាលវិជ្ជាជីវៈ ​គូសបញ្ជាក់ថា​ យោងតាមច្បាប់ស្តីពីការងារ និងច្បាប់ស្តីពីការឈប់បុណ្យមានប្រាក់ឈ្នួលប្រចាំឆ្នាំ២០២៥ ម្ចាស់​ ឬនាយកសហគ្រាស​ ត្រូវអនុញ្ញាតឱ្យកម្មករនិយោជិតរបស់ខ្លួនឈប់សម្រាកដោយមានប្រាក់ឈ្នួលនាឱកាសពិធីបុណ្យចូលឆ្នាំថ្មីខាងមុខ​ និងត្រូវសម្របសម្រួលរៀបចំបើកប្រាក់ឈ្នួលសម្រាប់ខែមេសា​ ដែលកម្មករនិយោជិត​ត្រូវទទួលបានលើកទី១ ​ឱ្យបានមុនថ្ងៃឈប់សម្រាក។​ ក្រសួងបន្ថែមថា ចំពោះសហគ្រាសទាំងហ្លាយណាមានអាជីវកម្មត្រូវប្រព្រឹត្តទៅជាប្រចាំមិនអាចបញ្ឈប់សកម្មភាពបាន​​ ហើយ​ការឈប់សម្រាករបស់កម្មករនិយោជិតទាំងអស់​ព្រមគ្នា​ក្នុងពេលតែមួយ​​ នាំឱ្យខូចប្រយោជន៍ដល់សាធារណជន ឬក៏ធ្វើឱ្យខូចដំណើរការរបស់សហគ្រាស​ ត្រូវរៀបចំបែងចែកឱ្យកម្មករនិយោជិតបានឈប់សម្រាក​ ទៅតាមថ្ងៃឈប់សម្រាកបុណ្យដោយផ្លាស់ប្ដូរវេនគ្នា។​

ប្រសិនបើការផ្លាស់ប្ដូរវេនគ្នានេះ មិនអាចគាំទ្រដល់ដំណើរការអាជីវកម្មរបស់សហគ្រាស​ ម្ចាស់ និងតំណាងកម្មករនិយោជិត អាចពិភាក្សា និងព្រមព្រៀងគ្នាឱ្យកម្មករនិយោជិតទាំងអស់នៅធ្វើការនៅថ្ងៃឈប់សម្រាកបុណ្យចូលឆ្នាំថ្មី ដោយត្រូវរៀបចំឱ្យមានការឈប់សម្រាកជំនួសនៅពេលណាមួយផ្សេងទៀតបាន។ ក្នុងនោះ​ ម្ចាស់សហគ្រាស​ ត្រូវរៀបចំបញ្ជីឈ្មោះកម្មករនិយោជិត​ ដែលត្រូវផ្លាស់ប្ដូរគ្នាឈប់សម្រាកតាមកាលបរិច្ឆេទនីមួយៗខាងលើ និងរក្សាទុកជាប្រចាំសម្រាប់ការត្រួតពិនិត្យរបស់អធិការការងារ៕