FIFA៖ ក្រុមឈ្នះលើការប្រកួតពានរង្វាន់ Club World Cup ដែលមានសរុបចំនួន៣២ក្រុមនៅឆ្នាំនេះ នឹងទទួលបានប្រាក់រហូតដល់១២៥លានដុល្លារ ខណៈព្រឹត្តិការណ៍ដ៏ធំនេះ នឹងត្រូវធ្វើឡើងនៅលើទឹកដីសហរដ្ឋអាម៉េរិក។ នេះបើតាមការបញ្ជាក់របស់ FIFA កាលពីថ្ងៃពុធទី២៦មីនា។

ស្ថាប័នគ្រប់គ្រងបាល់ទាត់ពិភពលោក បានប្រកាសកាលពីដើមខែនេះ នូវរង្វាន់សរុបចំនួន១ពាន់លានដុល្លារសម្រាប់ព្រឹត្តិការណ៍ថ្ងៃទី១៤ ខែមិថុនា ដល់ថ្ងៃទី១៣ ខែកក្កដា។ ប្រធាន FIFA លោក ជីអាននី អ៊ីនហ្វែនទីណូ (Gianni Infantino) បានលើកឡើងនៅក្នុងសេចក្តីថ្លែងការណ៍មួយថា៖«FIFA នឹងមិនរក្សាទុកមូលនិធិណាមួយសម្រាប់ការប្រកួតនេះទេ ដោយសារតែថវិកាទាំងអស់ នឹងត្រូវចែកចាយទៅឱ្យក្លឹបបាល់ទាត់ ហើយក៏មិនប៉ះពាល់ដល់ទុនបម្រុងរបស់ FIFA ដែលត្រូវបានរក្សាទុកសម្រាប់ការអភិវឌ្ឍបាល់ទាត់ពិភពលោកតាមរយៈសមាគមសមាជិក FIFA ទាំង២១១នោះដែរ»។

ប្រហែលពាក់កណ្តាលនៃទឹកប្រាក់សរុបចំនួន១ពាន់លានដុល្លារ នឹងត្រូវបែងចែកទៅកាន់ក្លឹបទាំង៣២ ដោយផ្អែកលើលក្ខណៈវិនិច្ឆ័យកីឡា និងពាណិជ្ជកម្ម មានន័យថា ក្លឹបដូចជា មេឃខៀវ Manchester City និងអធិរាជស Real Madrid នឹងមានឱកាសទទួលបានភាគរយច្រើនជាងក្លឹបតូចៗនៅក្នុងគំរូ FIFA ដែលត្រូវបានបង្កើតឡើងដោយសមាគមក្លឹបបាល់ទាត់អឺរ៉ុប។ ទឹកប្រាក់ចំនួន៤៧៥លានដុល្លារបន្ថែមទៀតនឹងត្រូវបានផ្តល់រង្វាន់លើមូលដ្ឋានដែលទាក់ទងនឹងការប្រកួត មានន័យថា ក្រុមឈ្នះច្រើនជាងគេក្នុងចំនួន៧ប្រកួត នឹងទទួលបានប្រាក់ពីលើបន្ថែមទៀត លើចំនួន ១២៥លានដុល្លារ​។

គួរបញ្ជាក់ថា FIFA Club World Cup គឺជាការប្រកួតបាល់ទាត់អន្តរជាតិរៀបចំឡើងដោយ FIFA ដែលមានក្លឹបជើងឯកមកពីទ្វីបនីមួយៗនៃទ្វីបទាំងប្រាំមួយ រួមជាមួយម្ចាស់ជើងឯកលីករបស់ប្រទេសម្ចាស់ផ្ទះផងដែរ។ វាត្រូវបានបង្កើតឡើងចាប់តាំងពីឆ្នាំ២០០០ មកម្ល៉េះ ហើយប្រមូលផ្តុំដោយក្រុមខ្លាំងៗ និងល្បីៗជាច្រើនមកពី UEFA Champions League, Copa Libertadores និង AFC Champions League ជាដើម ហើយវាត្រូវប្រកួតប្រជែងរៀងរាល់៤ឆ្នាំម្ដង៕