រាជធានីភ្នំពេញ៖ ស្ថាប័នប្រដាល់កម្រិតពិភពលោកមួយទៀត គ្រោងនឹងដាក់បញ្ចូលពាក្យគុនខ្មែរ (Kun Khmer) ទៅក្នុងបទដ្ឋានបច្ចេកទេសនៃការប្រកួតរបស់ខ្លួន ដើម្បីឱ្យអត្តពលិកចម្រុះជាតិសាស្ត្រធ្វើការប្រកួតប្រជែងដណ្តើមយកខ្សែក្រវាត់ប្រចាំស្ថាប័នដ៏ធំមួយនេះ គឺស្ថាប័នប្រដាល់ WBC..។ 

យោងតាមការបង្ហោះរបស់លោក ស្រី ចាន់ថន អនុប្រធានសហព័ន្ធគុនខ្មែរអន្តរជាតិ បានឱ្យដឹងថា លោកគ្រោងនឹងនាំយកប្រដាល់គុនខ្មែរដាក់ចូលទៅក្នុងក្រមប្រតិបត្តិនៃស្ថាប័ន WBC តាមរយៈការដាក់បញ្ចូលពាក្យគុនខ្មែរនៅក្នុងខ្សែក្រវាត់កម្រិតអន្តរជាតិមួយនេះ នាពេលឆាប់ៗខាងមុខ។ លោកបញ្ជាក់យ៉ាងដូច្នេះថា៖«ជាជំហានទី២ ដល់ពេលវេលាដែលកូនខ្មែរយើងត្រូវរួមគ្នាហើយ ខ្ញុំបាទនឹងយកពាក្យ (គុនខ្មែរ KUN KHMER) ដាក់នៅលើខ្សែក្រវាត់ WBC ឱ្យបាន។ ប្រសិនបើបងប្អូនចូលរួម Share ចែករំលែកឱ្យបានចំនួន(15K Share) ឆាប់ៗខាងមុននេះ ស្ថាប័នធំនៅប្រទេស Mexico នឹងប្រកាសឱ្យពិភពលោកស្គាល់ពីគុនខ្មែរ»។

ទោះយ៉ាងណា លោក ស្រី ចាន់ថន មិនបានបញ្ជាក់ច្បាស់ទេថា ស្ថាប័ន WBC ព្រមទទួលយកក្បាច់គុនខ្មែរដែលកំពុងមានវិវាទជាមួយគុនមួយថៃយ៉ាងខ្លាំងនោះ តាមរបៀបណាឡើយ ដ្បិតថា បច្ចុប្បន្ន មួយថៃ បានលេចវត្តមាននៅលើស្ថាប័នកម្រិតពិភពលោកមួយនេះយ៉ាងទូលំទូលាយរួចទៅហើយ ដោយបានបង្កើតខ្សែក្រវាត់រាប់រយគ្រឿងទៅតាមប្រភេទទម្ងន់ និងកម្រិត ដាក់ឱ្យអត្តពលិកចម្រុះជាតិសាសន៍ធ្វើការប្រកួតប្រជែង។ តើមានហេតុផលអ្វីដែលថៃអនុញ្ញាតឱ្យគុនខ្មែរចូលទៅប្រជែងក្បាច់គុនគេ ទាំងដែលគេកំពុងប្រទាញប្រទង់ដណ្តើមយកពីយើងទៅធ្វើជាម្ចាស់កម្មសិទ្ធិផ្តាច់មុខ នៃមរតកក្បាច់គុនបុរាណដ៏ល្អឯកមួយនេះ? អង្គភាពសារព័ត៌មាន SBM News នៅមិនទាន់អាចសុំការបំភ្លឺពីលោកអនុប្រធានសហព័ន្ធគុនខ្មែរអន្តរជាតិបាននៅឡើយទេ គិតត្រឹមម៉ោងចេញផ្សាយនេះ ព្រោះទូរសព្ទលោកមិនអាចទាក់ទងបាន។ 

តែទោះជាយ៉ាងណាក៏ដោយ ដំណឹងមួយនេះ កំពុងទទួលបានការសាទរជាខ្លាំងពីសំណាក់អ្នកគាំទ្រប្រដាល់គុនខ្មែរនៅទូទាំងប្រទេស ដ្បិតថា ប្រសិនបើស្ថាប័ន WBC ពិតជាទទួលយកនូវក្រមប្រតិបត្តិក្បាច់គុនខ្មែរ ដាក់បញ្ចូលទៅក្នុងស្ថាប័ន WBC ប្រាកដមែន នោះគុនខ្មែរនឹងល្បីរន្ទឺកាន់តែខ្លាំងលើឆាកអន្តរជាតិ ហើយការផ្សព្វផ្សាយក្បាច់គុនខ្មែរទៅកាន់ទីផ្សារពីភពលោក ក៏នឹងកាន់តែទូលំទូលាយបន្ថែមទៀតដែរ។ ដូច្នេះ ដំណឹងនៃការដាក់បញ្ចូលក្រមប្រតិបត្តិក្បាច់គុនខ្មែរទៅក្នុងស្ថាប័ន WBC គឺពិតជាធ្វើឱ្យអ្នកគាំទ្រគុនខ្មែរសប្បាយរីករាយជាខ្លាំង។ សូមបញ្ជាក់ផងដែរថា បច្ចុប្បន្ន គុនខ្មែរ ត្រូវបានដាក់បញ្ចូលទៅក្នុងស្ថាប័នអន្តរជាតិដែលមានបទដ្ឋានបច្ចេកទេសកម្រិតពិភពលោកចំនួនពីររួចទៅហើយ នោះគឺស្ថាប័ន International Professional Combat Council (IPCC) និងស្ថាប័ន International Sport Kickboxing Association (ISKA) ប៉ុន្តែទន្ទឹមនោះ កម្ពុជា ក៏នៅមានស្ថាប័នកម្រិតអន្តរជាតិខ្លួនឯងមួយទៀតដែរនោះ គឺសហព័ន្ធគុនខ្មែរអន្តរជាតិ World Kun Khmer Federation (KKF) ដែលមានលោកស្រី ចាន់ថន ជាអនុប្រធានសហព័ន្ធ និងមានមូលដ្ឋាននៅក្រៅប្រទេស..៕