សុខភាព៖ ទម្លាប់មិនល្អពីការជក់បារី ផឹកស្រា ឬកើតស្ដ្រេសរ៉ាំរៃ អាចបង្កឱ្យប៉ះពាល់ដល់ថ្លើម ឬកើតជំងឺផ្សេងទៀត។ ថ្ងៃនេះ SBM News នឹងបង្ហើបប្រាប់ពីអាការទាំង៦ ដែលអាចជាសញ្ញាបញ្ជាក់ថា ថ្លើមលោកអ្នកចាប់ផ្តើមចុះខ្សោយហើយ…។
១.បញ្ហាគេង៖ មានកត្ដាជាច្រើនដែលអាចប៉ះពាល់ដល់ការគេង ក្នុងនោះក៏បណ្ដាលមកពីបញ្ហាថ្លើមផងដែរ។ តួយ៉ាងជំងឺក្រិនថ្លើម ក្នុងដំណាក់កាលដំបូង អាចបណ្ដាលឱ្យអ្នកជំងឺប្រឈមការគេងមិនលក់ ឬគេងមិនស្កប់។ ការសិក្សាបង្ហាញថា អ្នកជំងឺក្រិនថ្លើមមានការបញ្ចេញអ័រម៉ូនមេឡាតូនីនច្រើននៅពេលថ្ងៃ ហើយកាត់បន្ថយនៅពេលយប់ទើបបណ្ដាលឱ្យអ្នកជំងឺគេងមិនសូវបាន។ មេទ្បាតូនីន ជាអ័រម៉ូនម្យ៉ាងគ្រប់គ្រងលើវដ្ដនៃការគេង ជាធម្មតាអ័រម៉ូននេះបញ្ចេញពីខួរក្បាលនៅពេលយប់ គ្រប់គ្រងទៅលើការគេង ដូច្នេះប្រសិនបើមនុស្សម្នាក់មានជំងឺថ្លើម ការបញ្ចេញអ័រម៉ូននេះមានភាពមិនប្រក្រតី ទើបធ្វើឱ្យអ្នកជំងឺប្រឈមការគេងមិនលក់។
២.ស្បែកងាយឡើងជាំ៖ ថ្លើមមានមុខងារផលិតប្រូតេអុីន ជួយចិញ្ចឹមកោសិកាធំ-តូចទាំងហ្លាយក្នុងរាងកាយ ដូចជា ពពួកប្រូតេអ៊ីនដែលជួយដល់សុខភាពស្បែក។ ប្រសិនជាសុខភាពថ្លើមមិនល្អ មិនអាចផលិតប្រូតេអ៊ីនបានគ្រប់គ្រាន់ ពេលនោះក៏ប៉ះពាល់ដល់សុខភាពស្បែកដូចគ្នា ធ្វើឱ្យស្បែកគ្មានភាពរឹងមាំងាយប្រឈមការឡើងជាំពេលប៉ះទង្គិចនឹងអ្វីមួយ។ ៣.ឡើងកន្ទួលក្រហម៖ ការឡើងកន្ទួលក្រហមរមាស់លើស្បែកដោយគ្មានមូលហេតុ ក៏ជាសញ្ញាបង្ហាញថា ថ្លើមមានសុខភាពខ្សោយព្រោះថា ការឡើងកន្ទួលរមាស់ចេញពីខាងក្នុងស្បែកបណ្ដាមកពីទឹកប្រមាត់មានការកើនឡើង ខណៈថ្លើមគ្មានលទ្ធភាពក្នុងការគ្រប់គ្រងបានល្អ។ ការរមាស់នេះ ថ្វីដ្បិតតែមិនបង្កផលប៉ះពាល់ដល់ស្បែក ប៉ុន្ដែវាជារោគសញ្ញាមួយបង្ហាញពីសុខភាពថ្លើម។
៤.កើតជំងឺខាន់លឿង៖ ជំងឺខាន់លឿង ជាប្រភេទជំងឺម្យ៉ាងដែលធ្វើឱ្យស្បែក និងភ្នែកលោកអ្នកជំងឺមានសភាពលឿង។ បញ្ហាលឿងនេះ កើតឡើងដោយសារតែសារធាតុ bilirubin ដែលផលិតពីកោសិកាគ្រាប់ឈាមក្រហម ហើយថ្លើមមិនអាចបំបែកបាន។ ក្នុងករណីថ្លើមមិនអាចបំបែកសារធាតុនេះបាន នោះមានន័យថា សុខភាពថ្លើមចុះខ្សោយអាចមានជំងឺដូចជា ក្រិនថ្លើម ឬរលាកថ្លើមជាដើម។ ដូច្នេះ ប្រសិនបើជួបប្រទះជំងឺខាន់លឿង ត្រូវទៅជួបគ្រូពេទ្យឆាប់តាមដែលអាចធ្វើទៅបាន។ ៥.អស់កម្លាំង៖ ខ្សោយឆាប់អស់កម្លាំង ក៏ជាសញ្ញាមួយពាក់ព័ន្ធទៅនឹងសុខភាពថ្លើម ព្រោះនៅពេលដែលថ្លើមមានបញ្ហា គឺគ្មានសមត្ថភាពអាចបំបែកជាតិពុលក្នុងអាហារ ហើយក៏មិនអាចស្រូបយកសារធាតុសំខាន់ៗ ដើម្បីចិញ្ចឹមរាងកាយបានគ្រប់គ្រាន់។ ម្យ៉ាងវិញទៀត អាការខ្សោយឆាប់អស់កម្លាំងនេះ ក៏ជារោគសញ្ញាមួយក្នុងចំណោមរោគសញ្ញាដទៃទៀតនៃជំងឺរលាកថ្លើម។
៦.បាត់បង់ចំណង់អាហារ៖ សុខភាពថ្លើមមិនល្អ ក៏បណ្ដាលឱ្យបាត់បង់ចំណង់អាហារ និងស្រកគីឡូខុសធម្មតា ព្រោះថ្លើមមានមុខងារបំប្លែងសារធាតុចិញ្ចឹមចេញពីរបបអាហារ ដើម្បីបំពេញតម្រូវការប្រើប្រាស់របស់រាងកាយ។ ប្រសិនបើថ្លើមមានបញ្ហារលាក ឬខូចខាតកោសិកាណាមួយមិនអាចបំពេញមុខងារបានល្អទេ នោះនឹងធ្វើឱ្យប៉ះពាល់ផ្នែកផ្សេងនៃទៀតនៃប្រព័ន្ធរំលាយអាហារបណ្ដាលឱ្យអ្នកជំងឺបាត់ចំណង់អាហារ ស្រកគីឡូ ចង្អោរ ករណីខ្លះអាចក្អួតផងដែរ៕ ដកស្រង់ពី៖ Hello គ្រូពេទ្យ
