សុខភាព៖ នៅពេលពិសាគ្រឿងស្រវឹងច្រើនពេក អាចបង្កគ្រោះថ្នាក់ធ្ងន់ធ្ងរដល់ថ្លើម ហើយករណីខ្លះថ្លើមខូចមិនអាចព្យាបាលបាន តែបើករណីស្រាលៗ ប៉ះពាល់ដល់សុខភាពរាងកាយផ្សេងៗទៀត។ ជាក់ស្ដែង កត្តាជាច្រើន អាចប៉ះពាល់ដល់សុខភាពថ្លើម ដោយសារការទទួលទានគ្រឿងស្រវឹង លើសកម្រិត អាចបណ្ដាលឱ្យមានជំងឺរលាកថ្លើម ក្រិនថ្លើម និងខ្លាញ់រុំថ្លើម។ ខាងក្រោមនេះ ជារោគសញ្ញាទាំង៤ បញ្ជាក់ថា ថ្លើមចាប់ផ្តើមខូចដំណាក់កាលដំបូង។
១.ចង្អោរ៖ ជំងឺរលាកថ្លើម បណ្ដាលមកពីជាតិអាកុល អាចនាំឱ្យក្អួតចង្អោរ និងមានការឈឺចាប់ក្នុងពោះ និងមិនស្រួលក្នុងពោះ។មួយវិញទៀត អាចនឹងមានអាការក្ដៅខ្លួនតិចតួច និងមិនស្រួលពេញខ្លួនតែម្ដង។
២.អស់កម្លាំង៖ អាការអស់កម្លាំង អាចជារោគសញ្ញាដំបូង ដែលបញ្ជាក់ពីបញ្ហាថ្លើម ដែលអាចកើតឡើង ដោយសារវីរុស ការផឹកគ្រឿងស្រវឹងច្រើនជ្រុល ឬជំងឺតំណពូជ។ អាការនេះជាសញ្ញាទូទៅ អាចមានសភាពស្រាល ឬអាចបណ្ដាលឱ្យមានផលវិបាកធ្ងន់ធ្ងរ។
៣.ស្រកទម្ងន់៖ ពិសាគ្រឿងស្រវឹងច្រើនពេក អាចធ្វើឱ្យចំណង់អាហារថយចុះ ឬបាត់បង់ចំណង់អាហារ និងស្រកទម្ងន់យ៉ាងឆាប់រហ័ស។ ទាំងនេះអាចជាសញ្ញា នៃការខូចថ្លើម ដោយសារតែគ្រឿងស្រវឹង។ មួយវិញទៀត ថ្វីត្បិតតែទម្ងន់រាងកាយសមល្មម ជាគន្លឹះនៃការថែទាំសុខភាពថ្លើមក៏ពិតមែន ប៉ុន្តែការប្រែប្រួលទម្ងន់រាងកាយភ្លាមៗ ក៏អាចបញ្ជាក់ពីបញ្ហាសុខភាពធ្ងន់ធ្ងរផងដែរ។
៤.ចំណង់អាហារធ្លាក់ចុះ ឬបាត់បង់ចំណង់អាហារ៖ ការបរិភោគគ្រឿងស្រវឹងច្រើនជ្រុល ក៏អាចបង្អាក់ចំណង់អាហារ និងអាចធ្វើឱ្យយើងមានអារម្មណ៍ចង់ក្អួត ហើយមិនសូវមានថាមពល។ លើសពីនេះទៅទៀត ដោយសារតែកង្វះសារធាតុចិញ្ចឹម និងសារធាតុរ៉ែត្រឹមត្រូវ នៅក្នុងរាងកាយនោះ គ្រឿងស្រវឹង ក៏អាចរួមចំណែកដល់ការបំផ្លាញកោសិកាថ្លើមផងដែរ៕ ដកស្រង់ពី៖ ហេទ្បូគ្រូពេទ្យ
