សុខភាព៖ ក្រោយពីពិសាគ្រឿងស្រវឹង តែងមានអាការធីងធោង ឈឺក្បាល ចង់ក្អួត ចង់រាក។ អាការបែបនេះ អាចជាការស្រវឹងតិចតួច តែបើដាក់ជ្រុលខ្លាំង អាចនឹងធ្ងន់ធ្ងរជាងនេះ ឬមិនអាចក្រោកពីដំណេក ក៏ថាបាន ជាហេតុនាំឱ្យប៉ះពាល់ដល់ការងារ។ តែយ៉ាងណា លោកអ្នកអាចសាកល្បងទទួលទានអាហារទាំង៦ ដែលមានដូចខាងក្រោម ដើម្បីឱ្យមានកម្លាំងប្រកបការងា រដោយស្រទ្បះខ្លួន…។
១.ទឹក៖ នៅក្នុងគ្រឿងស្រវឹងមានផ្ទុកសារអាល់កុល អាចបញ្ចុះជាតិទឹកក្នុងខ្លួន តាមរយៈទឹកនោម
ជាហេតុធ្វើឱ្យអ្នកស្រវឹងតែងនោមច្រើនខុសពីធម្មតា។ បរិមាណជាតិស្រវឹងដែលចូលទៅក្នុងខ្លួនទាំងប៉ុន្មាន
នឹងត្រូវបញ្ចេញមកវិញ ដោយជាតិទឹក តាមរយៈទឹកនោម មកវិញប៉ុណ្ណឹង។ ជាហេតុដែលអ្នកស្រវឹង ត្រូវពិសាទឹកឱ្យបានច្រើន បើមិនដូច្នោះទេ
ខ្លួនប្រាណ នឹងប្រឈមកង្វះជាតិទឹក ដែលអាចបង្កជាការឈឺក្បាល ធីងធោង និងស្រេកទឹក។
២.សូដា៖ ជាតិសូដា ក៏ផ្ដល់អត្ថប្រយោជន៍ខ្ពស់ ចំពោះសុខភាពអ្នកស្រវឹងផងដែរ ព្រោះថា សូដាបានរួមចំណែកក្នុងការពន្លឿនប្រតិបតិ្ដការមេតាប៉ូលីស រំលាយជាតិអាល់កុលក្នុងខ្លួន
កាន់តែពិសេសទៀតនោះ គឺជួយការពារ ពីផលប៉ះពាល់ជាតិអាល់កុលចំពោះថ្លើម។
៣.ទឹកដូង៖ ទឹកដូងមានផ្ទុកសារធាតុអ៊ីឡិចត្រូលីត សារធាតុមួយប្រភេទនេះ មានសារសំខាន់ក្នុងដំណើរគ្រប់គ្រងជាតិទឹកក្នុងឈាម។ ការខ្វះលំនឹងអេឡិតត្រូលីតក្នុងរាងកាយ គឺអាចបណ្ដាលឱ្យខ្សោយ អស់កម្លាំង ខ្វះជាតិទឹក
វិលមុខ ឬឈឺក្បាល។ ដូច្នេះហើយទឹកដូង ក៏ចូលរួមចំណែកយ៉ាងសំខាន់ ជួយដោះស្រាយបញ្ហាដែលកើតពីការស្រវឹង។
៤.ស៊ុត៖ ក្រោយស្រវឹងប្រព័ន្ធរំលាយអាហារចុះខ្សោយ
រងសម្ពាធខ្លាំងពីជាតិអាល់កុល ជាហេតុនាំឱ្យអ្នកស្រវឹងមិនឃ្លានចំណីអាហារ។ គួរបរិភោគស៊ុតស្ងោរ
តែមិនត្រូវទទួលទានស៊ុតចៀនទេ ព្រោះក្រពះអាចនឹងប្រតិកម្មជាមួយជាតិខ្លាញ់ ធ្វើឱ្យអ្នកស្រវឹងងាយចង់ក្អួត
និងមិនអាចរំលាយអាហារបានល្អ។ លោកអ្នកអាចទទួលទានស៊ុតស្ងោរពី១ទៅ២គ្រាប់ បន្ទាប់ពីក្រោកពីស្រវឹងដោយសារស៊ុត គឺសម្បូរទៅដោយប្រូតេអ៊ីនខ្ពស់ និងល្អសម្រាប់ប្រព័ន្ធរំលាយអាហារ។
៥.ផ្លែចេក និងផ្លែប៊ឺ៖ អ្នកស្រវឹងស្រាថយជាតិប៉ូតាស្យូម សម្រាប់ទ្រទ្រង់ថាមពលក្នុងរាងកាយ ហេតុនេះការបរិភោគចេក និងផ្លែប៊ឺ ជារឿងល្អបំផុត ដែលអាចជួយបំពេញបានឡើងវិញនូវសារជាតិទាំងនោះ។
៦.បន្លែស្លឹកពណ៌បៃតង៖ ប្រភេទបន្លែស្លឹកពណ៌បៃតង មានផ្ទុកទៅដោយសារធាតុបំប៉ន ដូចជាសរសៃ ជាតិរ៉ែ និងអាសុីតអាមីណូ។ សារធាតុទាំងនោះ ផ្ដល់អត្ថប្រយោជន៍ខ្លាំងចំពោះ បញ្ហាសុខភាពដែលទទួលរងផលប៉ះពាល់ ពីជាតិអាល់កុល។ ជាតិសរសៃនៅក្នុងបន្លែ អាចជួយកាត់បន្ថយបញ្ហាផ្នែកប្រព័ន្ធរំលាយអាហារ ដែលភាគច្រើន អ្នកស្រវឹងស្រាតែងជួបប្រទះ ដូចជាការរាក និងទល់លាមក៕ ដកស្រង់ពី៖ហេទ្បូគ្រូពេទ្យ
