សុខភាព៖ អំពិល មិនត្រឹមតែយកមកដាក់ក្នុងម្ហូបដើម្បីបង្កើនឱជារសតែមួយមុខនោះទ្បើយ តែវាក៏អាចយកច្នៃធ្វើជាភេសជ្ជៈទទួលបានដែរ ហើយថែមទាំងជួយដល់សុខភាព៥យ៉ាងទៀតផង។ ថ្ងៃនេះ SBM News សូមបង្ហើបជូនឱ្យលោកអ្នកបានជ្រាប…។
ទី១.ដោះស្រាយបញ្ហារំលាយអាហារ៖ អំពិលទុំ ត្រូវបានប្រើប្រាស់ជាច្រើនសតវត្សរ៍មកហើយ សម្រាប់ដោះស្រាយបញ្ហារំលាយអាហារ ពីព្រោះវាមានផ្ទុកនូវជាតិសរសៃ និងថ្នាំបញ្ចុះលាមកបែបធម្មជាតិ ជួយជំរុញការបន្ទោបង់បានទៀងទាត់ កាត់បន្ថយការទល់លាមក និងជួយដល់សុខភាពក្រពះ-ពោះវៀនល្អប្រសើរឡើង។ ទី២.សុខភាពបេះដូង៖ ការញ៉ាំទឹកអំពិលទុំជាទៀងទាត់ អាចផ្តល់អត្ថប្រយោជន៍ដល់សុខភាពសរសៃឈាមបេះដូង ដោយជួយបញ្ចុះកម្រិតកូឡេស្តេរ៉ូលមិនល្អ ក៏ដូចជាកាត់បន្ថយហានិភ័យនៃជំងឺបេះដូង។
ទី៣.សារធាតុប្រឆាំង និងការរលាក៖ ទឹកអំពិលទុំ មានប្រសិទ្ធភាពខ្ពស់ក្នុងការទប់ស្កាត់ការរលាក នៅក្នុងរាងកាយ ដែលសក្តិសមបំផុតសម្រាប់អ្នកជំងឺរលាកសន្លាក ឬរលាករ៉ាំរ៉ៃ។ បន្ថែមពីនេះ ភេសជ្ជៈមួយប្រភេទនេះ ក៏មានគុណប្រយោជន៍ចំពោះអ្នកមានបញ្ហាគេងមិនលក់ដូចគ្នា។ ទី៤.សម្បូរទៅដោយវីតាមីន និងសារធាតុរ៉ែ៖ ទឹកអំពិលទុំ សម្បូរទៅដោយសារធាតុចិញ្ចឹមសំខាន់ៗដូចជាវីតាមីនC ដែលជួយឱ្យប្រព័ន្ធភាពស៊ាំរឹងមាំ ស្បែកមានសុខភាពល្អ និងរបួសឆាប់ជាសះស្បើយ។ លើសពីនេះ អំពិលទុំក៏ផ្តល់នូវសារធាតុរ៉ែដ៏ល្អឯកដូចជាប៉ូតាស្យូម ម៉ាញេស្យូម និងជាតិដែក។
ទី៥.សារធាតុប្រឆាំង និងអុកស៊ីតកម្ម៖ អំពិលទុំ ផ្ទុកទៅដោយសារធាតុប្រឆាំង និងអុកស៊ីតកម្ម ដូចជា polyphenols និង flavonoids ជួយប្រឆាំងនឹងរ៉ាឌីកាល់សេរី ដែលបង្កគ្រោះថ្នាក់នៅក្នុងរាងកាយ ហើយក៏អាចការពារការបំផ្លាញកោសិកា កាត់បន្ថយហានិភ័យនៃជំងឺរ៉ាំរ៉ៃផ្សេងៗ ព្រមទាំងជំងឺមហារីកផងដែរ៕ ដកស្រង់ពី៖ Hello គ្រូពេទ្យ
