រាជធានីភ្នំពេញ៖ លោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ ចេញបទបញ្ជាថ្មីមួយ គឺឱ្យបញ្ជូនមន្ត្រីនគរបាលដែលប្រព្រឹត្តិល្មើសវិន័យកងកម្លាំង ទៅយាមតាមព្រំដែន យ៉ាងតិចចាប់ពី៣ទៅ៦ខែ បន្ថែមពីលើការបន្ថយស័ក្ដិ។ បទបញ្ជារបស់លោករដ្ឋមន្រ្តី ស សុខា ត្រូវបានលោក រ៉េន រតនៈ ជំនួយការនិងជាអ្នកនាំពាក្យផ្ទាល់របស់លោក ស្រង់យកទៅផ្សាយលើហ្វេសប៊ុក នៅថ្ងៃទី១៧ ខែមីនា ឆ្នាំ២០២៥នេះ។

លោក រ៉េន រតនៈ បានបញ្ជាក់ដោយផ្អែកតាមប្រសាសន៍រដ្ឋមន្រ្តីមហាផ្ទៃថា ក្នុងករណី មន្រ្តីនគរបាលដែលធ្វើខុសវិន័យ គឺត្រូវបន្ថយទាំងស័ក្ដិ ហើយថែមទាំងបញ្ជូនទៅព្រំដែនទៀត។ ជំនួយការរបស់រដ្ឋមន្រ្តីមហាផ្ទៃ សរសេរដូច្នេះថា៖«បានធ្វើការស្រួលនៅតាមអង្គភាព មិនខិតខំធ្វើឱ្យល្អទេ បែរជាទៅបង្ករឿងល្មើសវិន័យ ដូច្នេះ មានតែឱ្យទៅព្រំដែន ដើម្បីដឹងថា កងកម្លាំងនៅទីនោះគាត់លំបាកកម្រិតណា មកវិញកែប្រែខ្លួន ហើយខិតខំធ្វើការឱ្យបានល្អ»។

សូមជម្រាបថា បទវិន័យរបស់កងកម្លាំងនគរបាលជាតិកម្ពុជា ចែងថា មន្ត្រីនគរបាលជាតិ ដែលប្រព្រឹត្តល្មើសនឹងបទវិន័យ ត្រូវដាក់ទណ្ឌកម្មដោយពិចារណាហ្មត់ចត់ ត្រឹមត្រូវសមស្រប និងមានទំនាក់ទំនងស៊ីសង្វាក់ ទៅនឹងទោសកំហុសដែលមន្ត្រីនគរបាលជាតិនោះបានប្រព្រឹត្ត ព្រមទាំងមានភស្តុតាងគ្រប់គ្រាន់។ ប្រធានអង្គភាពគ្រប់គ្រងមន្ត្រីនគរបាលជាតិនោះ មានសមត្ថកិច្ចដាក់ទណ្ឌកម្មដោយផ្ទាល់ តាមរូបភាពអប់រំ ណែនាំ ព្រមានផ្ទាល់មាត់ ឬការលុបឈ្មោះចេញពីតារាងដំឡើងឋានន្តរស័ក្តិ ឬលើកសំណើដាក់ទណ្ឌកម្មស្របតាមនីតិវិធីនិងបទប្បញ្ញត្តិជាធរមាន។

ចំពោះការ ដាក់ទណ្ឌកម្មតាមរូបភាព ការព្រមានជាលាយលក្ខណ៍អក្សរ ឬការដាក់ឱ្យទំនេរគ្មានប្រាក់បៀវត្សមិនឱ្យលើសពី១ឆ្នាំ ឬការដកមុខតំណែងឱ្យនៅក្នុងស្ថានភាពអសកម្ម ឬការបន្ថយឋានន្តរស័ក្តិមួយថ្នាក់ឬច្រើនថ្នាក់ ហើយករណីខ្លះឈានដល់ការដកមុខតំណែង ផ្លាស់ចេញពីអង្គភាព ដាក់ឱ្យចូលនិវត្តន៍មុនកំណត់ បណ្តេញចេញពីក្របខ័ណ្ឌមន្ត្រីនគរបាលជាតិកម្ពុជា ឬបញ្ជូនសំណុំរឿង ទៅតុលាការ៕