រាជធានីភ្នំពេញ៖ ទីតាំងប្រវត្តិសាស្ត្រអំពីឧក្រិដ្ឋកម្មចំនួន៣ រួមមាន៖ មជ្ឈមណ្ឌលប្រល័យពូជសាសន៍ជើងឯក សារមន្ទីរឧក្រិដ្ឋកម្មប្រល័យពូជសាសន៍ទួលស្លែង និងអតីតមន្ទីរឃុំឃាំង១៣ ត្រូវបានបង្កើតទៅជាកន្លែងឱ្យប្រជាជនចងចាំពីឧក្រិដ្ឋកម្មក្នុងរបបខ្មែរក្រហម ហើយក៏បានប្រែក្លាយទៅជាសន្តិភាពវិញ។ តាមការក្រាបបង្គំទូលថ្វាយរបស់សម្តេចនាយករដ្ឋមន្រ្តី ហ៊ុន ម៉ាណែត ព្រះមហាក្សត្រ ទ្រង់បានចេញព្រះរាជក្រឹត្យនៅថ្ងៃទី២៥ ខែកុម្ភៈ ឆ្នាំ២០២៥ ស្តីពីការបង្កើតទីតាំងទាំង៣នេះ ទៅជា «បូជនីយដ្ឋានចងចាំ» ដោយមានឈ្មោះពេញ និងជាផ្លូវការថា «បូជនីយដ្ឋានចងចាំនៃកម្ពុជាពីឧក្រិដ្ឋកម្មមកសន្តិភាព»។

គោលបំណងនៃការយកទីតាំងទាំង៣ បង្កើតទៅជា «បូជនីយដ្ឋានចងចាំ»​ រួមមាន៖ ១.ដើម្បីការពារវត្ថុតាង និងឯកសារទាំងហ្លាយ ដែលជាតឹកតាងប្រវត្តិសាស្ត្រ សម្រាប់ទុកជាមេរៀននៃការចងចាំ និងទប់ស្កាត់ការកើតឡើងសាជាថ្មីនៃឧក្រិដ្ឋកម្មប្រល័យពូជសាសន៍, ២.ដើម្បីការពារបរិស្ថាន និងធនធានធម្មជាតិ ក្នុងតំបន់តាមភូមិសាស្ត្រជាក់ស្តែង, ៣.ដើម្បីបង្កើនការយល់ដឹង ការសិក្សាស្រាវជ្រាវ ការអប់រំផ្សព្វផ្សាយ ការផ្សះផ្សា និងសន្តិភាព។ យោងតាមព្រះរាជក្រឹត្យ ក្រសួងវប្បធម៌ និងវិចិត្រសិល្បៈ មានដែនសមត្ថកិច្ចគ្រប់គ្រងផ្នែកបច្ចេកទេសលើការការពារ ថែរក្សា អភិរក្ស និងអភិវឌ្ឍ «បូជនីយដ្ឋានចងចាំ» ដោយសហការជាមួយក្រសួង-ស្ថាប័នពាក់ព័ន្ធ និងអាជ្ញាធរថ្នាក់ក្រោមជាតិ៕