ខេត្តពោធិ៍សាត់៖  ក្រសួងបរិស្ថាន បានព្យាករថា គិតត្រឹមព្រឹកថ្ងៃទី១៦កុម្ភៈ ឆ្នាំ២០២៥នេះ ខេត្តពោធិ៍សាត់ រងការបំពុលខ្យល់កម្រិតមធ្យមដដែល។ ក្រសួងបរិស្ថាន គូសបញ្ជាក់ថា មានកំហាប់ភាគល្អិតនិចលគិតជាមធ្យមស្មើនឹង ៤៥,៤៨ មីក្រូក្រាមក្នុងមួយម៉ែត្រគូប ធៀបនឹងបទដ្ឋាន(ស្ដង់ដារ)៥០មីក្រូក្រាមក្នុងមួយម៉ែត្រគូប និងគិតជាសន្ទស្សន៍គុណភាពខ្យល់ល្អ។

យ៉ាងណា បើមើលទៅតាមទិន្នន័យ បង្ហាញថា ខេត្តពោធិ៍សាត់ ស្ថិតក្នុងពណ៌ទឹកក្រូច មានន័យថា «បង្គួរ»​ ខ្យល់ពុលកម្រិតមធ្យម។ ជៀសវាងសកម្មភាពចេញខាងក្រៅបើសិនជាអាច ករណីចេញក្រៅ សូមប្រើប្រាស់ឧបករណ៍ការពារផ្លូវដង្ហើមជាជំនួយ ដើម្បីកុំឱ្យមានគ្រោះថ្នាក់ផ្លូវដង្ហើមជាយថាហេតុ។​​​​ 

ក្រសួងបន្ថែមថា ខេត្តបន្ទាយមានជ័យ ខេត្តកោះកុង ខេត្តព្រះវិហារ ខេត្តសៀមរាប ខេត្តស្ទឹងត្រែង និងខេត្តប៉ៃលិន ស្ថិតក្នុងពណ៌លឿង បញ្ជាក់ថា  ​«មធ្យម»​ ការបំពុលកម្រិតស្រាល។​​ មនុស្សទូទៅ អាចធ្វើសកម្មភាពចេញក្រៅផ្ទះជាធម្មតា​​ ​តែអ្នកដែលមានសុខភាពទន់ខ្សោយ​បើមានរោគសញ្ញាដូចជាក្អក ពិបាកដកដង្ហើម រលាកភ្នែក​ ត្រូវកាត់បន្ថយរយៈពេលនៃសកម្មភាពចេញក្រៅ។

ដោយទ្បែក រាជធានីភ្នំពេញ ខេត្តបាត់ដំបង ខេត្តកំពង់ចាម ខេត្តកំពង់ធំ ខេត្តកណ្តាល និងខេត្តឧត្តរមានជ័យ ស្ថិតក្នុងពណ៌បៃតង បានន័យថា គុណភាពខ្យល់ល្អ។ ចំពោះ ខេត្តកំពង់ឆ្នាំង ខេត្តព្រៃវែង ខេត្តកំពត ខេត្តស្វាយរៀង ​ខេត្តតាកែវ ខេត្តកែប​ ខេត្តរតនគិរី ខេត្តព្រះសីហនុ ខេត្តក្រចេះ ខេត្តមណ្ឌលគីរី ខេត្តកំពង់ស្ពឺ និងខេត្តត្បូងឃ្មុំ ស្ថិតក្នុងពណ៌ខៀវ គុណភាពខ្យល់ល្អណាស់ អាចធ្វើដំណើរចេញទៅក្រៅបានជាធម្មតា៕