រាជធានីបាងកក៖ នគរបាលភូមិន្ទ និងគណៈកម្មការផ្សព្វផ្សាយ និងទូរគមនាគមន៍ជាតិថៃ (NBTC) កាលពីថ្ងៃចន្ទទី១០ ខែកុម្ភៈ បានកាត់ផ្តាច់សេវាទូរគមនាគមន៍ដល់ក្រុមឆបោកតាមប្រព័ន្ធអនឡាញ ឬ call-centre នៅក្រុងប៉ោយប៉ែតនៃប្រទេសកម្ពុជា។ នេះបើតាមការចុះផ្សាយរបស់កាសែតថៃ The Nation។
ប្រតិបត្តិការដ៏ក្ដៅគគុកនេះ ត្រូវបានចាប់ផ្តើមនៅក្នុងតំបន់ចំនួនបីក្នុងខេត្តស្រះកែវរបស់ប្រទេសថៃរួមមាន៖ ស្ថានីយរថភ្លើងក្នុងសង្កាត់អារញ្ញប្រាថេត (Aranyaprathet), បង្គោលអង់តែនសេវាទូរសព្ទនៅខាងក្រោយផ្សារបេនចាវ៉ាន់ (Benjawan) ក្នុងស្រុកប៉ារ៉ៃ (Pa Rai), និងបង្គោលអង់តែនទូរសព្ទមួយទៀតនៅសហគមន៍ បានខកសាវ៉ាង (Ban Khok Sawang) នៃស្រុកថាខាំ (Tha Kham)។
ស្នងការនគរបាលខេត្ត លោកឧត្តមសេនីយ៍ទោ យីងយ៉ូស ថេបជុំណង់ (Yingyos Thepjumnong) អះអាងថា ប្រតិបត្តិការនេះធ្វើឡើងតាមការស្រាវជ្រាវ ដោយបានរកឃើញក្រុមឆបោកយ៉ាងសកម្មនៅក្រុងប៉ោយប៉ែត ដោយពួកគេបានប្រើប្រាស់បណ្តាញអ៊ីនធឺណែត និងសញ្ញាទូរសព្ទពីប្រទេសថៃ។ លើសពីនេះ លោកបានពន្យល់ថា ក្រុមអ្នកឆបោកបានដំឡើងស៊ីមកាតនៅព្រំដែនកម្ពុជា ដើម្បីចូលប្រើប្រាស់សេវាទូរគមនាគមន៍ ហើយមានទីតាំងការិយាល័យជាច្រើនត្រូវបានជួលធ្វើជាមជ្ឈមណ្ឌលឆបោកនៅក្រុងប៉ោយប៉ែត។
ឧត្តមសេនីយ៍ទោខាងលើបានសង្កត់ធ្ងន់ថា មន្ត្រីថៃកំពុងផ្តោតលើការកាត់ផ្តាច់បណ្តាញទូរគមនាគមន៍ដែលជាកម្មសិទ្ធិរបស់ក្រុមហ៊ុនឯកជនជួលអន្តរជាតិ(IPLC) ដែលផ្គត់ផ្គង់អ៊ីនធើណិត និងសេវាទូរសព្ទដល់អតិថិជនរាប់សិបនាក់ក្នុងប្រទេសកម្ពុជា។ យ៉ាងណា ជុំវិញករណីឆបោកតាមអនឡាញនេះ ត្រូវបានចាត់ទុកថា ជាការរំលោភកិច្ចសន្យា និងការប្រើសញ្ញាទូរគមនាគមន៍ ជាឧបករណ៍សម្រាប់ប្រព្រឹត្តឧក្រិដ្ឋកម្ម។ យ៉ាងណា ក្រុមមន្ត្រីបានកាត់បន្ថយការបញ្ជូនបណ្តាញទូរគមនាគមន៍ និងបានដកបង្គោលសេវាទូរសព្ទចេញ ដើម្បីធានាថា មានតែប្រជាជននៅក្នុងប្រទេសថៃប៉ុណ្ណោះដែលអាចចូលប្រើប្រាស់បាន។
គួរបញ្ជាក់ថា ឧក្រិដ្ឋកម្មតាមអ៊ីនធើណិត ការឆបោកតាមប្រព័ន្ធអនឡាញ ឬ call-centre កំពុងក្លាយដំបៅដ៏រ៉ាំរ៉ៃនៅក្នុងអាស៊ីអាគ្នេយ៍ ខណៈបញ្ហានេះបានក្លាយទៅជាបណ្តាញសកលដែលរកប្រាក់បានរហូតដល់៣ពាន់ពាន់លានដុល្លារក្នុងមួយឆ្នាំៗ។ ឧក្រិដ្ឋកម្មតាមអ៊ីនធើណិតនេះ បានទាញដៃអាស៊ីអាគ្នេយ៍ធ្លាក់ចូលទៅក្នុងជ្រោះនៃវិបត្តិការឆបោកតាមអនឡាញជាសកល ដោយមនុស្សជាច្រើននាក់ត្រូវបានគេល្បួងបោកប្រាស់ និងក្លាយជាជនរងគ្រោះតាមបណ្តាញអ៊ីនធឺណិត៕
