រាជធានីភ្នំពេញ៖ លោក ដៃ ជៀនឡាំង (Dai Jianlaing) ប្រធានក្រុមហ៊ុនដ៏ធំមួយនៅហ្វ៊ីលីពីនឈ្មោះ Excellent Associates Group Limited បានបង្ហាញចំណាប់អារម្មណ៍ចង់ស្វែងរកឱកាសវិនិយោគនៅកម្ពុជា ក្នុងវិស័យមួយចំនួន ក្នុងនោះមានទាំងការនាំចេញអង្កររបស់កម្ពុជាទៅកាន់ទៅកាន់ទីផ្សារសំខាន់ៗផងដែរ។ លោកបង្ហាញបំណងនេះ ក្នុងជំនួបពិភាក្សាការងារជាមួយសម្ដេច ហ៊ុន ម៉ាណែត នាយករដ្ឋមន្រ្តីកម្ពុជា កាលពីល្ងាចថ្ងៃទី១០កុម្ភៈ ឆ្នាំ២០២៥ ក្នុងឱកាសសម្ដេចបំពេញទស្សនកិច្ចផ្លូវការ នៅទីក្រុងម៉ានីល ប្រទេសហ្វ៊ីលីពីន ពីថ្ងៃទី១០ ដល់ថ្ងៃទី១១កុម្ភៈ...។
ក្នុងឱកាសនោះ លោកប្រធានក្រុមហ៊ុន បានជម្រាបជូនប្រមុខរាជរដ្ឋាភិបាលកម្ពុជា អំពីប្រតិបត្តិការ និងវឌ្ឍនភាពរបស់ក្រុមហ៊ុន និងបានបង្ហាញពីចំណាប់អារម្មណ៍ស្វែងរកឱកាសវិនិយោគនៅកម្ពុជា ដែលរួមមាន៖ ការវិនិយោគសួនឧស្សាហកម្ម និងកសិ-ឧស្សាហកម្ម ព្រមទាំងការកែច្នៃ។ ដោយសារតែអង្ករកម្ពុជាមានគុណភាពខ្ពស់ និង ទទួលបានចំណាត់ថ្នាក់ល្អច្រើនឆ្នាំជាប់ៗគ្នា លោកក៏មានបំណងស្វែងរកឱកាស នាំចេញអង្កររបស់កម្ពុជាទៅកាន់ទីផ្សារសំខាន់ៗមួយចំនួន ដូចជា៖ ហុងកុង ប្រទេសចិន និងទីផ្សារដទៃទៀតនាពេលអនាគតផងដែរ។
ក្រុមហ៊ុន Excellent Associates Group ជាក្រុមហ៊ុនដែលធ្វើប្រតិបត្តិការពាណិជ្ជកម្ម លើវិស័យសំណង់ ឧស្សាហកម្មរ៉ែ ការផលិតដែក សំណ និងស័ង្កសី។ល។ ជាការឆ្លើយតប សម្តេច ហ៊ុន ម៉ាណែត បានបង្ហាញក្តីរីករាយចំពោះចំណាប់អារម្មណ៍របស់ក្រុមហ៊ុនខាងលើ ក្នុងការស្វែងរកឱកាសវិនិយោគនៅកម្ពុជា។ ពាក់ព័ន្ធនឹងវិស័យកសិ-ឧស្សាហកម្ម សម្តេច បានលើកទឹកចិត្តឱ្យក្រុមហ៊ុនហ្វ៊ីលីពីនមួយនេះ ពិចារណាវិនិយោគលើទំនិញកសិ-ឧស្សាហកម្មមួយចំនួនបន្ថែមទៀត ដែលអាចចូលរួមបំពេញតម្រូវការក្នុងច្រវាក់ផលិតកម្មនៃវិស័យកសិកម្ម ក៏ដូចជាការផលិតជីបែបធម្មជាតិ និងជីគីមី ជាដើម៕
