រាជធានីភ្នំពេញ៖ ព្រះរាជាណាចក្រកម្ពុជា និងព្រះរាជាណាចក្រអារ៉ាប៊ីសាអូឌីត កាលពីថ្ងៃទី៦កុម្ភៈ ឆ្នាំ២០២៥ បានចុះអនុស្សរណៈនៃការយោគយល់គ្នា MoU ស្តីពីការជំរុញទំនាក់ទំនងដៃគូពាណិជ្ជកម្ម...។

អនុស្សរណៈនេះ ត្រូវបានចុះហត្ថលេខាដោយ លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម និងលោក ម៉ាជីត ប៊ីន អាប់ឌុលឡា អាល់កាសាប៊ី រដ្ឋមន្ត្រីក្រសួងពាណិជ្ជកម្ម និងជាប្រធានអាជ្ញាធរទទួលបន្ទុកពាណិជ្ជកម្មអន្តរជាតិ នៃប្រទេសអារ៉ាប៊ីសាអូឌីត នៅទីក្រុងរីយ៉ាដ។ លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បញ្ជាក់ប្រាប់ SBM News នៅថ្ងៃទី៧កុម្ភៈនេះថា បច្ចុប្បន្ន ពាណិជ្ជកម្មរវាងកម្ពុជា និងអារ៉ាប៊ីសាអូឌីត នៅមានទំហំតូចនៅឡើយ ដោយមិនទាន់មានការពេញចិត្តពេញថ្លើមពីភាគីទាំងពីរទេ បើធៀបនឹងទីផ្សារថ្មីៗ ខណៈអារ៉ាប៊ីសាអូឌីតជាគោលដៅមួយទៀតរបស់កម្ពុជា។ ក្នុងតំបន់មជ្ឈិមបូព៌ា មានទីផ្សារអាចឱ្យកម្ពុជានាំទំនិញចេញបាន ដូចជា ទំនិញហាឡាល ម្ហូបអាហារ សម្លៀកបំពាក់ ស្បែកជើង និងទំនិញបរិក្ខាមួយចំនួន។ លោកបន្ថែមថា អនុស្សរណៈនេះ ជាជំហានដំបូង ក្នុងការជំរុញបើកទីផ្សារ។

ក្រសួងពាណិជ្ជកម្ម បានដើរតួនាទីសំខាន់ ដោយធ្វើយ៉ាងណាឱ្យច្រកទៅកាន់ទីផ្សារមជ្ឈិមបូព៌ារីកចម្រើនទៅតាមការចង់បានរបស់ខ្លួន។ កម្ពុជាមិនត្រឹមតែពង្រីកទីផ្សារនៅមជ្ឈិមបូព៌ាទេ តែនឹងប្រើប្រាស់ច្រកនេះឈានទៅរកទីផ្សារអាហ្វ្រិកបន្ថែមទៀត។ អ្នកនាំពាក្យបញ្ជាក់បន្ថែមថា៖«សព្វថ្ងៃ យើងឃើញទីផ្សារនឹងនៅមានលក្ខណៈតូច និងរិតដ្បិតនៅឡើយ ដោយសារមានលក្ខខណ្ឌតម្រូវមួយចំនួន ដែលយើងមិនទាន់ស្វែងយល់បាន! ទីផ្សារនេះ ជាទីផ្សារប្រទេសមូស្លីម យើងចាំបាច់ត្រូវពិនិត្យជាក់ស្ដែង លើលក្ខខណ្ឌតម្រូវនៃទំនិញជាលក្ខណៈហាឡាល់។ អ៊ីចឹង ក៏មិនមែនត្រឹមទំនិញលក្ខណៈហាឡាល់ទេ វាអាចមានទំនិញផ្សេងទៀតដែលធ្វើការនាំចេញបន្ត ឬទិញជាវត្ថុដើមដើម្បីយកទៅផលិតសម្រាប់នាំចេញ។»

លោកបានលើកជាឧទាហរណ៍ថា៖ ស្វាយចន្ទី ខ្លឹមច័ន្ទ ម្រេច គ្រាប់ធញ្ញជាតិផ្សេងៗដែលប្រទេសទាំងអស់នោះគាត់ទិញ ជាពិសេសស្វាយចន្ទីតែម្ដង។ អ៊ីចឹង..នេះជាឱកាសធ្វើពិពិធកម្មទីផ្សារផង និងការស្ទាបស្ទង់ ដើម្បីសិក្សាពីលក្ខខណ្ឌតម្រូវរបស់ទីផ្សារ និងការធ្វើពិពិធកម្មទំនិញផង»។ គួរជម្រាបថា បច្ចុប្បន្ន កម្ពុជាបាននាំចេញទំនិញមួយចំនួនទៅកាន់ទីផ្សារអារ៉ាប៊ីសាអូឌីត ជាក់ស្ដែង មានដូចជា ប្រភេទគ្រាប់ធញ្ញជាតិ អង្ករ ត្រី សម្លៀកបំពាក់ ទំនិញជាអាហារកែច្នៃមួយចំនួន (ត្រី) ។ល។ នេះបើយោងតាមការបញ្ជាក់បន្ថែមរបស់លោក ប៉ែន សុវិជាតិ៕