ខេត្តកំពង់ស្ពឺ៖ មនុស្សចំនួន៣នាក់ រួមមានតៃកុងរថយន្តទាំងសងខាង និងអ្នករួមដំណើរម្នាក់ស្លាប់ភ្លាមៗ ក្នុងករណីគ្រោះថ្នាក់ចរាចរណ៍ដ៏រន្ធត់មួយបង្កឡើងដោយរថយន្តធំ លើកំណាត់ផ្លូវជាតិលេខ៤ ចំណោទភ្នំលោកយាយ ស្ថិតនៅភូមិទី៦ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ នៅថ្ងៃទី៧ ខែកុម្ភៈ ឆ្នាំ២០៥។ នេះបើតាមការបញ្ជារបស់ស្នងការនគរបាលខេត្តកំពង់ស្ពឺ...។
បើតាមរបាយការណ៍ ករណីគ្រោះថ្នាក់ចរាចរណ៍នោះបានកើតឡើងនៅចន្លោះគីឡូម៉ែត្រ១០៣-១០៤ រវាងរថយន្ត១គ្រឿងម៉ាក HYUNDAI ពណ៌-ស រ៉េចង្កូតទៅគន្លងផ្លូវមួយទៀតរួចបុករថយន្ដម៉ាក ISUZU ពណ៌-ស កំពុងចុះចំណោតភ្នំលោកយាយពេញទំហឹង។ ប្រភពពីអាជ្ញាធរបញ្ជាក់ថា រថយន្ត១គ្រឿង ម៉ាកHYUNDAI ពណ៌-ស ពាក់ស្លាកលេខភ្នំពេញ ៣E-៧៧៦៨ បើកបរដោយឈ្មោះ រ៉ុង ធួក ជាពលរដ្ឋរស់នៅខេត្តកំពង់ស្ពឺ។ រីឯរថយន្តមួយគ្រឿងទៀតម៉ាក ISUZU ពណ៌-ស ពាក់ស្លាកលេខភ្នំពេញ ៣F-៨៣៣២ បើកបរដោយឈ្មោះ ឃីម ស៊ាងហ៊ន់ រស់នៅខេត្តព្រៃវែង រួមជាមួយអ្នកដំណើរម្នាក់។
តាមសមត្ថកិច្ច ជាការសន្និដ្ឋានដោយជំនាញករណីគ្រោះថ្នាក់នោះ បង្កឡើងដោយអ្នកបើកបររថយន្ដស្ទួចម៉ាក HYUNDAI រេចង្កូតទៅបុករថយន្តមួយគ្រឿងទៀត។ ក្រោយកើតហេតុ លោកអធិការនគរបាលស្រុកភ្នំស្រួច បានបញ្ជាឱ្យកម្លាំងនគរបាលដែលប្រចាំការនៅគោលដៅលោកយាយម៉ៅ ប៉ុស្តិ៍នគរបាលរដ្ឋបាល និងផ្នែកសណ្ដាប់ធ្នាប់ ចុះសម្រួលសង្រ្គោះបន្ទាន់ ប៉ុន្ដែជាអកុសលអ្នកដំណើរក្នុងរថយន្ដរបួសធ្ងន់ ទើបស្លាប់ភ្លាមៗ។ ក្រោយកើតហេតុ វត្ថុតាងរថយន្ដទាំង២គ្រឿង ត្រូវបានសមត្ថកិច្ចស្ទួចយកមករក្សាទុក នៅអធិការដ្ឋាននគរបាលស្រុកភ្នំស្រួច ដើម្បីចាត់ការតាមនីតិវិធីច្បាប់៕
