ក្រុងសៀមរាប៖ អាជ្ញាធររដ្ឋបាលខេត្តសៀមរាប នឹងរៀបចំព្រឹត្តិការណ៍ធំៗចំនួន២រួមមាន៖ ពិធីចាប់ត្រីបែបបុរាណ ប្រារព្ធទ្បើងនៅថ្ងៃទី៩កុម្ភៈ និងក្បួនដង្ហែតុក្កតាយក្ស ធ្វើនៅថ្ងៃទី២២កុម្ភៈ ឆ្នាំ២០២៥ ខាងមុខ។ នេះបើតាមការបញ្ជាក់ពីមន្ត្រីនៃមន្ទីរទេសចរណ៍…។
ព្រឹត្តិការណ៍ចាប់ត្រីបែបបុរាណ៖ របស់អ្នកភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប នៅតែរក្សាបានយ៉ាងខ្ចាប់ខ្ចួន និងកំពុងទទួលបានការចាប់អារម្មណ៍យ៉ាងខ្លាំងពីសំណាក់ប្រជាពលរដ្ឋក្នុងមូលដ្ឋាន មកពីតាមបណ្តាខេត្តនានាជាប់ព្រំប្រទល់ និងភ្ញៀវទេសចរបរទេស។ ការចាប់ត្រីរួមគ្នា នឹងធ្វើនៅក្នុងបឹងបុរាណមួយដែលមានឈ្មោះថា «ត្រពាំងបឹង» ដែលអ្នកភូមិបានអភិរក្សត្រីមិនឱ្យមានការនេសាទផ្តេសផ្តាសឡើយ ពោលគឺទុកសម្រាប់តែការរៀបចំកម្មវិធីរកត្រីរួមគ្នាក្នុងមួយឆ្នាំម្ដងនេះ ដើម្បីធ្វើពិធីឡើងមាឃផង ឬឡើងអ្នកតារក្សាទឹកដីតាមទំនៀមចាស់បុរាណផង។
ការចាប់ត្រីក្នុងត្រពាំងបឹងនេះទៀតសោធ គេអនុញ្ញាតឱ្យប្រើតែឧបករណ៍នេសាទបែបបុរាណដែលរួមមាន៖ អង្រុត និងឈ្នាង សំណាញ់ ។ល។ ក្រោយពីអ្នកភូមិបង្កោង ធ្វើពិធីចាប់ត្រីរួមគ្នារួចហើយ ទើបអ្នកភូមិផ្សេងមានសិទ្ធិចូលទៅចាប់រកត្រីនៅក្នុងត្រពាំងបឹងនេះបាន។ យ៉ាងណា ពិធីចាប់ត្រីបែបបុរាណ ត្រូវបានអ្នកភូមិធ្វើឡើងក្រោយបញ្ចប់ការងារច្រូតកាត់ និងទុកដាក់ស្រូវក្នុងជង្រុករួចរាល់។ បន្ថែមលើនេះ ពិធីចាប់ត្រីរួមរបស់អ្នកភូមិបង្កោង គណៈកម្មការនឹងកំណត់ជាពីរផ្នែក ដោយមួយផ្នែកប្រជាពលរដ្ឋទាំងអស់ក្នុងភូមិបង្កោង អាចរកត្រីទុកសម្រាប់ខ្លួនឯងផ្ទាល់ និងមួយផ្នែកទៀតនៃបឹង ដែលមានដាក់សម្រាស់ការពារមិនឱ្យចាប់ពីដំបូងនោះ ត្រូវទុកចាប់រួមសម្រាប់ធ្វើជាម្ហូបក្នុងពិធីបុណ្យ។
ដោយទ្បែក ព្រឹត្តិការណ៍ ក្បួនដង្ហែតុក្កតាយក្ស ត្រូវបានធ្វើឡើងដើម្បីលើកស្ទួយសិល្បៈបែបសូន្យរូបឱ្យប្រជាពលរដ្ឋកម្ពុជាទាំងអស់បានឃើញ និងស្គាល់រូបសំណាក់បុគ្គលល្បីៗ ឬរូបសត្វប្រភេទកម្រៗជាច្រើន ដើម្បីថែរក្សាការពារ និងអភិរក្សសត្វកម្រៗជិតផុតពូជ ដែលកំពុងទទួលរងគ្រោះទាំងអស់នោះ។ ចំពោះ ក្បួនដង្ហែតុក្កតាយក្ស នេះ បានចាប់ផ្តើមបង្កើតឡើងនៅឆ្នាំ២០០៧ ដោយសិល្បករជនជាតិអង់គ្លេសមួយក្រុម កម្មវិធីត្រូវបានប្រារព្ធរាល់ឆ្នាំរហូតដល់ឆ្នាំ២០១៨ និងត្រូវបានផ្អាកនៅឆ្នាំ២០១៩ ដល់ឆ្នាំ២០២១ ដោយសារជំងឺកូវីដ-១៩ ប៉ុន្តែបានចាប់ផ្តើមប្រារព្ធឡើងវិញនៅឆ្នាំ២០២២ រហូតមកឆ្នាំ២០២៥នេះ គឺជាឆ្នាំទី១៤ហើយដែលអាជ្ញាធររដ្ឋបាលខេត្តបានរៀបចំ៕
