រាជធានីភ្នំពេញ៖ ក្រោយជួបប្រទះបញ្ហាខ្វះខាតទឹកសម្រាប់ស្រោចស្រព ពេលនេះ ស្រូវស្រែប្រាំងរបស់ប្រជាកសិករនៅខេត្តកណ្ដាល និងតាកែវប្រមាណជិត១ម៉ឺនហិកតា កំពុងត្រូវបានអាជ្ញាធរបូមទឹកអន្តរាគមន៍ជួយសង្រ្គោះ...។

នេះជាការបញ្ជាក់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា កាលពីយប់ថ្ងៃទី២៩មករា ឆ្នាំ២០២៥ ក្រោយបានឆ្មក់ចុះពិនិត្យស្ថានភាពស្រូវស្រែប្រាំងរបស់ប្រជាពលរដ្ឋក្នុងខេត្តទាំងពីរ។ សម្ដេចនាយករដ្ឋមន្រ្តី មានប្រសាសន៍ថា៖«ថ្ងៃនេះឆ្លៀតចុះមើលស្ថានភាពស្រូវប្រាំងរបស់បងប្អូនប្រជាពលរដ្ឋ និងសកម្មភាពអន្តរាគមន៍បូមទឹកសង្គ្រោះស្រូវប្រាំងរបស់ក្រសួងធនធានទឹកនៅស្រុកស្អាង ខេត្តកណ្តាល និងស្រុកព្រៃកប្បាស និងស្រុកបាទី ខេត្តតាកែវ ដោយស្រូវដែលត្រូវបានសង្គ្រោះ និងកំពុងបន្តអន្តរាគមន៍សង្គ្រោះនៅខេត្តទាំងពីរ មានប្រមាណជិត១ម៉ឺនហិកតា»។

ក្រៅពីបានឆ្មក់ចុះពិនិត្យស្ថានភាពទូទៅនៃការអន្តរាគមន៍សង្គ្រោះស្រូវស្រែប្រាំងរបស់ប្រជាពលរដ្ឋ សម្ដេចធិបតីនាយករដ្ឋមន្ត្រី ក៏បានឆ្លៀតចុះពិនិត្យប្រព័ន្ធធារាសាស្ដ្រដែលជាប្រព័ន្ធមានលក្ខណ:ពេញលេញ ​ ធានាការស្រោចស្រពពេញមួយឆ្នាំ​ ដែលមានការចងក្រងជាសហគមន៍​ រៀបចំដោយនាយកដ្ឋានសហគមន៍កសិករប្រើប្រាស់ទឹក​ របស់ក្រសួងធនធានទឹក​ និងឧតុនិយម។ ជាលទ្ធផល​ ប្រជាកសិករអាចបង្កបង្កើនផលបានបីដងក្នុងមួយឆ្នាំ​ ដោយមិនមានការខ្វះខាតទឹកលើផ្ទៃដី២៥០០ហិកតាឡើយ ហើយបាននិងកំពុងពង្រីកបន្ថែមចំនួន​ជាង​៥០០ហិកតាទៀត។ ​ ជាពិសេស នៅមានសល់ទឹកអាចបូមអន្តរាគមន៍សង្គ្រោះស្រូវដែលនៅក្បែរនោះ បានជិត​១ពាន់ហិកតាបន្ថែមទៀតផងដែរ។

ព្រមពេលជាមួយគ្នា ប្រមុខរាជរដ្ឋាភិបាលក៏បានអញ្ជើញឆ្លៀតពិនិត្យវឌ្ឍនភាពនៃការកសាង និងស្តារប្រឡាយលេខ៧៦ ជាកំណាត់មួយនៃប្រព័ន្ធប្រឡាយរំដោះទឹក ដែលសម្ដេចនាយករដ្ឋមន្ត្រី អនុម័តឱ្យធ្វើពីរឆ្នាំកន្លងទៅ។ ប្រឡាយនេះ តភ្ជាប់ពីប្រឡាយ៩៦ និងដើរតួនាទីជួយបញ្ចៀសទឹកពីរាជធានីភ្នំពេញ កាត់បន្ថយការជន់លិចរាជធានី ដោយតភ្ជាប់ពីស្ទឹងព្រែកត្នោតទៅទន្លេបាសាក់។ ក្រៅពីបញ្ចៀសទឹកពីរាជធានីភ្នំពេញ ប្រព័ន្ធប្រឡាយដែលតភ្ជាប់ពីភ្នំឱរ៉ាល់នេះ ក៏នឹងជួយផ្គត់ផ្គង់ទឹកសម្រាប់ប្រជាពលរដ្ឋប្រើប្រាស់ និងស្រោចស្រពដំណាំបានរាប់សែនហិកតា នៅខេត្តកំពង់ស្ពឺ កណ្តាល និងតាកែវ នាពេលខាងមុខផងដែរ៕