ខេត្តកណ្តាល៖ ដី២១៥ឡូតិ៍ ដែលពលរដ្ឋទិញពីក្រុមហ៊ុន 7NG ស្ថិតនៅឃុំវិហារសួគ៌ ស្រុកខ្សាច់កណ្តាល ខេត្តកណ្តាល ត្រូវអាជ្ញាធរអះអាងថា ជាទីតាំងដែលប៉ះពាល់លើគម្រោងផ្លូវហេដ្ឋារចនាសម្ព័ន្ធ ដូច្នេះ អាជ្ញាធរក៏ស្វែងរកទីតាំងដីថ្មីសម្រាប់ដោះដូរ។
ឆ្លើយតបនឹងសំណួររបស់អង្គភាព SBM News តាមប្រព័ន្ធទូរសព្ទ នាថ្ងៃទី២៩មករា ឆ្នាំ២០២៥ លោក ជី ស៊ីវុត្ថា នាយករដ្ឋបាលសាលាខេត្តកណ្តាល បានឱ្យដឹងថា អាជ្ញាធរបានប្រឹងប្រែងរកទីតាំងដីថ្មីដែលមានលក្ខណៈល្អប្រហែលទៅនឹងទីតាំងចាស់ក្នុងការដោះដូរជូនពលរដ្ឋ។ លោកអះអាងថា ទីតាំងថ្មីនោះ អាជ្ញាធររកបានហើយ។ នាយករដ្ឋបាលខេត្តរូបនេះ គូសបញ្ជាក់ថា៖ «[…] ខ្ញុំសុំពិនិត្យតិចដោយសារការងារនេះមាន ឯកឧត្តមអភិបាលរង លោកទទួលបន្ទុកសម្របសម្រួលដឹកនាំ[…] ការងារនេះដោយសារមានផលប៉ះពាល់អស់ហើយ បានរដ្ឋបាលខេត្ត ខិតខំរកទីតាំងណាមួយដែលប្រហាក់ប្រហែល ជាមួយនឹងទីតាំងចាស់ដើម្បីដោះដូរ ដើម្បីឱ្យសមស្របប្រជាពលរដ្ឋអាចទទួលយកបាន[…]។ លោកបន្តថា លោកនឹងពិនិត្យមើលបន្ថែមជាមួយក្រុមការងារ ថាតើមានប្រជាពលរដ្ឋមិនយល់ព្រម ឬមិនពេញចិត្តនឹងការដោះដូរនេះដែរឬទេ ហើយលោកនឹងជម្រាបជូននៅពេលក្រោយទៀត។
ជាមួយគ្នានេះ លោក ឌឹម បូរ៉ា អភិបាលរងខេត្តកណ្ដាល បានអំពាវនាវដល់ប្រជាពលរដ្ឋដែលបានទិញពីក្រុមហ៊ុន 7NG ឱ្យទៅតាមទីតាំងដែលលោកអភិបាលខេត្តបានរៀបចំដោះដូរជូន។ លោកអភិបាលរងខេត្ត មានប្រសាសន៍ថា៖ «[…] ឯកឧត្តមអភិបាលខេត្តលោកបានបង្ហោះលើទំព័រហ្វេសប៊ុកគាត់ ខ្ញុំគិតថាជាព័ត៌មានមួយអាចគ្រប់គ្រាន់ […] សូមឱ្យប្រជាពលរដ្ឋគាត់មកទទួលពត៌មានតាមអ្វីដែល ឯកឧត្តមលោកបានធ្វើការសម្របសម្រួល ហើយនឹងអញ្ជើញអ្នកដែលមានប៉ុន្មានទ្បូតិ៍ហ្នឹង[…]។
គួរដឹងថា កាលពីថ្មីៗនេះ រដ្ឋបាលខេត្តកណ្តាល បានចេញសេចក្តីជូនដំណឹងដល់ប្រជាពលរដ្ឋដែលបានទិញដីទាំង២១៥ឡូតិ៍ពីក្រុមហ៊ុន 7NG ស្រុកខ្សាច់កណ្តាល ខេត្តកណ្តាល អំពីការប៉ះពាល់លើគម្រោងផ្លូវហេដ្ឋារចនាសម្ព័ន្ធ (ផ្លូវ៦០ម៉ែត្រ)។ រដ្ឋបាលខេត្តកណ្តាល ស្នើឱ្យប្រជាពលរដ្ឋ យកឯកសារមកពិនិត្យ និងផ្ទៀងផ្ទាត់លើដីឡូតិ៍របស់ខ្លួន ដែលរដ្ឋបាលខេត្តបានសម្របសម្រួលជាមួយក្រុមហ៊ុន ដើម្បីរៀបចំផ្លាស់ប្តូរជូននូវទីតាំងដីឡូតិ៍ថ្មីទាំង២១៥ឡូតិ៍ ស្ថិតនៅភូមិព្រៃចាស់ ឃុំវិហារសួគ៌ និងភូមិសន្លុង ឃុំសន្លុង ស្រុកខ្សាច់កណ្តាល ខេត្តកណ្តាល។ ការយកឯកសារពាក់ព័ន្ធមកពិនិត្យ និងផ្ទៀងផ្ទាត់ ដើម្បីទទួលយកដីឡូតិ៍ថ្មី គឺអនុវត្ត ចាប់ពីថ្ងៃទី៣កុម្ភៈ រហូតដល់ថ្ងៃទី១៨កុម្ភៈ ឆ្នាំ២០២៥ នៅទីស្នាក់ការរបស់ក្រុមហ៊ុន 7NG៕
