រាជធានីភ្នំពេញ៖​​ ដើមឈើកម្រចំនួន៥ប្រភេទនៅកម្ពុជា ដែលអង្គភាពសារព័ត៌មាន​​ SBM News លើកយកមកជម្រាបជូនដល់លោកអ្នកអានឱ្យបានដឹងនាពេលនេះរួមមាន​​ ដើមគ្រញូង ដើមនាងនួន ដើមបេង​ ដើមធ្នង់ និងដើមច្រេស…។

តាមការបង្ហោះរបស់ផេកឈ្មោះ​​ អេកូយុវទូត បានឱ្យដឹងថា ដើមគ្រញូង ជាទូទៅមានពណ៌ក្រហមឆ្នូតលាយជាមួយពណ៌-ស ឬក្រមៅ​​ ហើយឈើមានសាច់រឹង និងម៉ត់ មានកម្ពស់ប្រមាណ២០ទៅ៣០ម៉ែត្រ។ ក្នុងនោះគ្រញូងមាន២ប្រភេទរួមមាន៖ ទី១. គ្រញូងដែក និងទី២.គ្រញូងឈាមមាន់។ ចំពោះឈើគ្រញូងឈាមមាន់​ មានកម្ពស់ចាប់ពី៨ទៅ៣០ម៉ែត្រ។ ឈើគ្រញូង ជាប្រភេទរុក្ខជាតិដែលមានអាយុកាលរាប់រយឆ្នាំមានខ្លឹមរឹង​ អាចឱ្យគេយកទៅកែច្នៃជាគ្រឿងសង្ហារឹម គ្រឿងលម្អ និងវត្ថុស័ក្តិសិទ្ធិ តាមជំនឿ ដូច្នេះហើយទើបជាវាជារុក្ខជាតិដែលក្រុមអ្នករកស៊ីឈើចង់បានបំផុត។​​ ចំពោះ​​ ដើមនាងនួន មានកម្ពស់ចាប់ពី១៥ ទៅ៣០ម៉ែត្រ មានសណ្ឋានសាច់ឈើពណ៌ក្រមៅ បណ្តូលក្រាស់ ពណ៌ប្រផេះ ឬស្វាយលាយក្រហមឆ្នូតៗ។ ផ្លែវាមានរាងសំប៉ែតហើយមានផ្ទុកគ្រាប់ពី១ទៅ២គ្រាប់។ ស្លឹកពណ៌បៃតងចាស់រាងពងក្រពើដុះឆ្លាស់គ្នា ផ្កាវាពណ៌ស្វាយតូចៗនៅក្នុងកញ្ចុំផ្កា ហើយវាប្រែពីពណ៌ស្វាយទៅជាពណ៌ផ្កាឈូក បន្ទាប់មកទៅជាពណ៌-សនៅពេលរីក និងចាស់។

វាច្រើនដុះក្នុងព្រៃធំហើយជ្រុះស្លឹកនៅរដូវប្រាំង។ ដើមនាងនួន គេច្រើនយកមកធ្វើជាក្ដារងឿ តុ ទូ ជាគ្រឿងសង្ហារឹម និងយកសង់ផ្ទះ។ អ្វីដែលពិសេសឈើប្រភេទនេះ ប្រើកាន់តែយូរៗទៅ មានភាពរលោងស្អាតតែម្ដង។ រីឯដើមបេង មានកម្ពស់ពី១២ ទៅ៣០ម៉ែត្រ មានខ្លឹមរឹងពណ៌ក្រហម វាបន្តពូជដោយគ្រាប់។ ស្លឹកវារួមដុះឆ្លាស់ទង ផ្កាមានពណ៌-ស ក្រហម ឬលឿង ទៅតាមពូជ និងទឹកដី ផ្លែមានរាងស្រដៀងនឹងផ្លែអំពិលក្ដារ តែខ្លីហើយសំប៉ែតជាងបន្តិច។ ដើមបេង ដុះដោយខ្លួនឯងតាមតំបន់ភ្នំ ព្រៃរបោះ។ ប្រភេទឈើបេងត្រូវបានរកឃើញដុះនៅក្នុងប្រទេស កម្ពុជា ឡាវ ថៃ វៀតណាម និងភូមា។ នៅប្រទេសកម្ពុជា ឈើប្រភេទនេះរងនូវការគំរាមកំហែងយ៉ាងធ្ងន់ធ្ងរ និងឈានទៅរកការបាត់បង់យ៉ាងឆាប់រហ័សដោយសារការធ្វើអាជីវកម្មហួសកម្រិត។ ដើមបេង​​ ក៏ត្រូវបានចាត់ចូលទៅក្នុងបញ្ជីនៃប្រភេទឈើដែលរងគ្រោះថ្នាក់របស់អង្គការ IUCN (World List of Threatened Trees)។  

រីឯដើមធ្នង់ បន្តពូជដោយគ្រាប់​​ អាចមានកម្ពស់ពី១៥ទៅ៣០ម៉ែត្រ វាមានក្លិនប្រហើរ សាច់ជាប់ស្អិតជាងគ្រញូង ស្លឹកវារួមស្លាបសេស ដុះឆ្លាស់ទងកូនស្លឹករាងពងក្រពើ ផ្កាចេញពីប្រគាបស្លឹកផ្លែវារាងសំប៉ែតមានបន្ទះស្លាប ជុំវិញវាច្រើនដុះនៅក្នុងព្រៃ។ បើតាមសៀវភៅ មគ្គុទេសក៍ស្តីពីបន្លែនៅកម្ពុជា​​ បានឱ្យដឹងថា​​ ដើមច្រេស មានកម្ពស់ចាប់ពី ១៥ទៅ២០ម៉ែត្រ ឬអាចដល់៣០ម៉ែត្រ ស្លឹករាងពងក្រពើដុះទល់ទងគ្នាមានពី៦ទៅ៨គូ។ សម្បកវាគគ្រើម ផ្នែកខាងគល់មានពណ៌ត្នោតប្រផេះ ផ្នែកខាងលើក៏មានពណ៌ប្រផេះដូចគ្នា ផ្កាវាចេញនៅប្រគាបស្លឹកចុងមែក។ គេនិយមដាំវានៅជិតភូមិ ឬតាមមាត់ផ្លូវដើរ ដើម្បីយកធ្វើជាម្លប់ជ្រកផងដែរ។ ស្លឹកធ្វើជាបន្លែសម្រាប់បង់ក្នុងសម្លកកូរ ផ្កាច្រេសអាចព្យាបាលជំងឺបូស ឬដំបៅផ្សេងៗ ស្លឹកព្យាបាលក្អក សម្បកឈើអាចព្យាបាលរាកមួល៕