រាជធានីភ្នំពេញ៖ ផលិតផលសរុប ឬពាក្យបច្ចេកទេស ដែលគេនិយមហៅកាត់ថា ជីឌីភី (GDP) សម្រាប់ប្រជាជនម្នាក់ៗ ក្នុងខេត្តកំពង់ចាម មានចំនួន២៣១១ដុល្លារ កាលពីឆ្នាំ២០២៤។ មានន័យថា ប្រជាជនក្នុងខេត្តកំពង់ចាមម្នាក់ រកចំណូលបានជាមធ្យម ចំនួន២៣១១ដុល្លារ ក្នុងរយៈពេលពេញ១ឆ្នាំនៃឆ្នាំ២០២៤ ឬស្មើនឹង១៩២ដុល្លារក្នុង១ខែ។ របាយការណ៍អំពីប្រាក់ចំណូលរបស់ប្រជាជនក្នុងខេត្តកំពង់ចាមសម្រាប់ឆ្នាំ២០២៤ ត្រូវបានអានដោយលោក អ៊ុន ចាន់ដា អភិបាលខេត្តកំពង់ចាម ក្នុងពិធីរម្លឹកខួប៤៦ឆ្នាំនៃទិវាជ័យជម្នះ៧មករា ដែលត្រូវបានរៀបចំឡើងក្នុងសួនវិមានឯករាជ្យក្រុងកំពង់ចាម នាព្រឹកថ្ងៃទី៧ ខែមករា ឆ្នាំ២០២៥។

លោក អ៊ុន ចាន់ដា លើកឡើងដោយផ្អែកតាមរបាយការណ៍ថា នៅឆ្នាំ២០២៤ សេដ្ឋកិច្ចក្នុងខេត្តកំពង់ចាម ដែលគិតជាទឹកប្រាក់ មានទំហំជាង២៦០០លានដុល្លារ ដោយក្នុងនោះ វិស័យកសិកម្ម មានទំហំជាង១០០០លានដុល្លារ វិស័យឧស្សាហកម្ម មានទំហំជាង៨០០លានដុល្លារ និងវិស័យសេវាកម្ម មានទំហំជាង៧០០លានដុល្លារ។ លោកថែមទាំងអះអាងថា តាមការរំពឹងទុក នៅឆ្នាំ២០២៥ ទំហំសេដ្ឋកិច្ចក្នុងខេត្តកំពង់ចាម នឹងកើនដល់ជាង២៨០០លានដុល្លារ ​ ហើយផលិតផលសរុប ឬប្រាក់ចំណូលជាមធ្យមសម្រាប់ប្រជាជនម្នាក់ៗ នឹងកើនដល់២៤៧៨ដុល្លារ ក្នុងឆ្នាំ២០២៥នេះ។  

លោកអភិបាលខេត្តបន្តថា​ ក្នុងឆ្នាំ២០២៤កន្លងទៅនេះ ខេត្តរបស់លោក ទទួលបានគម្រោងអភិវឌ្ឍន៍ផ្លូវក្រាលកៅស៊ូ ចំនួន២៧ខ្សែ ដែលមានប្រវែងជាង១០០គីឡូម៉ែត្រ និងផ្លូវ​បេតុង​ជាង២០០ខ្សែ ដែលប្រវែងជិត៩០គីឡូម៉ែត្រ។ នៅមានសមិទ្ធផលផ្សេងទៀត ដែលលោករំលេចឡើងក្នុងពិធីខាងលើ ដូចជា ការកសាងទីលានទុកដាក់សំរាម គម្រោងសាងសង់ប្រព័ន្ធលូ និងគម្រោងទឹកស្អាត ជាដើម៕

រូបពីរដ្ឋបាលខេត្តកំពង់ចាម