ខេត្តបាត់ដំបង៖ ជនអនាមិកមួយក្រុមបាននិងកំពុងធ្វើសកម្មភាពបោកបញ្ឆោតទៅលើសមាជិកអតីតមន្ត្រីនគរបាលជាតិ និងសមាគមអតីតយុទ្ធជនកម្ពុជាខេត្តបាត់ដំបងដែលបានចូលនិវត្តន៍ ដោយបង្គាប់ឱ្យផ្ទេរប្រាក់ទៅពួកគេ។ យ៉ាងណា ជុំវិញករណីខាងលើ ក្រុមការងារព័ត៌មាន និងប្រតិកម្មរហ័ស បញ្ជាក់ថា សមត្ថកិច្ចជំនាញបាននិងកំពុងធ្វើការស៊ើបអង្កេតយ៉ាងក្ដៅគគុកចំពោះករណីនេះ...។
ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តបាត់ដំបង នៅព្រឹកថ្ងៃសៅរ៍ទី១៤ ខែធ្នូ ឆ្នាំ២០២៤ បានគូសបញ្ជាក់យ៉ាងដូច្នេះថា៖«ថ្មីៗនេះមានករណីជនអនាមិក បានទាក់ទងតាមប្រព័ន្ធទូរសព្ទទៅកាន់និវត្តន៍ជនដែលជាសមាជិកសមាគមមិត្តនគរបាលជាតិកម្ពុជា (ស.ម.ន) និងសមាគមអតីតយុទ្ធជនកម្ពុជាខេត្តបាត់ដំបង (ស.អ.ក) ដោយបានធ្វើសកម្មភាពបោកបញ្ឆោតឱ្យសមាជិកទាំងនោះ ធ្វើការផ្ទេរប្រាក់ទៅឱ្យពួកគេ។ ករណីខាងលើនេះ ស្នងការដ្ឋាននគរបាលខេត្តបាត់ដំបង កំពុងបើកការស៊ើបអង្កេតយ៉ាងយកចិត្តទុកដាក់បំផុត និងសូមលោក-លោកស្រីជាសមាជិកទាំងអស់បញ្ឈប់ការផ្ទេរប្រាក់ទាំងនោះ ដើម្បីចៀសវាងខាតបង់ទ្រព្យសម្បត្តិ ប្រាក់កាសផ្ទាល់ខ្លួន។»
បន្ថែមលើនេះ ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលខេត្តបាត់ដំបង បញ្ជាក់ថា ជនអនាមិក បានបញ្ជាឱ្យភាគីជនរងគ្រោះផ្ទេរប្រាក់ ទៅពួកគេតាមមធ្យោបាយផ្សេងៗ ដោយប្រាប់ថា ពួកគេគឺជាអ្នកទទួលបង់ប្រាក់ សមាគម (ស.ម.ន) ឬ(ស.អ.ក) ប្រចាំខែ ឬប្រចាំឆ្នាំ។ សកម្មភាពខាងលើ គឺជាសកម្មភាពបោកប្រាស់ពីសំណាក់ជនខិលខូចសុទ្ធសាធ ដែលចាំបាច់តម្រូវឱ្យក្រុមការងារព័ត៌មាន និងប្រតិកម្មរហ័ស ជូនព័ត៌មានជាពិសេសដល់លោក-លោកស្រីជាសមាជិកសមាគម បានជ្រាប និងមានការប្រុងប្រយ័ត្នខ្ពស់ចំពោះករណីខាងលើនេះ។ ចំពោះលេខទូរសព្ទរបស់ជនខិលខូចទាំងនោះ សមត្ថកិច្ចបាននិងកំពុងធ្វើការស្រាវជ្រាវស្វែងរកអត្តសញ្ញាណរបស់ពួកគេជាបណ្តើរៗហើយ៕
