រាជធានីភ្នំពេញ៖ តារាចម្រៀង លោក ព្រាប សុវត្ថិ ត្រូវបានសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា សម្រេចបញ្ចប់មុខតំណែងជា«វរសេនីយ៍ឯក» ក្នុងក្របខ័ណ្ឌនៃកងយោធពលខេមរភូមិន្ទ។ ការបញ្ចប់តំណែងនេះ ត្រូវបានគេកត់សម្គាល់ថា ចួនចំពេលកំពូលតារាចម្រៀងប្រុសរូបនេះ ទើបតែទម្លាក់MVថ្មីមានចំណងជើងថា «សែកមន្ត» ដែលទទួលរងនូវការរិះគន់ពីមហាជនយ៉ាងចាស់ដៃ..។

យោងតាមអនុក្រឹត្យការលាលែងចេញពីក្របខ័ណ្ឌនៃកងយោធពលខេមរភូមិន្ទ ត្រូវបានសម្ដេចធិបតី​ នាយករដ្ឋមន្ត្រីកម្ពុជា ឯកភាព កាលពីថ្ងៃទី៥ ខែធ្នូ ឆ្នាំ២០២៤ គូសរំលេចថា៖«ត្រូវបានលាលែងចេញពីក្របខ័ណ្ឌ នៃកងយោធពលខេមរភូមិន្ទ ដោយសុំរក្សាទុកគោរមងារ ជា ឧកញ៉ា ដល់ វរសេនីយ៍ឯក ព្រាប សុវត្ថិ អត្តលេខ ០៤៨៦៩៤ នាយរង ការិយាល័យទី៥ កងទ័ពជើងគោក»។ លោក ព្រាប សុវត្ថិ ត្រូវបានគេដឹងថា ​បានដាក់​ពាក្យ​បម្រើកងទ័ពតាំងតែពីឆ្នាំ១៩៩១ អំឡុងពេលកំពុងសិក្សាថ្នាក់បរិញ្ញាតបត្រ។ ក្រោយមកនៅ​ឆ្នាំ១៩៩២ លោក​បាន​ចូលធ្វើ​ទាហាននៅ​អគ្គស្នងការ​នយោបាយ ក្នុងអំឡុងពេលបម្រើការងារនោះ លោកតែងឧស្សាហ៍ឡើង​ច្រៀង​ក្នុង​កម្ម​វិធី​ជប់លៀងផ្សេងៗ។

ដោយសារសំឡេងមានទឹកដម លោក ព្រាប សុវត្ថិ ក៏ត្រូវបាន​មិត្ត​ភ​ក្ដិណែនាំឱ្យទៅ​ចេញ​ច្រៀង​តាម​រង្គសាល ​ភោជនីយដ្ឋាន​ផ្សេងៗជាច្រើន​​ បាន​​១​ឆ្នាំលោក​ក៏បាន​ទៅ​ច្រៀង​ឱ្យ​ផលិតកម្ម ក្នុងស្រុកមួយនា​ឆ្នាំ១៩៩៥ ពេលនោះ​ហើយ​ ដែលលោកបាន​បោះ​ជំហាន​ឈាន​ចូល​ក្នុង​វិស័យ​សិ​ល្បៈ​យ៉ាង​ពេញ​លេញ។ ក្រោយប្រកបអាជីពជាច្រើនឆ្នាំ និងបានចូលរួមឧបត្ថម្ភថវិកាដល់សង្គមជាតិ តារាចម្រៀងរូបនេះ ក៏ត្រូវបានព្រះមហាក្សត្រផ្ដល់គោរមងារជា ឧក​ញ៉ា នៅថ្ងៃទី២៩ ខែមេសា ឆ្នាំ២០២២។ 

ជាការកត់សម្គាល់ ក្រោយមានងារជា ឧក​ញ៉ា និងប្ដូរទ្រនំថ្មី តារាប្រុសរូបនេះតែងត្រូវបានមហាជនរិះគន់ជាញឹកញាប់ តាមរយៈការលេងស្ទីលសម្លៀកបំពាក់ ក៏ដូចជាការចេញបទចម្រៀងមួយចំនួន។ ជាក់ស្តែង កាលពីពេលថ្មីៗ កំពូលតារាចម្រៀងប្រុសរូបនេះ បានទម្លាក់ MV បទថ្មីមានចំណងជើងថា «សែកមន្ត»។ តាមរយៈបទនោះ ធ្វើឱ្យមហាជនជាច្រើនសម្ដែងការមិនពេញចិត្ត និងរិះគន់ទៅលើលោកឥសំចៃមាត់។ បន្ទាប់ពីរងការិះគន់ ក្រោយមកបទចម្រៀងនោះ ក៏ត្រូវបានលុបចោល ហើយផ្សព្វផ្សាយសាជាថ្មីបន្ទាប់ពីមានការកែសម្រួលឡើងវិញ៕