រដ្ឋធានីវៀងចន្ទន៍៖ ឥណ្ឌាបានរាយការណ៍ពីការខាតបង់ផ្នែកហិរញ្ញវត្ថុដ៏ច្រើនសន្ធឹកសន្ធាប់ជុំវិញការឆបោកតាមប្រព័ន្ធឌីជីថលក្នុងរយៈពេល៤ខែដំបូងនៃឆ្នាំ២០២៤នេះ ខណៈករណីឆបោកទាំងនេះបានដំណើរការដោយបណ្តាញឧក្រិដ្ឋកម្មតាមប្រព័ន្ធអ៊ីនធឺណិតដែលមានមូលដ្ឋាននៅប្រទេសឡាវ មីយ៉ាន់ម៉ា និងកម្ពុជា។ នេះបើតាមការចុះផ្សាយដោយសារព័ត៌មានឡាវ The Laotian Times នៅថ្ងៃអង្គារទី២៩ខែតុលា។

យោងតាមរបាយការណ៍ខែឧសភា មជ្ឈមណ្ឌលសម្របសម្រួលឧក្រិដ្ឋកម្មតាមអ៊ីនធឺណិតឥណ្ឌា (I4C)  ពលរដ្ឋឥណ្ឌាបានខាតបង់ទឹកប្រាក់ប្រហែល ១៤,៤លានដុល្លារអាម៉េរិក ចំពោះការចាញ់បោកតាមប្រព័ន្ធឌីជីថល។ ប្រភេទនៃការបោកប្រាស់ផ្សេងទៀតក៏បានបណ្តាលឱ្យមានការខាតបង់យ៉ាងច្រើនសន្ធឹកសន្ធាប់ផងដែរ រួមទាំងការបោកប្រាស់ពាណិជ្ជកម្ម ការវិនិយោគ និងការបោកប្រាស់តាមរយៈស្នេហា។ ការរកឃើញរបស់ I4C បង្ហាញថា ចាប់ពីខែមករា ដល់ខែមេសា ប្រជាជនឥណ្ឌាខាតបង់ទឹកប្រាក់សរុបប្រហែល ២១០លានដុល្លារអាម៉េរិក ដែលមានប្រភពមកពីឧក្រិដ្ឋកម្មតាមអ៊ីនធឺណិត ដែលកំពុងប្រតិបត្តិការចេញពីប្រទេសឡាវ មីយ៉ាន់ម៉ា និងកម្ពុជា។ និន្នាការ​នេះ​បាន​ជំរុញ​ឱ្យ​មាន​កិច្ច​ពិភាក្សា​ក្នុង​តំបន់​លើ​ការ​បង្កើន​កិច្ច​ខិត​ខំ​ប្រឹង​ប្រែង​ការពារ​ឧក្រិដ្ឋកម្ម​តាម​អ៊ីនធឺណិត​ឆ្លង​កាត់​ព្រំដែន​ទាំង​នេះ។

នាយករដ្ឋមន្ត្រីឥណ្ឌា លោក ណារិនឌ្រា ម៉ូឌី(Narendra Modi) បានគូសបញ្ជាក់ពីការគំរាមកំហែងឧក្រិដ្ឋកម្មតាមអ៊ីនធឺណិតដែលកំពុងកើនឡើង ហើយលោកបានជំរុញឱ្យសាធារណជនរក្សាការប្រុងប្រយ័ត្ន។ នាយករដ្ឋមន្រ្តីរូនេះក៏​បាន​ចែករំលែក​ឃ្លីប​សំឡេង​នៃ​ការ​ឆបោក​ដែល​អ្នក​បោកប្រាស់​បន្លំ​ក្លែង​ខ្លួន​ជា​មន្ត្រី​ប៉ូលិស​ដើម្បី​ទាមទារ​លេខសម្គាល់ផ្ទាល់ខ្លួន Aadhaar របស់​ជនរងគ្រោះ។ លោក ម៉ូឌី បានសង្កត់ធ្ងន់ថា ៖«សំឡេងនេះគឺជាការព្រមានដ៏ធ្ងន់ធ្ងរ មិនមែនជាការកម្សាន្តទេ ប៉ុន្តែនេះជាឧបាយកលបោកប្រាស់»។ ដើម្បីដោះស្រាយការកើនឡើងនៃការគំរាមកំហែងការក្លែងបន្លំតាមអ៊ីនធឺណិតរីកដូចផ្សិតនេះ រដ្ឋាភិបាលឥណ្ឌាបានបើកដំណើរការបណ្តាញជំនួយឧក្រិដ្ឋកម្មតាមអ៊ីនធឺណិតថ្នាក់ជាតិ ដែលអនុញ្ញាតឱ្យពលរដ្ឋរាយការណ៍អំពីឧប្បត្តិហេតុនៃការក្លែងបន្លំហិរញ្ញវត្ថុ៕