រាជធានីភ្នំពេញ៖ លោក ប៉ែន បូណា ប្រធានអង្គភាពអ្នកនាំពាក្យរាជរដ្ឋាភិបាល ហាក់មិនជឿសោះឡើយថា នៅកម្ពុជា អាចមាននរណាផ្សេង ធ្វើកិច្ចការពាក់ព័ន្ធនឹងការលើកកម្ពស់សិទ្ធិមនុស្សលើស សម្តេចតេជោ ហ៊ុន សែន និងគណបក្សប្រជាជនកម្ពុជា ជាគណបក្សដឹកនាំរាជរដ្ឋាភិបាល។ ក្នុងវីដេអូឃ្លីបមួយ ដែលបង្ហោះលើទំព័រហ្វេសប៊ុករបស់អង្គភាពអ្នកនាំពាក្យរាជរដ្ឋាភិបាល លោក ប៉ែន បូណា ចោទសួរក្នុងន័យចង់ឃើញមុខយ៉ាងដូច្នេះថា៖«តើនរណា ដែលបានធ្វើរឿងសិទ្ធិមនុស្សសំខាន់ជាងសម្តេច តេជោហ៊ុន សែន និងគណបក្សប្រជាជនកម្ពុជា? សូមចេញមុខមក និយាយឱ្យខ្ញុំស្តាប់» ហើយលោកក៏ឆ្លើយខ្លួនឯឯថា «អត់មានទេ»។

លោក ប៉ែន បូណា បានរម្លឹកស្នាដៃរបស់សម្តេចតេជោ ហ៊ុន សែន ក្នុងការរំដោះជីវិតប្រជាពលរដ្ឋខ្មែរចេញពីសង្គ្រាម ដោយលោកចាត់ទុកការរំដោះជីវិតនេះ ថាជាសិទ្ធិមូលដ្ឋានដ៏សំខាន់សម្រាប់មនុស្ស។ ចំពោះអ្នកនាំពាក្យរូបនេះ ការផ្ដល់សុខសន្តិភាព ការទប់ស្កាត់មិនឱ្យសង្គ្រាមវិលមកវិញ និងការអភិវឌ្ឍឱ្យប្រជាពលរដ្ឋមានជីវភាពល្អប្រសើរ សុទ្ធសឹងជាសិទ្ធិមនុស្ស។ លោកបន្តថា ការដាក់ទិសដៅរបស់រាជរដ្ឋាភិបាលក្នុងការអភិវឌ្ឍកម្ពុជាឱ្យក្លាយជាប្រទេសមានចំណូលខ្ពស់នៅឆ្នាំ២០៥០ ដើម្បីលើកតម្កើងសិទ្ធិរស់នៅ និងសេចក្តីថ្លៃថ្នូររបស់ប្រជាពលរដ្ឋ ក៏ជាសិទ្ធិមនុស្សដែរ។

ក្នុងវីដេអូខាងលើ លោក ប៉ែន បូណា បកស្រាយជុំវិញកិច្ចព្រមព្រៀងសន្តិភាពទីក្រុងប៉ារីស ស្របពេលខួប៣៣ឆ្នាំ នៃកិច្ចព្រមព្រៀងប្រវត្តិសាស្ត្រមួយនេះ បានមកដល់ នៅថ្ងៃទី២៣ ខែតុលា ឆ្នាំ២០២៤នេះ។ អ្នកនាំពាក្យរាជរដ្ឋាភិបាល បកស្រាយជាហូរហែពីរឿងកិច្ចព្រមព្រៀងសន្តិភាពទីក្រុងប៉ារីស ហើយការបកស្រាយរបស់លោកក៏ឈានដល់រឿងសិទ្ធិមនុស្សផងដែរ។ ជាមួយគ្នានេះ លោកបានទៅចូលរួមធ្វើជាវាគ្មិនក្នុងកិច្ចពិភាក្សាជាមួយទូរទស្សន៍ប៊ីធីវី (BTV) លើប្រធានបទស្តីពីកិច្ចព្រមព្រៀងសន្តិភាពទីក្រុងប៉ារីស។ ត្រង់ឃ្លីបមួយក្នុងកិច្ចពិភាក្សា លោក បានចោទសួរម្ដងទៀត ដូចគ្នាបេះបិទ ទៅនឹងសំណួរដែលលោកចោទសួរក្នុងវីដេអូបង្ហោះ ដោយអង្គភាពរាជរដ្ឋាភិបាល។

«ខ្ញុំចោទសួរម្ដងហើយម្ដងទៀត នរណាគេដែលធ្វើរឿងសិទ្ធិមនុស្សធំជាងគេ ប្រៀបបាននឹងសម្តេចតេជោ ហើយនិងគណបក្សប្រជាជនកម្ពុជា? សូមអញ្ជើញឆ្លើយ ហើយមកជជែកគ្នា..បង្ហាញមក! អត់មានទេ» នេះជាការចោទសួរជាថ្មីរបស់លោក។ លោកប្រាប់ថា ធ្លាប់ឮការរិះគន់លើរាជរដ្ឋាភិបាល ពីការអនុវត្តមិនបានល្អលើរឿងសិទ្ធិមនុស្សនេះ ដូច្នេះហើយ ទើបបានជាលោកចោទសួរសំណួរនេះឡើងជាដដែលៗ។ រីឯ ការលើកឡើងពីរឿងរំដោះជីវិតប្រជាពលរដ្ឋ ក៏ដូចគ្នាស្ទើរទាំងស្រុងដែរ ទៅនឹងការលើកឡើងរបស់លោកលើកមុន។ ក្នុងពេលជាមួយគ្នានេះ អ្នកនាំពាក្យបានថ្លែងការពាររាជរដ្ឋាភិបាលថា កិច្ចព្រមព្រៀងសន្តិភាពទីក្រុងប៉ារីស ត្រូវបានគោរព និងអនុវត្តបានយ៉ាងល្អ៕