រដ្ឋធានីហាណូយ៖ ប្រមុខបក្សកុម្មុយនីស្ដវៀតណាមថ្មី លោក តូ ឡាំ បានប្រាប់សភានៅថ្ងៃចន្ទទី២១តុលា ឱ្យបន្តបោះជំហានកាន់តែរឹងត្អឹង ជំរុញការប្រឆាំងនឹងអំពើពុករលួយ ខណៈរបបកុម្មុយនីស្ដមួយនេះ កំពុងបោសសម្អាតអំពើពុករលួយ បង្កឱ្យរង្គោះរង្គើរពេញផ្ទៃប្រទេស...។
លោក តូ ឡាំ បានចូលកាន់តំណែងជាអគ្គលេខាធិការបក្សកុម្មុយនីស្ដវៀតណាម ក្នុងខែសីហា ក្រោយ លោក ង្វៀន ភូចុង ទទួលមរណភាព ខណៈក្បាលម៉ាស៊ីនថ្មីរូបនេះ បានថ្លែងសុន្ទរកថាជាលើកដំបូងរបស់លោក នៅថ្ងៃចន្ទទី២១តុលា ក្នុងនាមជាមេដឹកនាំកំពូលទៅកាន់ប្រតិភូរដ្ឋសភា។ ការបោសសម្អាតប្រឆាំងអំពើពុករលួយដ៏ខ្លាំងក្លាបានចាប់ផ្តើមដោយបុរសខ្លាំង ង្វៀន ភូចុង។ លោក ឡាំ បានបន្តការជំរុញការបង្ក្រាបអំពើពុករលួយឥតទម្លាក់ដៃ ខណៈអ្នកវិភាគអះអាងថា លោកបានប្រើការបោសសម្អាតអំពើពុករលួយនេះជាអាវុធនយោបាយ ដើម្បីកម្ចាត់គូប្រជែង។ សូមរំឭកថា លោក ឡាំ ជាអនុប្រធានគណៈកម្មាធិការដឹកនាំប្រឆាំងអំពើពុករលួយ មុនពេលតែងតាំងជាអគ្គលេខាធិការនៅខែសីហា។
បច្ចុប្បន្ន លោក ឡាំ កាន់តួនាទីជាអគ្គលេខាធិការ ជាមុខតំណែងដ៏សំខាន់បំផុតរបស់វៀតណាម ក្នុងរចនាសម្ព័ន្ធដឹកនាំដែលមានសសរស្តម្ភទាំងបួន។ នៅពេលចាប់ផ្តើមសម័យប្រជុំនៃសភាជាតិរបស់ប្រទេស លោក ឡាំ បានអំពាវនាវឱ្យសមាជិកសភារឹតបន្តឹងវិន័យ ដើម្បីប្រយុទ្ធប្រឆាំងនឹងបាតុភូតអវិជ្ជមាន។ ប្រធានចៅក្រមវៀតណាម លោក លី មិញទ្រី (Le Minh Tri) បានឱ្យដឹងកាលពីសប្តាហ៍មុនថា មនុស្សជាង១ម៉ឺននាក់ ត្រូវបានកាត់ទោសនៅក្នុងការកាត់ក្ដីប្រហែល៤៨០០ករណី ជាផ្នែកមួយ នៃការប្រយុទ្ធប្រឆាំងអំពើពុករលួយដ៏តឹងរឹងបំផុត៕
