រាជធានីភ្នំពេញ៖ «ចំណេះ» តែម្យ៉ាងនៅមិនទាន់គ្រប់គ្រាន់ឡើយសម្រាប់ប្រជាជនម្នាក់ៗ។ ដើម្បីក្លាយជាប្រជាជនល្អក្នុងសង្គមបាន គឺត្រូវទាមទារឱ្យមានលក្ខណសម្បត្តិដ៏សំខាន់មួយទៀតបន្ថែមពីលើចំណេះដឹង នោះគឺ «ចរិយាធម៌»។ លោកឧបនាយករដ្ឋមន្រ្តី ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានប្រាប់អ្នកកាសែតថា ក្នុងវិស័យអប់រំកម្ពុជា រាជរដ្ឋាភិបាល បានយកចិត្តទុកដាក់លើការអប់រំផ្នែកចំណេះដឹងផង និងផ្នែកចរិយាធម៌ផង។

ដូចរាល់ឆ្នាំ លោកលោកឧបនាយករដ្ឋមន្រ្តី និងជារដ្ឋមន្រ្តីក្រសួងអប់រំ រួមនឹងមន្រ្តីពាក់ព័ន្ធផ្សេងទៀត បានទៅបើកវិញ្ញាសាសម្រាប់ការប្រឡងមធ្យមសិក្សាទុតិយភូមិ (បាក់ឌុប) នៅមណ្ឌលប្រឡងវិទ្យាល័យព្រះស៊ីសុវត្ថិ (រាជធានីភ្នំពេញ) នាព្រឹកថ្ងៃទី៨ ខែតុលា ឆ្នាំ២០២៤នេះ ហើយក្រោយចេញពីការបើកវិញ្ញាសា លោក បានធ្វើសន្និសីទខ្លីជាមួយក្រុមអ្នកកាសែត។ បេក្ខជនបាក់ឌុបជាង១៣ម៉ឺននាក់នៅទូទាំងប្រទេស ចាប់ផ្តើមប្រឡង នៅព្រឹកថ្ងៃទី៨ ខែតុលានេះ ហើយនឹងត្រូវបញ្ចប់នៅរសៀលថ្ងៃទី៩ ខែតុលា។

លោករដ្ឋមន្រ្តីអប់រំ ថ្លែងទៅកាន់អ្នកកាសែតថា ការអប់រំ ត្រូវមានចំណេះដឹង សមត្ថភាព បំណិន បូករួមទាំងចរិយាមារយាទ ដើម្បីក្លាយជាប្រជាជនល្អក្នុងការជួយកសាងប្រទេសជាតិ។ លោក ពន្យល់ពីសារសំខាន់នៃចំណេះ និងចរិយាធម៌ដែលមិនអាចខ្វះមួយណាបាន យ៉ាងដូច្នេះថា៖«[..] បើមានត្រឹមចំណេះដឹង តែមិនមានចរិយាធម៌ ឥរិយាបថល្អ គាត់អាចក្លាយជា ឧក្រិដ្ឋជន ឬភេរវករ»។ លោក បានលើកឧទាហរណ៍ថា ប្រទេសខ្លះ មានបញ្ហាសណ្តាប់សង្គម និងជួបការហិនហោច ដោយសារតែមានភេរវករ។

និយាយឱ្យស្រួលយល់ ចរិយាធម៌ គឺសំដៅលើចរិតល្អ និងការប្រព្រឹត្តអំពើល្អក្នុងសង្គម ដោយមិនបង្កទុក្ខទោសដល់អ្នកដទៃ។ មានអាកប្បកិរិយាល្អ និងការនិយាយស្ដីល្អ ក៏រាប់ថា​ មានចរិយាធម៌ដែរ។ សម្តី ដែលស្តាប់ទៅមិនទើសត្រចៀក ហៅថាសម្តីល្អ។ អាកប្បកិរិយា ដែលមើលទៅមិនទើសភ្នែកហៅថា អាកប្បកិរិយាល្អ។ ចរិយាធម៌ អាចនាំឱ្យមានសុខដុមរមនាក្នុងសង្គម។ ផ្ទុយមកវិញ បញ្ហាក្នុងសង្គមមនុស្ស អាចកើតឡើងដោយសារមនុស្សខ្វះចរិយាធម៌ ឬសីលធម៌នេះឯង៕