រាជធានីបាងកក៖ នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រា បានអះអាងនៅថ្ងៃចន្ទទី៧តុលា មុនកិច្ចប្រជុំកំពូលអាស៊ាននៅប្រទេសឡាវ ក្នុងសប្តាហ៍នេះថា អាស៊ានត្រូវតែដើរតួនាទីយ៉ាងសំខាន់ក្នុងការបញ្ចប់សង្គ្រាមស៊ីវិល ដែលកំពុងអូសបន្លាយក្នុងប្រទេសមីយ៉ាន់ម៉ា...។
លោក ផែថងថាន បានប្រាប់ព្រឹត្តិការណ៍មួយក្នុងរាជធានីបាងកកថា៖«អាស៊ានត្រូវតែដើរតួនាទីសំខាន់ក្នុងការនាំសន្តិភាពសម្រាប់ប្រទេសមីយ៉ាន់ម៉ាវិញឲ្យបានឆាប់តាមដែលអាចធ្វើទៅបាន»។ លោកស្រីបានបន្ថែមថា ប្រទេសថៃនឹងធ្វើការជាមួយម៉ាឡេស៊ី ដែលជាប្រធានអាស៊ាននៅឆ្នាំក្រោយ ដើម្បីប្រើប្រាស់មធ្យោបាយការទូតដោះស្រាយជម្លោះ ដោយផ្តល់ឱ្យថៃដើរតួជាអ្នកសម្របសម្រួល ដើម្បីបើកកិច្ចចរចា។ កិច្ចខិតខំប្រឹងប្រែងសន្តិភាពដោយសមាជិកទាំង១០ប្រទេស មានការវិវឌ្ឍន៍តិចតួចចាប់តាំងពីការបើកបង្ហាញឱ្យមីយ៉ាន់ម៉ា អនុវត្តក្នុងខែមេសា ឆ្នាំ២០២១ បើទោះបីជាមានការអំពាវនាវម្ដងហើយម្ដងទៀតឱ្យមានកិច្ចចរចារក៏ដោយ។
គួរជម្រាបថា មីយ៉ាន់ម៉ាបានស្ថិតក្នុងភាពចលាចលចាប់តាំងពីខែកុម្ភៈ ឆ្នាំ២០២១ នៅពេលរបបយោធាបានធ្វើរដ្ឋប្រហារទម្លាក់រដ្ឋាភិបាលជាប់ឆ្នោត បង្កឱ្យមានការតវ៉ាបះបោរប្រដាប់អាវុធប្រឆាំងនឹងរបបយោធាដែលកំពុងកាន់អំណាច។ ជម្លោះដ៏ចម្រូងចម្រាសនៅមីយ៉ាន់ម៉ា បានបន្សល់ទុកមួយភាគបីនៃប្រជាជនមីយ៉ាន់ម៉ាចំនួន៥៥លាននាក់ ដែលត្រូវការជំនួយមនុស្សធម៌។ គួរបញ្ជាក់ថា អាស៊ាននៅតែបន្តរារាំងថ្នាក់ដឹកនាំរបបយោធាពីកិច្ចប្រជុំកំពូលរបស់ខ្លួន ជុំវិញការខកខានក្នុងការអនុវត្តតាមផែនការសន្តិភាពដែលអាស៊ានបានព្រមព្រៀងដំបូង។ កាលពីសប្តាហ៍មុន ឥណ្ឌូណេស៊ី បានរៀបចំកិច្ចប្រជុំអន្តរជាតិមួយដែលមានការចូលរួមពីអង្គការសហប្រជាជាតិ និងគូប្រជែងរបបយោធាមីយ៉ាន់ម៉ាផងដែរ៕
