រាជធានីភ្នំពេញ៖ លោក សោម ពិសិដ្ឋ ចៅហ្វាយខេត្តកែប បានបង្ហោះលេខទូរសព្ទរបស់មន្រ្តី៣ខ្សែ គឺ «012 821 411» «088 432 0034» «099 549 789» ហើយលោកជំរុញឱ្យប្រជាជនដែលទៅលេងខេត្តកែប រាយការណ៍ទៅមន្រ្តីតាមរយៈលេខទូរសព្ទទាំង៣ខ្សែនេះ បើជួបប្រទះទីតាំងណាលក់ម្ហូបអាហារ ឬផ្តល់សេវាកម្មក្នុងតម្លៃថ្លៃខុសប្រក្រតី។ លោកចៅហ្វាយខេត្ត បង្ហោះលេខទូរសព្ទរបស់មន្រ្តីទាំង៣ខ្សែលើទំព័រហ្វេសប៊ុក នៅថ្ងៃទី៥ ខែតុលា ឆ្នាំ២០២៤នេះ បន្ទាប់ពីខេត្តរបស់លោកល្បីរឿងបាយឆា១ចាន៦ម៉ឺនរៀលនាពេលថ្មីៗនេះ។

លោក សោម ពិសិដ្ឋ សរសេរយ៉ាងដូច្នេះថា៖«ទោះបី​ជា​ការខិតខំប្រឹង​ប្រែង​ឱ្យ​ល្អឥតខ្ចោះ​យ៉ាងណាក៏ដោយ យេីងក៏អាចនៅមាន​ចន្លោះ​ប្រហោង​ និងភាព​ខ្វះខាត​ខ្លះៗផងដែរ​ ដូចជារយៈ​ពេល​កន្លងមក​នេះ​ មាន​ការរិះគន់​ផ្សេងៗ​ និង​បញ្ហា​មួយចំនួនតូចពាក់ព័ន្ធ​ទៅនឹង​តម្លៃ​ម្ហូបអាហារ​ នៅខេត្ត​កែប​»។ តាមរយៈសំណេរដដែល លោកប្រកាសថា រដ្ឋបាល​ខេត្តកែប ទទួល​យក​រាល់​មតិ​រិះគន់​ក្នុងន័យ​ស្ថាបនា​ពី​ប្រជាជន និងភ្ញៀវ​ទេសចរ​ទាំងអស់​។

លោក ថែមទាំងចាត់ទុកមតិទាំងនោះ ថាជាមូលដ្ឋាន​ក្នុង​ការកែលម្អ​ និងការ​ដោះស្រាយ​​រាល់​ចំណុចខ្វះខាតឱ្យ​កាន់តែ​ល្អប្រសើរ ​​ ដើម្បីធ្វើ​ឱ្យ​ខេត្ត​មួយនេះ​កាន់តែ​មាន​ភាព​ទាក់ទាញ​។ ជាមួយគ្នានេះ លោកអភិបាលខេត្ត បង្ហាញឆន្ទៈថា រដ្ឋបាលខេត្តកែប នឹងខិតខំ​អភិវឌ្ឍ​​តំបន់​សក្ដានុពល​ទេសចរណ៍​នានាបន្ថែមទៀត​ សម្រាប់​ទទួល​ស្វាគមន៍​ដំណើរ​កម្សាន្ត​របស់​ប្រជាជន។ លោកបានបង្ហាញរបាយការណ៍ថា ក្នុង​រយៈ​ពេល​៣ថ្ងៃ​ នៃ​ពិធីបុណ្យ​ភ្ជុំបិណ្ឌ​​ឆ្នាំ២០២៤នេះ មានភ្ញៀវជិត៨ម៉ឺននាក់ ទៅលេងខេត្តកែប៕