គុនខ្មែរ៖ នៅថ្ងៃទី២៩កញ្ញា ឆ្នាំ២០២៤ ខាងមុខ ជាថ្ងៃដែលកីឡាករ ឈុត សេរីវាន់ថង ត្រូវបង្ខំចិត្តដាក់ខ្សែក្រវាត់កំពូលជើងឯកគុនខ្មែរស៊ុបភើស្ត្រេក គ្រងលើស្មារបស់ខ្លួនទាំងមិនអស់អាល័យ ឱ្យកីឡាករ ឡុង ជិន មកដណ្តើម ក្រោមការរៀបចំដោយស្ថានីយទូរទស្សន៍ ភីអិនអិន ខណៈមហាជនបានធ្វើការស្ទង់មតិបោះឆ្នោតយ៉ាងច្រើនលើសលុបថា រហស្សនាមរាហ៊ូមាស អាចយកឈ្នះ និងការពារខ្សែក្រវាត់របស់ខ្លួនបាន...។

នៅរសៀលថ្ងៃអាទិត្យចុងសប្ដាហ៍នេះ សង្វៀនទូរទស្សន៍ភីអិនអិន បានប្រមូលផ្តុំកីឡាករជួរមុខកម្ពុជា៤រូប ប្រកួតជាមួយកីឡាករបរទេសមកពីពហុតំបន់ និងមិត្តរួមជាតិណាត់គ្នាការប្រកួតការពារ-ដណ្ដើមខ្សែក្រវាត់២ខ្សែ។ កីឡាករកម្ពុជារួមមាន៖ ខ្លា សខេត្តកំពង់ចាម ប៊ុន សុធា ប៉ះជាមួយជើងខ្លាំងឆ្លងដែនមកពីអាល់ស៊ីរី​ កីឡាករ ហូសេម ហ្វារ៉ាស់ ប្រកួតមិត្តភាពអន្តរជាតិ។ ជាមួយគ្នា កីឡាករ ឡៅ ចិត្រា ត្រូវប្រកួតម៉ារ៉ាតុនដណ្ដើមខ្សែក្រវាត់ កំពូលជើងឯកគុនខ្មែរស៊ុបភើស្ត្រេក​ ជាមួយកីឡាករអ៊ីរ៉ង២រូប អាមេន ម៉ូរ៉ាឌី,​ សាមេន ម៉ូរ៉ាឌី និងកីឡាករក្បែរខាងកម្ពុជាមកពីថៃ បាឡាំងសាប់ និងគូឯកប្រចាំព្រឹត្តិការណ៍ កីឡាករឈុត សេរីវាន់ថង នឹងត្រូវដាក់ខ្សែក្រវាត់ឱ្យកីឡាករ ឡុង ជិន ចូលខ្លួនមកដណ្ដើម។

គួរឱ្យដឹងដែរថា គិតត្រឹមព្រឹកថ្ងៃទី២៧កញ្ញានេះ មានការស្ទង់មតិមួយពីអ្នកគាំទ្រក្នុងគ្រុបតេឡេក្រាមកីឡា ផ្ដោតលើកីឡាករ ឈុត សេរីវាន់ថង ថាអាចការពារខ្សែក្រវាត់បានរហូតដល់ទៅ៦២ភាគរយ ឯ កីឡាករ ឡុង ជិន វិញទទួលទទួលបានការស្ទង់មតិពីអ្នកគាំទ្រ៣៨ភាគរយ តែប៉ុណ្ណោះ ថាអាចដណ្ដើមខ្សែក្រវាត់ពីម្ចាស់ដើមបាន។ អ្នកគាំទ្រជឿជាក់លើ ឈុត សេរីវាន់ថង ខ្ពស់ជាង ពីព្រោះរហស្សនាមរាហ៊ូមាស មានស្នៀតប្រយុទ្ធល្អគ្រប់ស្នៀត និងកំពុងពេញកម្លាំង ឯស៊ុហ្វល្អ ពិសេស គេមានភាពវ័យឆ្លាតក្នុងការវាយប្ដូរយុត្តិសាស្ត្របន្លាស់ទីលឿន។ ចំណែក ឡុង ជិន ហាក់មិនសូវទទួលបានការស្ទង់មតិច្រើនពីអ្នកគាំទ្រទេ ទោះបី​កីឡាករដែលមានរហស្សនាម ស្ដេចពស់ថ្លាន់រូបនេះ មានស្នៀតប្រយុទ្ធល្អ និងអាវុធធ្ងន់ៗ ជាពិសេស ការចាប់បង្វិលចាក់ជង្គង់ជាក្បាច់សម្លាប់របស់គេ។

យ៉ាងណា នេះមិនមែនជាការជួបគ្នាជាលើកទី១ទេ អ្នកទាំងពីរបានជួបគ្នាជាលើកទី៤ ហើយ រវាងរាហ៊ូមាស និងស្ដេចពស់ថ្លាន់ ដោយ២ប្រកួតដំបូង ឈុត សេរីវាន់ថង ឈ្នះ និងប្រកួតលើកទី៣ ឡុង ជិន ឈ្នះ ចុះលើកទី៤នេះវិញ នរណាជាអ្នកឈ្នះ? កន្លងមកកីឡាករ ឡុង ជិន ថ្លែងប្រាប់SBM Newsថា៖«ខ្ញុំមិនពិបាកស្ទាបស្ទង់ដៃគូទេ[..]ព្រោះធ្លាប់ជួបគ្នា៣ដងរួចមកហើយ អ៊ីចឹង..! ខ្ញុំឡើងទៅដឹងតែវៃហើយ។ ខ្ញុំទទួលស្គាល់ថា សិស្សប្អូន វាន់ថង មានវ័យក្មេងជាងខ្ញុំ ស៊ុសគេអាចមានប្រៀបជាង និង​ពិសេសគឺការដេប្លាសេលឿន ធ្វើឱ្យខ្ញុំពិបាកដេញតាមវាយ។ អ៊ីចឹង..! ខ្ញុំរាល់ថ្ងៃខ្ញុំហាត់តែ៨-១០ម៉ោងទេ..! ប៉ុន្តែសម្រាប់ជួបសិស្សប្អូនម្ដងនេះ ខ្ញុំមានការដូពិសេសជូនគាត់ គឺខ្ញុំហាត់ចប់១០ម៉ោង ហើយខ្ញុំហាត់ថែម៥ម៉ោង​ នៅពេលយប់បន្ថែមទៀត។ ខ្ញុំសង្ឃឹម៨០ភាគរយ ថាខ្ញុំនឹងអាចយកឈ្នះការប្រកួតថ្ងៃអាទិត្យនេះ»៕