រាជធានីភ្នំពេញ៖ មជ្ឈមណ្ឌលអង្គរសម្រាប់ការអភិរក្សជីវចម្រុះ ហៅកាត់ថា ACCB នៅថ្ងៃសុក្រនេះបានប្រកាសដំណឹងដ៏រីករាយមួយក្រោយបិទបញ្ចប់ រដូវបង្កាត់ពូជក្នុងឆ្នាំ២០២៣ដល់ឆ្នាំ២០២៤ ខណៈមានកូនអណ្តើកព្រិចជិតផុតពូជបំផុតចំនួន១៦៩ក្បាល បានញាស់ដោយជោគជ័យ…។

មជ្ឈមណ្ឌលអង្គរសម្រាប់ការអភិរក្សជីវចម្រុះនៅថ្ងៃទី២០ ខែកញ្ញា ឆ្នាំ២០២៤ បង្ហាញថា ដ្បិតកូនអណ្តើកទើបតែញាស់ទាំងនេះ ត្រូវបានគេសម្គាល់ឃើញថា មិនចំរដូវកាលដ៏ល្អបំផុតនៅឡើយ។ តែកូនអណ្តើកព្រិចនីមួយៗ ដែលនៅតូចៗទាំងនោះ តំណាងឱ្យក្ដីសង្ឃឹមសម្រាប់នាពេលអនាគតនូវប្រភេទអណ្តើករងគ្រោះថ្នាក់ជិតផុតពូជបំផុត មានវត្តមានក្នុងប្រទេសកម្ពុជា។ ក្រោមកម្មវិធីរក្សាស្តុកទុកចំនួនរបាយប្រជាសាស្ត្រប្រភេទសត្វកម្រ ដើម្បីការពារកុំឱ្យផុតពូជ ACCB បានបង្កើតឡើងតាមរយៈការសង្គ្រោះសត្វព្រៃ និងស្តារនីតិសម្បទា។ 

ការបង្កាត់ពូជក្រោមការថែទាំរបស់មនុស្ស អនុញ្ញាតផ្តល់ឱ្យក្រុមការងារ ACCB ចាប់ផ្តើម ពិនិត្យនូវបរិយាកាសបរិស្ថានជុំវិញនៃលក្ខណៈអណ្តើកព្រិចទាំងនេះ មុនពេលលែងពួកវាចូលទៅក្នុងតំបន់ការពារវិញ។ ដ្បិតមជ្ឈមណ្ឌលអង្គរសម្រាប់ការអភិរក្សជីវចម្រុះ ថា លក្ខខណ្ឌអាកាសធាតុម្យ៉ាងគត់របស់ប្រទេសកម្ពុជា មានរដូវប្រាំង និងវស្សាខុសប្លែកដាច់ដោយឡែកពីគ្នា ផ្តល់នូវផលប៉ះពាល់ដោយផ្ទាល់ទៅដល់អាកប្បកិរិយាការបង្កាត់ពូជ។ កំណត់ត្រាក្នុងឆ្នាំ២០២៤ ចាប់ផ្តើមពីថ្ងៃទី១៦ឧសភា កូនអណ្តើកព្រិចចំនួន ៥៦ក្បាល បានញាស់ចេញពីសំបុករបស់ពួកវា ក្នុងរយៈពេលត្រឹមតែមួយថ្ងៃបន្ទាប់ពីមានភ្លៀងធ្លាក់ខ្លាំងដំបូងនៃរដូវកាលនេះ។ ទន្ទឹមនឹងការជោគជ័យនេះ ACCB បានថ្លែងអំណរគុណ ទៅដល់ក្រុមការងារទាំងអស់ ដែលបានលះបង់ក្នុងការអនុវត្តថែទាំឱ្យកាន់តែល្អប្រសើរឡើងពីមួយឆ្នាំទៅមួយឆ្នាំ។

សូមរំឭកថា កាលពីអំឡុងខែកក្កដា ឆ្នាំ២០២៣ អណ្តើកព្រិចចំនួន១០០ក្បាលត្រូវបាន ACCB បង្កាត់ពូជ ថែទាំរក្សាទុក រហូតធំធាត់ដល់ទំហំសមល្មមហើយលែងទៅក្នុងតំបន់ការពារដែលមានសុវត្ថិភាពនៅប្រទេសកម្ពុជា ដើម្បីជាការចូលរួមចំណែកដល់ការស្ដារចំនួនរបាយប្រជាសាស្ត្រនៃចំនួនសត្វអណ្តើកព្រិចព្រៃដែលបានបាត់បង់ទៅ។​ មជ្ឈមណ្ឌលជំនាញនេះ ក៏បានសន្និដ្ឋានថា ក្នុងរយៈពេលប៉ុន្មានឆ្នាំទៅមុខទៀត ក្រុមការងារអភិរក្សសត្វព្រៃ នឹងតាមដានយ៉ាងល្អិតល្អន់ចំពោះសត្វអណ្តើកទាំងនេះថា អាចសម្របខ្លួនទៅនឹងបរិស្ថានធម្មជាតិរបស់ពួកវាបានដល់កម្រិតណា។

សូមបញ្ជាក់ថា បើយោងតាមរបាយការណ៍ក្រសួងបរិស្ថាន សត្វអណ្តើកដែលប្រឈមនឹងការផុតពូជនៅកម្ពុជា មានចំនួន១០ប្រភេទ ដែលចាំបាច់ត្រូវតែមានការអភិរក្ស ការពារថែរក្សាយ៉ាងខ្លាំងក្លាបំផុតនោះគឺ អណ្តើកហ្លួង ឬ អណ្តើកសរសៃ (Batagur affinis), អណ្តើកសង្កល់ (Heosemys annandalii), អណ្តើកក្អែក (Siebenrockiella crassicollis), កន្ធាយក្បាលកង្កែប (Pelochelys cantorii),អណ្តើកស្រែ (Malayemys subtrijuga),កន្ធាយអាស៊ី (Amyda cartilaginea), អណ្តើកមាស/អណ្តើកខ្នាយ (Manouria impressa), អណ្តើកសោម (Heosemys grandis), ល្មិច (Chelonia mydas) និងអណ្តើកព្រិច ឬអណ្តើកភ្នំ (Indotestudo elongata) នេះឯង៕