គុនខ្មែរ៖ បន្ទាប់ពីក្រុមអ្នកចម្បាំងក្រុងអង្គរ ដែលមានកីឡាករ ធឿន ធារ៉ា ជាមេទ័ពប្រមុខ ដណ្តើមបានជោគជ័យ និងមានការគាំទ្រយ៉ាងភ្លូកទឹកភ្លូកដីពីជនរួមជាតិ និងមិត្តៗបរទេសនៅប្រទេសកូរ៉េខាងត្បូង។ ប្រធានសហព័ន្ធកីឡាប្រដាល់គុនខ្មែរ លោក ខូវ ឆាយ បានសម្រក់ទឹកភ្នែកនៅអាកាសយានដ្ឋានអន្តរជាតិភ្នំពេញ កាលពីវេលាម៉ោង១១ៈ១៥នាទីយប់ ដោយបញ្ជាក់ថា ការចេញទៅផ្សព្វផ្សាយ«គុនខ្មែរ» នៅដីអាស៊ីខាងកើតមួយនេះ គឺទទួលបានជោគជ័យហួសពីការស្មាន ពិសេសគឺទឹកចិត្តរួមជាតិខ្មែរដែលកំពុងស្នាក់នៅធ្វើការនៅទីនោះ...។

សូមរំឭកបន្តិចថា សេនាប្រមុខអ្នកចម្បាំងគុនខ្មែរ អ្នកលេងពូថៅដៃពិឃាដ​ ធឿន ធារ៉ាដែលបានដឹកនាំទ័ពក្រុមអ្នកចម្បាំងក្រុងអង្គរមួយឈុតធំ ចេញទៅបង្អួតក្បាច់គុនបុរាណដូនតាខ្មែរនៅប្រទេសកូរ៉េខាងត្បូង ទទួលបានជោគជ័យយ៉ាងត្រចេះត្រចង់ ដោយក្រុមអ្នកចម្បាំងក្រុងអង្គរទទួលបានជ័យជម្នះលើដៃគូបរទេសទាំងអស់។ ជាក់ស្ដែង ព្រឹត្តិការណ៍រាជសីហ៍គុនខ្មែរ ដែលបានធ្វើឡើងនៅទីក្រុងអានសាន់​ ប្រទេសកូរ៉េខាងត្បូង មានមហាជនគាំទ្ររាប់ម៉ឺននាក់ ចូលរួមទស្សនាលើសពីការរំពឹងទុករបស់អ្នករៀបចំកម្មវិធី។ ក្នុងនោះ អ្នកគាំទ្រ មានទាំងពលករខ្មែររស់នៅប្រទេសកូរ៉េ និងជនបរទេសផ្សេងទៀតដែលធ្វើដំណើរមកលេងកម្សាន្តនៅកូរ៉េខាងត្បូងនេះផងដែរ បានមកចូលរួមទស្សនាយ៉ាងភ្លូកទឹកភ្លូកដី រហូតហៀរហូរដល់ផ្នែកខាងក្រៅនៃកីឡដ្ឋានអានសាន់ថែមទៀតផង ពួកគេមិនបានទស្សនាដោយផ្ទាល់ តែពួកគេស្ម័គ្រចិត្តអង្គុយទស្សនាមុខកញ្ចក់LED ដែលដាក់នៅខាងក្រៅ ទោះស្ថិតក្រោមកម្តៅថ្ងៃជះពីលើដំបូលតង់យ៉ាងខ្លាំងក៏ដោយ។

តាមរយៈសកម្មភាពនេះ ធ្វើឱ្យ លោក ខូច ឆាយ ប្រធានសហព័ន្ធកីឡាប្រដាល់គុនខ្មែរ រំភើបរហូតស្រក់ទឹកភ្នែក ក្រោយឃើញសន្ទុះគាំទ្រគុនខ្មែរ ពីជនរួមជាតិរស់នៅប្រទេសកូរ៉េខាងត្បូងយ៉ាងផុសផុលបែបនេះ។ លោក ខូវ ឆាយ បានបង្ហាញអារម្មណ៍យ៉ាងដូច្នេះថា៖«ខ្ញុំមានក្ដីរំភើបចិត្តខ្លាំងណាស់ ចំពោះការរៀបចំព្រឹត្តិការណ៍រាជសីហ៍គុនខ្មែរនៅប្រទេសកូរ៉េខាងត្បូង ដែលប្រព្រឹត្តិទៅបានយ៉ាងរលូន មានការជ្រោមជ្រែងពីបងប្អូនពលករខ្មែរនៅទីនោះប្រមាណជិត២០០នាក់ មានទាំងក្រុមភ្លេងបុរាណខ្មែរ សន្តិសុខ អ្នកអនាម័យ ស្ម័គ្រចិត្តជួយរៀបចំរហូតចប់កម្មវិធី។ ខ្ញុំពិតជាអគុណពួកគាត់ខ្លាំងណាស់[..]​ស្ម័គចិត្តជួយចេញពីបេះដូង បើគ្មានការសហការពីពួកគាត់ទេ កម្មវិធីនេះប្រហែលជាមិនដំណើរការដោយរលូនបានដែរ»។

ប្រធានសហព័ន្ធកីឡាប្រដាល់គុនខ្មែរ គូសបញ្ជាក់បន្ថែមយ៉ាងដូច្នេះថា៖«ខ្ញុំសុំនិយាយចេញពីបេះដូងតែម្ដង! ខ្ញុំរំភើបដល់ស្រក់ទឹកភ្នែក ពេលបានឮបងប្អូនស្រែកច្រៀងបទចំរៀងជាតិ និងស្រែកពាក្យថា គុនខ្មែរ! គុនខ្មែរ! យ៉ាងទ្រហឹងអើងកង»។ លោកបន្តថា លោក ពិតជាស្ញប់ស្ញែងដល់បងប្អូនជនរួមជាតិទាំងអស់ ដែលមានវត្តមាននៅទីនោះ ព្រោះពួកគាត់មកគាំទ្រពេញស្តាត៣ម៉ោងមុនការប្រកួតចាប់ផ្ដើម ដោយសារតែសាលប្រកួតផ្ទុកបានតែ៥ពាន់នាក់ ប៉ុន្តែបងប្អូនមកលើសការកំណត់ ឯម៉ាស៊ីនត្រជាក់មិនគ្រប់គ្រាន់ និងក្ដៅខ្លាំង តែពួកគាត់អត់ធ្មត់ស៊ូទ្រាំជាមួយគ្នារហូតចប់កម្មវិធី។ គួរឱ្យដឹងដែរថា បើតាមតួលេខនៃការធ្វើសន្ទសន៍ពី លោក ខូវ ឆាយ គឺមានអ្នកគាំទ្រទាំងពលរដ្ឋកម្ពុជា និងបរទេសរាប់ម៉ឺននាក់ ក្នុងនោះអ្នកចូលរួមក្នុងសាលប្រកួតប្រមាណជាង៦ពាន់នាក់  និងរាប់ពាន់នាក់ទៀតរង់ចាំទស្សនានៅខាងក្រៅ...៕