រដ្ឋធានីកូឡុំបូ៖ គណៈរដ្ឋមន្ត្រីរបស់ប្រទេសស្រីលង្កា បានអនុម័តលើការលើកលែងទិដ្ឋាការដល់ភ្ញៀវទេសចរមកពី៣៥ប្រទេស រួមទាំងប្រទេសចិន ឥណ្ឌា និងរុស្ស៊ី ក្នុងកិច្ចខិតខំប្រឹងប្រែង ដើម្បីជំរុញទេសចរណ៍ និងជួយស្តារសេដ្ឋកិច្ចដែលរងគ្រោះដោយវិបត្តិរបស់ខ្លួន។
អ្នកនាំពាក្យខុទ្ទកាល័យ និងរដ្ឋមន្ត្រីដឹកជញ្ជូនស្រីលង្កា លោក បានឌូឡា ហ្គូណាវ៉ាដាណា (Bandula Gunawardana) បានឱ្យដឹងថា អ្នកទេសចរនឹងត្រូវបានផ្តល់ទិដ្ឋាការរយៈពេល៣០ថ្ងៃ ក្រោមកម្មវិធីសាកល្បងរយៈពេល៦ខែ ដែលនឹងចាប់ផ្តើមពីថ្ងៃទី១ ខែតុលា។ លោក ហ្គូណាវ៉ាដាណា បានប្រាប់អ្នកយកព័ត៌មាននៅក្នុងសន្និសីទសារព័ត៌មានប្រចាំសប្តាហ៍ថា៖«គោលបំណងរបស់រដ្ឋាភិបាល គឺដើម្បីប្រែក្លាយប្រទេសស្រីលង្កាទៅជាប្រទេស ដែលមានគោលនយោបាយលើកលែងទិដ្ឋាការ ដូចជាប្រទេសសិង្ហបុរី ថៃ និងវៀតណាម ដើម្បីទាញយកផលប្រយោជន៍នៃឧស្សាហកម្មទេសចរណ៍ ដែលកំពុងរីកចម្រើនយ៉ាងឆាប់រហ័ស»។ បញ្ជីប្រទេសដែលត្រូវបានអនុញ្ញាតរួមមាន ឥណ្ឌា ចិន អង់គ្លេស អាល្លឺម៉ង់ ហូឡង់ បែលហ្សិក អេស្ប៉ាញ អូស្ត្រាលី ដាណឺម៉ាក ប៉ូឡូញ កាហ្សាក់ស្ថាន អារ៉ាប៊ីសាអូឌីត អេមីរ៉ាត់អារ៉ាប់រួម នេប៉ាល់ ឥណ្ឌូណេស៊ី រុស្ស៊ី ថៃ ម៉ាឡេស៊ី ជប៉ុន និងបារាំង។
ប្រទេសដែលមានប្រជាជនចំនួន២២លាននាក់នេះ ទទួលបានភាពល្បីល្បាញដោយសារឆ្នេរខ្សាច់ ប្រាសាទបុរាណ និងតែក្រអូប តែឧស្សាហកម្មទេសចរណ៍របស់ខ្លួនបានដួលរលំមុនគេដោយជំងឺរាតត្បាតកូវីដ-១៩ ហើយបន្ទាប់មកដោយវិបត្តិហិរញ្ញវត្ថុធ្ងន់ធ្ងរនៅឆ្នាំ២០២២ ដោយមានការតវ៉ាទ្រង់ទ្រាយធំ និងកង្វះខាតសម្ភារសំខាន់ៗដូចជា ឥន្ធនៈ។ ប៉ុន្តែឧស្សាហកម្មទេសចរណ៍កំពុងទទួលបានអត្ថប្រយោជន៍នៃការផ្លាស់ប្ដូរ ដែលបានចាប់ផ្តើមកាលពីឆ្នាំមុនជាមួយនឹងប្រទេសស្រីលង្កា ដែលមានអ្នកទេសចរដល់ជិត២លាននាក់នៅពាក់កណ្តាលខែសីហា ជាលើកដំបូងចាប់តាំងពីឆ្នាំ២០១៩។
កោះនេះត្រូវបានរំពឹងថា នឹងទទួលបានភ្ញៀវទេសចរដល់២,៣លាននាក់នៅឆ្នាំនេះ។ ឥណ្ឌាគឺជាប្រភពនៃអ្នកទេសចរដ៏ធំបំផុតជាមួយនឹងការមកដល់ជាង២សែននាក់ បន្ទាប់មក គឺចក្រភពអង់គ្លេសដែលមានជាង១សែននាក់ នេះបើយោងតាមទិន្នន័យចុងក្រោយពីអាជ្ញាធរអភិវឌ្ឍន៍ស្រីលង្កា។ ប្រទេសស្រីលង្ការកចំណូលបាន១,៥ពាន់លានដុល្លារពីវិស័យទេសចរណ៍ក្នុងរយៈពេល៦ខែដំបូងនៃឆ្នាំ២០២៤ កើនឡើងពី៨៧៥លានដុល្លារក្នុងរយៈពេលដូចគ្នាកាលពីឆ្នាំមុន នេះបើយោងតាមធនាគារកណ្តាល៕
