រាជធានីភ្នំពេញ៖ អ្នកគាំទ្របង្ហាញការចាប់អារម្មណ៍និងចាត់ទុកថានេះជាមោទនភាពជាតិខ្មែរ ក្រោយឃើញវត្តមានកំពូលតារាចម្រៀង Rap របស់ប្រទេសកម្ពុជា លោក វណ្ណដា( Vann Da) បង្ហាញខ្លួនលើឆាក នៃកម្មវិធីបិទការប្រកួតកីឡាអូឡាំពិករដូវក្ដៅ ក្រុងប៉ារីស ប្រទេសបារាំង ឆ្នាំ២០២៤ រំលេចនៅឈុតច្នៃពីហូលខ្មែរ។

ទន្ទឹមគ្នានោះក៏មានសារព័ត៌មានបរទេសជាច្រើនបានចុះផ្សាយពីការបង្ហាញខ្លួនរបស់កំពូលតារាចម្រៀងកម្ពុជារូបនេះ។ ក្រោយកាសែតបារាំង Le Parisien បានចុះផ្សាយអត្ថបទមួយដោយចោទសួរថា «តើវណ្ណដាជានរណា?» ឯកឧត្តម ហ្សង់ ហ្វ្រង់ស័រ តាន់ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការ​ការបរទេស និងសហប្រតិបត្តិការអន្តរជាតិ នៅមិនសុខក៏បានទម្លាយពាក្យក្នុងចិត្តតាមសំណេររបស់ខ្លួនលើបណ្ដាញសង្គមហេ្វសប៊ុក នាព្រឹកទី១២សីហានេះ ដោយមានខ្លឹមសារថា៖ «ជារឿងធម្មតា កម្ពុជាជាប្រទេសសម្បូរយុវជននិងយុវនារី។ ម្ល៉ោះហើយ ដើម្បីព្យាករមើលអនាគតនៃប្រទេសមួយនេះ គេតែងចាប់អារម្មណ៍ជាពិសេសទៅលើ ទំពាំងស្នងឫស្សី។ គុណភាពនៃយុវវ័យ អាចស្តែងឡើងលើគ្រប់វិស័យ, ដូចជាចំណេះដឹងនិងជំនាញ ពិសេសផ្នែកវិទ្យាសាស្រ្ត និងសេដ្ឋកិច្ចហិរញ្ញវត្ថុ, ព្រមទាំងសិល្ប:ដែលជាព្រលឹងជាតិនិងដែលត្រូវតែរស់រវើក សម្បូរបែប ប្រកបដោយគំនិតច្នៃប្រឌិតខ្ពស់។ វណ្ណដាជាសិល្បករដែលមានគុណសម្បត្តិអស់ទាំងនេះ»។  

បើតាមវីដេអូបង្ហាញពីសកម្មភាពចូលរួមបិទព្រឹត្តិការណ៍កីឡាអូឡាំពិករដូវក្ដៅ ក្រុងប៉ារីស ប្រទេសបារាំង ឆ្នាំ២០២៤នេះ លោក វណ្ណដា បានច្រៀងបទ «Time to Rise»។ ការបង្ហាញខ្លួនរបស់តារាកម្ពុជាលើឆាកកម្មវិធីលំដាប់ពិភពលោកនេះ គឺជាកិត្តិយសដ៏ធំធេងមួយសម្រាប់កម្ពុជា ជំរុញឱ្យមានការចាប់អារម្មណ៍យ៉ាងខ្លាំងពីសំណាក់អ្នកចូលរួមទស្សនា ក៏ដូចជាប្រជាជនកម្ពុជា។ 

គួរជម្រាបថា ការប្រកួតកីឡាអូឡាំពិករដូវក្ដៅ ក្រុងប៉ារីស ប្រទេសបារាំង ឆ្នាំ២០២៤ ត្រូវបានចាប់ផ្តើមកាលពីថ្ងៃទី២៦ ខែកក្កដា ហើយត្រូវបិទបញ្ចប់នៅយប់ថ្ងៃទី១១ ខែសីហា ឆ្នាំ២០២៤។ ក្នុងព្រឹត្តិការណ៍ដ៏ធំនោះសហរដ្ឋអាម៉េរិកទទួលបានមេដាយច្រើនជាងគេ ១២៦មេដាយ (មាស៤០ ប្រាក់៤៤ និងសំរិទ្ធ ៤២) តាមពីក្រោយដោយប្រទេសចិន ៩១មេដាយ (មាស ៤០ ប្រាក់២៧ និងសំរិទ្ធ២៤) និងជប៉ុន ៤៥មេដាយ (មាស២០ ប្រាក់១៣ និងសំរិទ្ធ១៣) ខណៈម្ចាស់ផ្ទះបារាំង ឈរនៅលេខ៥ មាន៦៤មេដាយ (មាស ១៦ ប្រាក់ ២៦ និងសំរិទ្ធ២២)៕