រដ្ឋធានីណៃពិដោ៖ អតីតមេដឹកនាំ​ប្រជាធិបតេយ្យ​មីយ៉ាន់ម៉ា​លោកស្រី អ៊ុងសាន ស៊ូជី ដែល​កំពុង​ជាប់ឃុំ​ គឺ​មាន​សុខភាព​ល្អ ខណៈម្ចាស់ពាន​រង្វាន់​ណូបែលពិភពលោក​រូបនេះឈានដល់វ័យ ៧៩ឆ្នាំ​ហើយ។ នេះបើតាមការបញ្ជាក់របស់អ្នកនាំពាក្យ​របប​យោធាមីយ៉ាន់ម៉ា។

លោកស្រី ស៊ូជី ត្រូវ​បានរបប​យោធា​ចាប់​ឃុំ​ខ្លួន​ចាប់​តាំង​ពី​ខ្លួន​បាន​ផ្តួល​រំលំ​រដ្ឋាភិបាល​របស់​លោកស្រី និង​បាន​ដណ្តើម​អំណាច​នៅ​ឆ្នាំ២០២១ ដោយ​បាន​ធ្វើ​ឱ្យ​ប្រទេស​អាស៊ីអាគ្នេយ៍មួយនេះ​ធ្លាក់​ក្នុង​ភាព​ចលាចល។ ម្ចាស់ជ័យលាភីណូបែលរូបនេះកំពុងជាប់ទោស ២៧ឆ្នាំ ដែលដាក់ដោយតុលាការរបបយោធា។ អ្នកនាំពាក្យរបបយោធាលោក ស មីនទុន (Zaw Min Tun )​ បានប្រាប់ទីភ្នាក់ងារសារព័ត៌មាន AFP ថា ៖«តាមខ្ញុំដឹង លោកស្រីមានសុខភាពល្អ និងរស់នៅកន្លែងដែលយើងរៀបចំឱ្យលោកស្រីដូចកាលពីមុនអ៊ីចឹង»។ លោកស្រី ស៊ូជី ត្រូវ​បាន​ឃុំ​ខ្លួន​នៅ​ក្នុង​បរិវេណ​ពន្ធនាគារ​ដែល​ត្រូវ​បាន​សាងសង់​ឡើង​យ៉ាង​ពិសេស​ក្នុង​រដ្ឋធានីណៃពិដោ ដែល​សាងសង់​ដោយ​របបយោធា។

លោកស្រី ស៊ូជី ដែលនៅតែមានប្រជាប្រិយភាពខ្លាំងនៅក្នុងប្រទេសមីយ៉ាន់ម៉ា ត្រូវបានគេលាក់កម្បាំងស្ទើរតែមិនឱ្យឃើញស្រមោលចាប់តាំងពីរដ្ឋប្រហារមក ដោយលោកស្រីបង្ហាញខ្លួនតែនៅក្នុងរូបថតប្រព័ន្ធផ្សព្វផ្សាយរដ្ឋដែលថតបានក្នុងអំឡុងពេលដំណើរការតុលាការប៉ុណ្ណោះ។ ប្រព័ន្ធផ្សព្វផ្សាយក្នុងស្រុកបានរាយការណ៍ថា មួយរយៈចុងក្រោយនេះលោកស្រីបានទទួលរងនូវអាការៈវិលមុខ និងក្អួត ហើយពេលខ្លះមិនអាចបរិភោគបានដោយសារតែការឆ្លងមេរោគធ្មេញ។ ដោយឡែក កូនប្រុសរបស់លោកស្រីឈ្មោះ គីម អារីស (Kim Aris) បានប្រាប់ AFP ថា លោកមានការព្រួយបារម្ភជាខ្លាំងអំពីស្ថានភាពជំងឺម្តាយរបស់លោក ដោយសារតែលោកស្រីមានអាយុច្រើន និងបញ្ហាសុខភាពដែលកំពុងបន្តយាយី៕