រាជធានីភ្នំពេញ៖ មន្ទីរ​ពេទ្យ​គន្ធ​បុប្ផា បច្ចុប្បន្ន​មាន​៥​ទី​តាំង​ដែល៤​ទី​តាំង​ស្ថិតនៅរាជធានី​ភ្នំពេញ និង​១​ទី​តាំងទៀត ស្ថិត​នៅ​ខេត្ត​សៀម​រាម។ ជារៀងរាល់ឆ្នាំ មន្ទីរ​ពេទ្យនេះចំណាយថវិកាប្រមាណ ៤២លានដុល្លារអាម៉េរិក ដើម្បីពិនិត្យនិងព្យាបាលទារក និងកុមាររាប់លានករណី ដោយប្រកាន់ភ្ជាប់នូវគោលការណ៍មិនចំណូល។ 

​យោងតាម លោក ចន ណារិទ្ធ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជានាយកប្រតិបត្តិនៃមូលនិធិគន្ធបុប្ផាកម្ពុជា បានឱ្យដឹងថា ថវិកា​ទ្រ​ទ្រង់​មន្ទីរ​ពេទ្យ​គន្ធ​បុប្ផា គឺ​បាន​មក​ពី​សប្បុរស​ជន​រដ្ឋា​ភិ​បាល​ស្វីស​ និងរាជ​រដ្ឋា​ភិបាល​កម្ពុជា។ ចំណូលពីការលក់បណ្ណចូលទស្សនារមណីដ្ឋានអង្គរ ប្រាសាទកោះកែរ និងកំពង់ផែចុងឃ្នៀស ត្រូវបានដកចំនួន២ដុល្លារ ក្នុងមួយសំបុត្រដើម្បីបរិច្ចាគទៅមូលនិធិគន្ធបុប្ផាផងដែរ។ រីឯកាកបាទក្រហមកម្ពុជា ក៏បានបរិច្ចាគយ៉ាងទៀតទាត់ចំនួន១លានដុល្លារជារៀងរាល់ឆ្នាំ។ ជាមួយគ្នានេះ ព្រះករុណាព្រះមហាក្សត្រ និងសម្ដេចព្រះមហាក្សត្រី ក៏តែងបរិច្ចាគចូលមូលនិធិគន្ធបុប្ផាផងដែរ។ នាយកប្រតិបត្តិរូបនេះ បានបញ្ជាក់ឱ្យដឹងថា មន្ទីរពេទ្យគន្ធបុប្ផាមានសមាជិកស្ថាបនិកប្រមាណជាង១៣០នាក់។ សមាជិកស្ថាបនិក សំដៅលើសប្បុរសជនដំបូងៗដែលរួមគ្នាបង្កើត ហើយចំនួននៃការបរិច្ចាគ គឺចាប់ផ្តើមពី២ម៉ឺនដុល្លារអាម៉េរិកឡើងទៅ ដែលរួមមាន៖ សម្ដេចតេជោ ហ៊ុន សែន ជាប្រធានកិត្តិយស និងឯកឧត្តម ឧបនាយករដ្ឋមន្ត្រីអគ្គបណ្ឌិតសភាចារ្យ អូន ព័ន្ធមុនីរ័ត្ន ជារដ្ឋមន្ត្រីក្រសួងសេដ្ឋកិច្ច ជាប្រធានក្រុមប្រឹក្សា។

ប៉ុន្តែសព្វថ្ងៃនេះ មន្ទីរពេទ្យគន្ធបុប្ផាមានសមាជិកតែ២ប្រភេទប៉ុណ្ណោះ គឺសមាជិកកិត្តិយស និងសមាជិកគាំទ្រ។ សមាជិកកិត្តិយស គឺសម្តៅលើសប្បុរសជនទាំងឡាយណាដែលចូលរួមបរិច្ចាគចាប់ពី៥ពាន់ដុល្លារអាម៉េរិកឡើងទៅក្នុងមួយឆ្នាំ។ ចំណែកឯសមាជិកគាំទ្រ គឺសម្រាប់សប្បុរសជនដែលចូលរួមបរិច្ចាគ៥០០០រៀលក្នុងមួយខែ ឬក៏៦ម៉ឺនរៀលក្នុងមួយឆ្នាំ។ លោក ឃាន តួក អគ្គលេខាធិការរងក្រុមប្រឹក្សាជាតិគាំពារសង្គម និងជាប្រធានផ្នែកទំនាក់ទំនងសាធារណៈនៃមូលនិធិគន្ធបុប្ផាកម្ពុជា បានអះអាងថា គិតក្នុងឆ្នាំ២០២៣ សមាជិកកិត្តិយសមាន៦៧នាក់ និងសមាជិកគាំទ្រមានចំនួន២៧ម៉ឺន ដោយចំនួនសមាជិកទាំងនោះអាចផ្លាស់ប្ដូរទៅតាមពេលវេលា។

យ៉ាងណាក្ដី មូលនិធិគន្ធបុប្ផាបានបង្កើតជាយុទ្ធនាការ ឬកម្មវិធីផ្សេងៗដើម្បីកៀងគរថវិកាចូលមន្ទីរពេទ្យ ​ផ្គត់​ផ្គង់​ការ​ចំណាយនានា។ ជាក់ស្ដែង យុទ្ធនាការ «១ម៉ឺនរៀល ១ម៉ឺននាក់» ត្រឹមរយៈពេលជាង២០ថ្ងៃមានសប្បុរសជនជាង១៧ម៉ឺននាក់ បានចូលរួមបរិច្ចាគ ដោយទទួលបានថវិកាបរិច្ចាគសមមូលជាប្រាក់ដុល្លារចំនួនប្រមាណ២លាន ៧២ម៉ឺនដុល្លារអាម៉េរិក។ សប្បុរសជនទាំងអស់នៅតែអាចចូលរួមបរិច្ចាគមូលនិធិគន្ធបុប្ផាកម្ពុជា បន្តនិរន្តភាពរបស់មន្ទីរពេទ្យគន្ធបុប្ផាទាំង៥ ទីតាំងនៅទូទាំងប្រទេស ឬតាមរយៈតំណភ្ជាប់ https://bit.ly/3jEtL8I ឬ QR Code នៅខាងក្រោម។ គួរំលឹកដែរថា មន្ទីរពេទ្យគន្ធបុប្ផា គឺជាឈ្មោះរបស់ព្រះអង្គម្ចាស់ក្សត្រីយ៍ នរោ​​​​​​​​​​​​​​​​​​​​​​​​​​​​​​​​​​​​ត្ដម គន្ធបុប្ផា ដែលជាព្រះរាជធីតាសំណព្វព្រះរាជហឫហទ័យនៃព្រះករុណា ព្រះបាទសម្តេច ព្រះនរោត្តម សីហនុ ព្រះបរមរតនកោដ្ឋ។ ព្រះអង្គម្ចាស់ក្សត្រីយ៍ ទ្រង់សុគតទាំងព្រះជន្មាយុ វ័យកុមារដោយសារប្រឈួនខ្លាំង។ 

ដើម្បីឧទ្ទិសដល់ព្រះរាជធីតា ព្រះវររាជបិតា ទ្រង់ក៏បានត្រាស់បង្គាប់ឱ្យសាងសង់មន្ទីរពេទ្យមួយឡើងដោយដាក់ឈ្មោះថា មន្ទីរពេទ្យគន្ធបុប្ផាទី១។ ក្រោយមកទៀត ព្រះអង្គក៏បានបរិច្ចាគដីមួយផ្នែក ឯព្រះបរមរាជវាំងនៅក្បែរព្រះចេតិយព្រះអង្គម្ចាស់ក្សត្រីយ៍ ជូនលោក បណ្ឌិត បេអាត រិចឆ្នឺ (Beat Richner) ស្ថាបនិកនៃមន្ទីរពេទ្យគន្ធបុប្ផា ដើម្បីសាងសង់មន្ទីរពេទ្យគន្ធបុប្ផាទី២ នៅឆ្នាំ១៩៩៥ និងដើម្បីជាគុណប្រយោជន៍ព្យាបាលកុមារក្រីក្រ ដែលមិនមានលទ្ធភាពបង់ថ្លៃព្យាបាលជំងឺបានយ៉ាងច្រើនសែននាក់នៅទូទាំងព្រះនគរ៕