រាជធានីភ្នំពេញ៖ សមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ នៅព្រឹកថ្ងៃទី០៩មិថុនា ឆ្នាំ២០២៤នេះ បានប្រារព្ធខួបលើកទី៧៥ឆ្នាំ នៃការបាត់បង់ទឹកដីកម្ពុជាក្រោម នៅចំពោះមុខតំណាងរបស់ព្រះមហាក្សត្រ ដែលត្រូវបានចាត់មកឱ្យចូលរួមពិធីនេះដែរ...។
កម្មវិធីនេះធ្វើឡើងនៅវត្តសាមគ្គីរង្សី ឬហៅវត្តខ្មែរកម្ពុជាក្រោម ដើម្បីរួមគ្នារំឭកខួបប្រវត្តិទឹកដីខ្មែរកម្ពុជាក្រោម, ផែនការទៅថ្ងៃអនាគតសម្រាប់ទឹកដីខ្មែរកម្ពុជាក្រោម និងសិទ្ធិសេរីភាពរបស់បងប្អូនពលរដ្ឋខ្មែរក្រោមទាំងអស់។ នៅក្នុងកម្មវិធីកាលពីព្រឹកមិញនេះ មានការចូលរួមពីប្រជាពលរដ្ឋជាច្រើនដែលភាគច្រើនត្រូវបានគេជឿថា ជាពលរដ្ឋខ្មែរក្រោម ឬដែលមានសែស្រឡាយជាពលរដ្ឋខ្មែរក្រោមរត់ភាសខ្លួនមករស់នៅលើទឹកដីខ្មែរកណ្តាល ខណៈបច្ចុប្បន្នដែនដីកម្ពុជាក្រោមទាំងមូល បានស្ថិតក្រោមការគ្រប់គ្រងរបស់វៀតណាម។ ក្នុងពិធីនេះ មានការរៀបចំជាពិធីបុណ្យសង្ឃទានប្រគេនព្រះសង្ឃចំនួន៧៥អង្គ តំណាងឱ្យខួបលើកទី៧៥ឆ្នាំ និងដើម្បីឧទ្ទិសមហាកុសលប្រគេនគោរពវិញ្ញាណក្ខន្ធ ព្រះវីរសមណ និងជូនដួងវិញ្ញាណក្ខន្ធវីរបុរសខ្មែរស្នេហាជាតិ ដូចជាលោកឧកញ៉ា សឺន គុយ ជាដើម។
ថ្លែងក្នុងពិធីដដែលនេះ លោក គឹម ស៊ីសំណា លេខានៃលេខាធិការដ្ឋានអង្គការសមាគមខ្មែរកម្ពុជាក្រោម បានឱ្យដឹងថា ប្រជាពលរដ្ឋខ្មែរក្រោម បានរំឭកព្រឹត្តិការណ៍នេះឡើង ដើម្បីឱ្យកូនខ្មែរគ្រប់ជំនាន់ចងចាំនូវប្រវត្តិសាស្ត្រដ៏ជូរចត់នេះ និងដើម្បីសំដែងនូវការដឹងគុណដល់វីរភាព និងពលិកម្មរបស់បុព្វបុរសខ្មែរ ដែលបានតស៊ូថែរក្សាពូជសាសន៍ខ្មែរ សាសនា វប្បធម៌ ទំនៀមទម្លាប់ប្រពៃណីជាតិខ្មែរឱ្យបានគង់វង្សរហូតមកដល់សព្វថ្ងៃនេះ។ ជាការកត់សម្គាល់ សមាគមបានអញ្ជើញ ព្រះរាជតំណាងរបស់ព្រះមហាក្សត្រ ព្រះបាទ នរោត្តម សីហមុនី ជាព្រះអធិបតីភាពផងដែរ ដោយព្រះអង្គបានចាត់ ឯកឧត្តម សឺន ស៊ូប៊ែរ្តិ៍ ឧត្តមទីប្រឹក្សាផ្ទាល់ព្រះមហាក្សត្រ មកចូលកម្មវិធី។
នៅចំពោះមុខភាពចម្រូងចម្រាស់ជាមួយនឹងវៀតណាម នៅមួយរយៈកាលចុងក្រោយ ជុំវិញសំណុំរឿងព្រែកជីកហ្វូណន អាជ្ញាធរកម្ពុជាទំនងជាបើកទូលាយជាងមុនសម្រាប់កម្មវិធី ដែលពាក់ព័ន្ធនឹងទឹកដីកម្ពុជាក្រោមមួយនេះ។ គេនៅចាំបានថា អាជ្ញាធររាជធានីភ្នំពេញ នៅថ្ងៃសុក្រទី៣១ ខែឧសភា បានបើកភ្លើងបៃតងឱ្យមានការប្រារព្ធពិធីរំឭកខួបថ្ងៃបាត់បង់ទៅទឹកកម្ពុជាក្រោមទៅឱ្យវៀតណាម ដែលកម្មវិធីបានប្រារព្ធឡើងកាលពីព្រឹកមិញនេះ។ យ៉ាងណា អាជ្ញាធរនៅតែកំណត់ចំនួនមនុស្សចូលរួមព្រមទាំង ហាមប្រាមការនិយាយអ្វីដែលប៉ះពាល់ដល់ទំនាក់ទំនងនៃរាជរដ្ឋាភិបាលកម្ពុជា និងរដ្ឋាភិបាលវៀតណាម។
ដោយឡែក កាលពីថ្ងៃទី០៤មិថុនា គណនីហ្វេសប៊ុកដែលមានឈ្មោះ «ព្រះបរមរាជវាំង Royal Palace of Cambodia» មានតាំងព្រះឆាយាល័ក្ខណ៍ ព្រះបាទ សម្តេច ព្រះនរោត្តម សីហមុនី ជារូប Profile ផងនោះ បានបង្ហោះសារយ៉ាងដូច្នេះថា៖ «ថ្ងៃនេះជា ខួប៧៥ឆ្នាំ នៃការបាត់បង់សិទ្ធិគ្រប់គ្រងដែនដី កម្ពុជាក្រោម»។ សារនេះត្រូវបានអ្នកលេងបណ្តាញសង្គមចែកចាយដល់ទៅជាង១ម៉ឺន៤ពាន់ដង និងមានអ្នកចុច Like ដល់ទៅជាង១ម៉ឺន១ពាន់ដង។ សារបែបនេះ ត្រូវបានអ្នកលេងបណ្តាញសង្គមយល់ថា ជាការបង្ហាញព្រះទ័យចូលរួមរំឭក និងព្រះទ័យសោកស្ដាយរបស់អង្គព្រះមហាក្សត្រចំពោះទឹកដីកម្ពុជាក្រោម ដែលកម្រនឹងបានឃើញពីអង្គព្រះមហាក្សត្រ ស្របពេលដែលគេក៏មិនសូវឃើញមន្ត្រីរាជរដ្ឋាភិបាលនិយាយច្រើនប៉ុន្មានដែរ ពីបញ្ហានេះ ពិសេសនៅថ្ងែគម្រប់ខួបតែម្ដង៕
