រដ្ឋធានីប៉េកាំង៖ ពាណិជ្ជកម្មរុស្ស៊ីកំពុងរងនូវការរាំងស្ទះដ៏ធំមួយ ខណៈបងធំសហរដ្ឋអាម៉េរិកគំរាមដាក់ទណ្ឌកម្មលើធនាគារក្នុងប្រទេសទីបី ដែលរួមទាំងប្រទេសចិនផងដែរ ដែលត្រូវបានគេមើលឃើញថា រដ្ឋធានីប៉េកាំងកំពុងដុតដៃដុតជើងជួយសម្រួលដល់កិច្ចប្រឹងប្រែងធ្វើសង្គ្រាមរបស់រដ្ឋធានីម៉ូស្គូនៅអ៊ុយក្រែន។
យោងតាមធនាគារកណ្តាលរុស្ស៊ី ការនាំចូលសរុបរបស់រុស្ស៊ីបានធ្លាក់ចុះ១០ភាគរយក្នុងឆ្នាំនេះ អំឡុងខែមករាដល់ខែមេសា ខណៈការនាំចូលពីប្រទេសចិនដែលរុស្ស៊ីពឹងផ្អែកខ្លាំងលើការផ្គត់ផ្គង់ក្នុងសម័យសង្គ្រាមបច្ចុប្បន្ន បានធ្លាក់ចុះតាំងពីខែមីនាមក។ ដោយឡែក យោងតាមទីភ្នាក់ងារគយ ការនាំចេញរបស់ចិនទៅកាន់រុស្ស៊ីបានធ្លាក់ចុះ១៤ភាគរយ។ ការណ៍នេះ កើតឡើងបន្ទាប់ពីការធ្លាក់ចុះ១៦ភាគរយក្នុងខែមីនា ជាការធ្លាក់ចុះដំបូងក្នុងរយៈពេលដូចគ្នា ចាប់តាំងពីខែមិថុនា ឆ្នាំ២០២២។
ក្រៅតែពីចិន ពាណិជ្ជកម្មរបស់រុស្ស៊ីកំពុងជាប់គាំងជាមួយបណ្តាប្រទេសជាសម្ព័ន្ធមិត្តជាច្រើនទៀត។ ជាក់ស្តែង ការនាំចេញរបស់តួកគីទៅកាន់ប្រទេសរុស្ស៊ីបានធ្លាក់ចុះប្រហែល៣០ភាគរយក្នុងឆ្នាំនេះ អំឡុងខែមករាដល់ខែមីនា ខណៈការនាំចេញកាហ្សាក់ស្ថានបានធ្លាក់ចុះ២៥ភាគរយ។ ងាកមកវិញ ពាណិជ្ជកម្មទ្វេភាគីរវាងរុស្ស៊ី និងចិនបានឈានដល់កម្រិតខ្ពស់បំផុតនៅឆ្នាំ២០២៣។ ការធ្លាក់ចុះនៃពាណិជ្ជកម្មនាពេលថ្មីៗនេះ កើតឡើងនៅពេលដែលរដ្ឋធានីវ៉ាស៊ីនតោន គ្រោងដាក់ទណ្ឌកម្មហិរញ្ញវត្ថុបន្ថែមដើម្បីកាត់ផ្តាច់រំហូរសេដ្ឋកិច្ច។
ការគំរាមកំហែងនៃទណ្ឌកម្មរបស់សហរដ្ឋអាម៉េរិក បាននាំឱ្យធនាគារជាច្រើនទៀតជាប់គាំងជុំវិញកិច្ចប្រតិបត្តិការទាក់ទងនឹងប្រទេសរុស្ស៊ី ដោយធនាគារឧស្សាហកម្ម និងពាណិជ្ជកម្មនៃប្រទេសចិន និងស្ថាប័នផ្សេងទៀតរបស់ចិនបានបដិសេធមិនដំណើរការការទូទាត់ប្រាក់យ័នចេញពីប្រទេសរុស្ស៊ី។ មែនទែនទៅ ក្រុមហ៊ុនផលិតគ្រឿងបន្លាស់អេឡិចត្រូនិចរបស់រុស្ស៊ីមិនត្រូវបានដំណើរការដោយធនាគារចិនចាប់តាំងពីចុងខែមីនា ខណៈក្រុមហ៊ុនរុស្ស៊ីជាច្រើនកំពុងរងការខ្វះខាតផ្នែកអេឡិចត្រូនិច និងគ្រឿងបន្លាស់ផ្សេងទៀត។ ការណ៍នេះត្រូវបានគេរំពឹងថា តម្លៃរថយន្ត និងផលិតផលផ្សេងទៀតនឹងកើនឡើង ជាពិសេសអតិផរណានៅតែបន្ត៕
