រាជធានីភ្នំពេញ៖ ក្រសួងសាធារណការ និងដឹកជញ្ជូន នៅថ្ងៃទី២ ខែមិថុនា ឆ្នាំ២០២៤ បានស្នើដោយទទូចឱ្យគ្រប់ភាគីពាក់ព័ន្ធបញ្ឈប់នូវវប្បធម៌អន្តរាគមន៍ រាល់ពេលមានការឃាត់យានយន្តដឹកលើសទម្ងន់កម្រិតកំណត់ ស្របពេលអាជ្ញាធរខេត្តបាត់ដំបង ឃាត់រថយន្ដដឹកលើសទម្ងន់៣គ្រឿងពិន័យប្រាក់ និងឃាត់ទុករយៈពេល០១ឆ្នាំ…។
ក្រសួងបញ្ជាក់ថា ក្នុងប្រតិបត្តិការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ នៅស្រុកបាណន់ ខេត្តបាត់ដំបង កាលពីថ្ងៃទី១មិថុនា ឆ្នាំ២០២៤ ក្រោមការចង្អុលបង្ហាញពី ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ លោក សេង ឈួន រដ្ឋលេខាធិការ និងជាប្រធានគណៈកម្មាធិការសម្របសម្រួលអចិន្ត្រយ៍នៃគណៈកម្មាធិការដឹកនាំការត្រួតពិនិត្យយានយន្ត ដឹកជញ្ជូនលើសទម្ងន់កម្រិតកំណត់ និងជាប្រធានក្រុមការងារត្រួតពិនិត្យចល័តចម្រុះ និងមន្ត្រីពាក់ព័ន្ធចុះត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់នៅផ្លូវកំពីងពួយ ភូមិក្រពេីជើង ឃុំភ្នំសំពៅ ស្រុកបាណន់។
ប្រតិបត្តិការនោះ ក្រុមការងារបានត្រួតពិនិត្យយានយន្តសរុបចំនួន៤គ្រឿង ក្នុងនោះ មានយានយន្ត១គ្រឿង ដឹកលើសក្នុងកម្រិតអនុគ្រោះ ត្រូវបានអនុញ្ញាតឱ្យបន្តដំណើរទៅមុខ ចំណែកយានយន្តចំនួន ៣គ្រឿងផ្សេងទៀត ក្រសួងរកឃើញថា ដឹកលើសទម្ងន់កម្រិតកំណត់ចាប់ពី១៥ ដល់៣០តោន ត្រូវបានពិន័យ និងឃាត់ទុករយៈពេល១ឆ្នាំ។ ដោយអនុលោមតាមច្បាប់ស្តីពីផ្លូវថ្នល់ មាត្រា៦០ និងសេចក្ដីជូនដំណឹង លេខ០៤៩ សជណ សក. គតលទ ស្តីពីការពង្រឹងវិធានការយ៉ាងតឹងរ៉ឹងបន្ថែម ចំពោះយានយន្តដឹកជញ្ជូនធុនធ្ងន់ដែលបើកបរលើបណ្តាញផ្លូវថ្នល់។
ទន្ទឹមនឹងការឃាត់បានរថយន្តដឹកលើសទម្ងន់ទាំងនោះ ក្រសួងលើកឡើងជាសំណើចំៗទៅកាន់អ្នកពាក់ព័ន្ធឱ្យបញ្ឈប់វប្បធម៌អន្តរាគមន៍ ខណៈក្រសួងផ្ទាល់អះអាងថា នឹងបន្តចាត់វិធានការរឹតបន្តឹងការអនុវត្តច្បាប់ យ៉ាងតឹងរ៉ឹងបំផុតដោយគ្មានការលើកលែង។ ក្រសួងបញ្ជាក់យ៉ាងដូច្នេះថា៖«សូមស្នើដោយទទូចឱ្យគ្រប់ភាគីពាក់ព័ន្ធបញ្ឈប់នូវវប្បធម៌អន្តរាគមន៍ នៅពេលមានការឃាត់យានយន្តដឹកលើសទម្ងន់កម្រិតកំណត់ និងស្នើសុំដល់ម្ចាស់ក្រុមហ៊ុនដឹកជញ្ជូនទំនិញ ម្ចាស់រថយន្តធុនធ្ងន់ និងអ្នកបើកបររថយន្តធុនធ្ងន់ទាំងអស់ ដែលប្រកបរបរដឹកជញ្ជូនទំនិញ សូមកុំដឹកជញ្ជូនលើសទំនិញកម្រិតកំណត់ ហើយចូលរួមអនុវត្ត និងគោរពឱ្យបានខ្ជាប់ខ្ជួនតាមច្បាប់ស្តីពីផ្លូវថ្នល់ជាធរមាន។ ក្រសួងនឹងបន្តចាត់វិធានការរឹតបន្តឹងការអនុវត្តច្បាប់ និងសេចក្ដីជូនដំណឹងខាងលើយ៉ាងតឹងរ៉ឹងបំផុតដោយគ្មានការលើកលែង»។
គួរជម្រាបថា ទម្ងន់ដឹកជញ្ជូនអតិបរមាលើបណ្តាញផ្លូវថ្នល់តាមប្រភេទយានយន្តត្រូវបានក្រសួងកំណត់រួមមាន៖ យានយន្ត២ភ្លៅ អនុញ្ញាតឱ្យដឹកបានទម្ងន់ ១៦តោន។ យានយន្តសណ្តោងរ៉ឺម៉ក ឬសណ្តោងសឺមីរ៉ឺម៉ក ដែលមាន៦ភ្លៅ ឡើងទៅ អាចដឹកបានទម្ងន់កំណត់ ៤៥តោន។ ចំពោះរថយន្តដែលផ្ទុកលើសចាប់ពី២០ភាគរយឡើងទៅនឹងត្រូវរងពិន័យ ដកបណ្ណបើកបរព្យួរទុកចំនួន២ឆ្នាំ ឃាត់យានយន្តទុក១ឆ្នាំ។ រក្សាទុកនៅទីតាំងណាមួយសមស្រប ហើយម្ចាស់យានយន្តត្រូវទទួលខុសត្រូវលើការលើកដាក់ទំនិញ និងបង់ថ្លៃឈ្នួលកន្លែងទុកដាក់ថែទាំ យានយន្តដោយខ្លួនឯង។ ឈានទៅបញ្ឈប់អាជីវកម្មដឹកជញ្ជូនរបស់ក្រុមហ៊ុន១ឆ្នាំ ក្នុងករណីទទួលរងការពិន័យអន្តរការណ៍ម្ដងរួចមកហើយ និងនៅតែបន្តប្រព្រឹត្តល្មើសទៀត៕
