រាជធានីបាងកក៖ រលកកម្តៅដែលកំពុងដុតកម្លោចប្រទេសថៃ ក្នុងខែមេសា និងឧសភា អាចកាត់បន្ថយការផលិតទុរេន ដែលអនុញ្ញាតឱ្យវៀតណាមបង្កើនការផ្គត់ផ្គង់ដល់ប្រទេសចិន។
ប្រទេសថៃបានកត់ត្រាសីតុណ្ហភាពក្ដៅខ្លាំង៤៤,២អង្សាសេ ធៀបនឹងកំណត់ត្រា ៤៤,៦អង្សាសេកាលពីឆ្នាំមុន។ ឆ្នាំនេះ ប្រទេសថៃបានកត់ត្រាមនុស្សចំនួន៦១នាក់ បានបាត់បង់ជីវិតដោយសារតែកម្តៅ ខ្ពស់ជាងចំនួនសរុបក្នុងឆ្នាំ២០២៣។ កម្តៅក្ដៅខ្លាំងបណ្តាលឱ្យសំបកទុរេនប្រេះ ឬស្ងួតសរសៃនៅក្នុងផ្លែទុរេន ដែលនាំឱ្យវាលក់ក្នុងតម្លៃទាបជាងទីផ្សារ។ ទន្ទឹមគ្នានោះ កសិករបានរាយការណ៍ថា កម្តៅនេះធ្វើឱ្យទុរេនទុំលឿនជាងមុន ដែលធ្វើឱ្យវាមិនអាចលូតលាស់ដល់ទំហំពេញលេញ និងកាត់បន្ថយតម្លៃទីផ្សារ។ យោងតាមរដ្ឋបាលគយទូទៅរបស់ប្រទេសចិន ក្នុងខែមេសាតម្លៃនាំចូលរបស់ចិនសម្រាប់ទុរេនថៃគឺ៥,៨០ដុល្លារក្នុងមួយគីឡូក្រាម ផ្ទុយទៅវិញទុរេនវៀតណាមមានតម្លៃ៤,២២ដុល្លារក្នុងមួយគីឡូក្រាម។
ការនាំចេញទុរេនថៃទៅប្រទេសចិនក្នុងរយៈពេល៤ខែដំបូងនៃឆ្នាំ២០២៤ បានបាត់បង់ ៤៩ភាគរយនៃតម្លៃរបស់ពួកគេ ធៀបនឹងរយៈពេលដូចគ្នាកាលពីឆ្នាំមុន។ លើសពីនេះ គ្រោះរាំងស្ងួតអាចកាត់បន្ថយទិន្នផល ដែលអាចកាត់បន្ថយផលិតកម្មទុរេនរបស់ប្រទេសថៃអស់៤២ភាគរយ នៅឆ្នាំនេះ ឬប្រហែល៥សែន៤ម៉ឺនតោន។ គ្រោះរាំងស្ងួត និងរលកកម្ដៅរបស់ប្រទេសថៃ បានបង្កើនថ្លៃដើមផលិតទុរេន ដែលបណ្តាលឱ្យកសិករចំណាយប្រាក់កាន់តែច្រើន លើការដឹកជញ្ជូនតាមផ្លូវទឹក។ ទន្ទឹមនឹងនេះដែរ ក្រុមហ៊ុននាំចេញរបស់វៀតណាម ដែលទទួលបានការអនុញ្ញាតឱ្យលក់ទុរេនស្រស់នៅក្នុងប្រទេសចិនកាលពី៣ឆ្នាំមុន ទទួលបានអត្ថប្រយោជន៍ពីការសន្សំថ្លៃដើម តាមរយៈការដឹកជញ្ជូនផ្លែឈើឆ្លងកាត់ច្រកព្រំដែនតាមផ្លូវគោក។
កត្តានេះនាំឱ្យតម្លៃទុរេនវៀតណាមធ្លាក់ចុះ ដោយតម្លៃទុរេនវៀតណាមនាំចូលរបស់ចិនគឺទាបជាងទុរេនថៃ២៧ភាគរយ។ ក្នុងត្រីមាសទីមួយនៃឆ្នាំនេះ វៀតណាមបាននាំចេញទុរេនចំនួន៣៦៨០០តោនទៅប្រទេសចិន ធៀបនឹង១៧៩០០តោនពីប្រទេសថៃ។ ប្រទេសថៃ បានរក្សាចំណែកទីផ្សារ៦៦ភាគរយ នៅក្នុងប្រទេសចិនក្នុងអំឡុងពេល៤ខែដំបូងនៃឆ្នាំនេះ ប៉ុន្តែចំណែករបស់វៀតណាមតាមតម្លៃបានកើនឡើង៨២ភាគរយ។ កសិករវៀតណាម បានអនុវត្តបច្ចេកទេសថ្មីដោយជោគជ័យក្នុងការដាំទុរេន ហើយកាលពីឆ្នាំមុន ប្រទេសចិនបានទិញទុរេនពីប្រទេសវៀតណាមក្នុងតម្លៃ២,១ពាន់លានដុល្លារ ហើយតួលេខអាចឈានដល់៣ពាន់លានដុល្លារនៅឆ្នាំនេះ៕
