ខេត្តបាត់ដំបង៖ នៅចំណុចក្រុមទី៧ ភូមិស្ទឹងចក ឃុំព្រៃតូច ស្រុកមោងឫស្សី ខេត្តបាត់ដំបង មានករណីហិង្សាមួយកើតទ្បើងដោយផ្តើមពីបុរសបីនាក់បានលួចឆក់ត្រីនៅមុខផ្ទះរបស់គេ រហូតម្ចាស់តាមទាន់ស្ដីបន្ទាស កើតមានចិត្តខឹងបបួលគ្នីគ្នាព្រួតវាយនិងកាប់លើបុរសម្ចាស់ផ្ទះ ធ្វើរបួសក្បាលដេរ០៩ថ្នេរ។ នេះបើយោងតាមការឱ្យដឹងពី ស្នងការដ្ឋាននគរបាលខេត្តបាត់ដំបងកាលពីយប់ថ្ងៃទី២៤ ខែឧសភា ឆ្នាំ២០២៤។
ស្នងការដ្ឋាននគរបាលខេត្តបាត់ដំបង គូសបញ្ជាក់បន្ថែមថា កាលពីថ្ងៃទី២៣ ខែឧសភា ឆ្នាំ២០២៤ វេលាម៉ោង១៩និង៣០នាទីមានករណីហិង្សាដោយចេតនាមានស្ថានទម្ងន់ទោសមួយបានកើតឡើង បង្កដោយជនសង្ស័យមានគ្នាចំនួន០៣នាក់គឺ៖រួមមានទី១-ឈ្មោះ វ៉ាន់ វណ្ណា ហៅធឿក៣០ឆ្នាំ (ប្រដាប់ដោយដំបងឫស្សីជាជនដៃដល់)។ ទី២-ឈ្មោះ វ៉ាន់ តុលា ហៅបឺក អាយុ ២៧ឆ្នាំ(ប្រដាប់ដោយកាំបិតច្នៃជាបក្ខពួក)។ ទី៣-ឈ្មោះ ឡុង ង៉ា អាយុ២០ឆ្នាំ (ប្រដាប់ដោយកាំបិតច្នៃជាបក្ខពួក) ។ អ្នកទាំងបីនាក់រស់នៅភូមិស្ទឹងចក ឃុំព្រៃតូច ស្រុកមោងឫស្សី បានទៅរករឿងជនរងគ្រោះឈ្មោះ ប៊ិន ហុង ភេទប្រុស អាយុ ៦២ឆ្នាំ រស់នៅចំណុចកើតហេតុ ដោយខឹងជនរងគ្រោះស្ដីឱ្យរឿងឆក់ត្រីនៅចំណុចមុខផ្ទះជនរងគ្រោះក្នុងពេលនោះក្រុមជនសង្ស័យម្នាក់ឈ្មោះ វ៉ាន់ វណ្ណា បានយកដំបងឫស្សីវាយទៅលើជនរងគ្រោះជាច្រើនដំបងបណ្ដាលឱ្យរងរបួសក្បាល០១កន្លែងដេរ០៩ថ្នេរហើមដៃទាំងសងខាង។
សមត្ថកិច្ចបន្ថែមថា បន្ទាប់មកបក្ខពួកជនសង្ស័យ០២នាក់ទៀតដែលប្រដាប់ដោយកាំបិតគ្រប់ដៃបម្រុងធ្វើសកម្មភាពកាប់ទៅលើជនរងគ្រោះបន្ថែម តែត្រូវបានគ្រួសារជនរងគ្រោះចេញមកស្រែឱ្យគេជួយទើបក្រុមជនសង្ស័យគេចខ្លួនអស់តែម្ដង។ ក្រោយកើតហេតុជនរងគ្រោះបានដាក់ពាក្យបណ្តឹងចូលមកសមត្ថកិច្ចនគរបាលហើយនៅថ្ងៃទី២៤ ខែឧសភា ឆ្នាំ២០២៤ លោកវរសេនីយ៍ឯក សគឹមឡុង អធិការនគរបាលស្រុកមោងឫស្សីបានដឹកនាំកម្លាំងផ្នែកនគរបាលយុត្តិធម៌រួមជាមួយកម្លាំងប៉ុស្តិ៍នគរបាលព្រៃតូចនៃអធិការដ្ឋាននគរបាលស្រុកស្រាវជ្រាវឃាត់ខ្លួនជនសង្ស័យចំនួន០៣នាក់ខាងលើ និងដកហូតសម្ភារល្មើសច្បាប់មួយចំនួននាំមកកាន់អធិការដ្ឋាននគរបាលស្រុកមោងឫស្សីដើម្បីចាត់ការតាមនីតិវិធីច្បាប់ឱ្យសមនឹងទង្វើដែលបានប្រព្រឹត្ត៕
