រាជធានីភ្នំពេញ៖ មិនធម្មតានោះទេសម្រាប់ សិល្បករខ្មែរច្រើនរូបដែលកំពុងតែបង្ហាញវត្តមានក្នុងកម្មវិធីមហោស្រព​ភាពយន្ត ​ Cannes លើក​ទី​៧៧ នៅ​ឯ​ប្រទេស​បារាំង​​ ខណៈអ្នកគាំទ្រចាត់ទុកថានេះ​ជា​មោទកភាពសម្រាប់ជាតិខ្មែរ បង្ហាញ​គ្រាប់​ពេជ្រ​ដ៏​មាន​តម្លៃ​ជាច្រើននាក់ នៅ​លើ​ឆាក​អន្តរជាតិ​។

សម្រាប់វត្តមានសិល្បករកម្ពុជាទាំងនោះរួមមាន តារា​ស្រី​ជួរ​មុខ ​ស៊ីន ​យូប៊ីន​ និង​ប្អូន​ស្រី ​កញ្ញា​ ស៊ីន​ ជេននី បវរកញ្ញា​ចក្កវាឡ​កម្ពុជា​ឆ្នាំ​២០២០ ​ កញ្ញា រ៉េត សារីតា ផលិតករ​វ័យ​ក្មេង កញ្ញា​ រិទ្ធី​ លំអរ​ពេជ្រ និងកំពូល​អ្នក​ច្នៃ​ម៉ូត​កម្ពុជា ​ អូ​លីវ៉ា គង់ រួមទាំងតារា​ម៉ូដែល​ជា​ច្រើន​រូប​ផង​ដែរ​។ អ្វីដែលគួរឱ្យគាត់សម្គាល់ តារាសម្ដែងជួរមុខកម្ពុជា ស៊ីន យូប៊ីន ក្នុងកម្មវិធីមហោស្រពភាពយន្ត Cannes លើកទី៧៧ បានតុបតែងខ្លួនដ៏ប្រណីតចំនួនពីរ ខណៈឈុតទី៣គ្រោងនឹងបង្ហាញជាឈុតបែបខ្មែរ ដែលច្នៃដោយ អូ​លីវ៉ា គង់ បង្ហាញពីទម្រង់របាំបុរាណខ្មែរដែលមាន ការដាំ ការដុះ ស្លឹកខ្ចី ស្លឹក ចេញផ្ការ ផ្លែ ផ្លែទុំ ផ្លែជ្រុះ សុទ្ធសឹងតែឌិនដោយដៃ។

សូមរំឭកថា ក្នុងថ្ងៃទី១ ស៊ីន យូប៊ីន បានជ្រើសរើសរ៉ូបពណ៌ខ្មៅវែងប៉ោងរបស់អ្នកច្នៃម៉ូដ Michael Cinco ជនជាតិហ្វីលីពីន និងមានមូលដ្ឋាននៅទីក្រុងឌុយបៃ។ ដោយឡែកថ្ងៃទី២ យូប៊ីន បានស្លៀករ៉ូបពណ៌ផ្កាឈូកមានស្បៃនៅពីក្រោយរែងអូសដីទាក់ទាញមនុស្សម្នាដែលបានចូលរួមនៅក្នុងកម្មវិធីផ្ទាល់មិនអាចទម្លាក់ភ្នែកពីនាង។ ភាពទាន់សម័យនៃឈុតពី២នេះ គឺបានមកពីប្រេន joli poli។ រូបរាងដ៏អស្ចារ្យបានបង្ហាញភាពស្រស់ស្អាត ជាគំរូភាពឆើតឆាយនៅកម្រាលព្រំក្រហម Cannes ដែលប្រមូលផ្ដុំទៅដោយការបង្អួត Fashion។ គួរជម្រាបថា នេះមិនមែនជាលើកទីមួយទេដែលតារាសម្តែងស្រីឆ្នើម យូប៊ីន ទទួលការអញ្ជើញឱ្យចូលរួមនៅក្នុងកម្មវិធីធំៗតំណាងប្រទេសបែបនេះ។ គេនៅចាំបានថា Cannes លើកទី៧៦ កាលពីថ្ងៃទី១៧ ខែឧសភា ឆ្នាំ២០២៣ នាងក៏ទទួលការអញ្ជើញឱ្យចូលរួមម្ដងរួចមកហើយ ដោយកាលនោះនាបានធ្វើឱ្យសារព័ត៌មានបរទេសជាច្រើនចាប់អារម្មណ៍ចុះផ្សាយពីកម្ពុជា៕